ପାଟକୁରା,୪ା୧୦(ଡି.ଏନ.ଏ.): ଲଗାଣ ବର୍ଷା ହେବାର ୨୨ ଦିନ ବିତିଯାଇଥିଲେ ସୁଦ୍ଧା ଖାଲ ପାଟ ଜମିରୁ ଏପର୍ଯ୍ୟନ୍ତ ସମ୍ପୂର୍ଣ୍ଣ ଭାବେ ପାଣି ଛାଡି ନାହିଁ। ପାଣିରେ ଦୀର୍ଘଦିନ ବୁଡି ରହିଥିବା ଶାରଦ ଧାନ ଫସଲ ଖରା ତାତିରେ ପଚିବାକୁ ଆରମ୍ଭ କଲାଣି। ଧାର କରଜ କରି ଚାଷୀମାନେ ଚାଷ କରିଥିଲେ। ଜମିରେ ଧାନ ଗଛ ପଚି ଯାଉଥିବାରୁ ଚାଷୀମାନେ ହତାଶ ହୋଇପଡିଛନ୍ତି।
ବିଶେଷ କରି ସ୍ବର୍ଣ୍ଣ, ପୂଜା, ଶାରଳା, ସ୍ବର୍ଣ୍ଣ ସବ୍-ୱାନ୍ ଆଦି କିସମ୍ର ଅଧିକ ଅମଳକ୍ଷମ ଧାନ ବିହନ ଅଧିକ ଟଙ୍କାରେ କିଣି ଚାଷୀ ରୁଆପୋତା କରିଥିଲେ। ଚାଷ କାର୍ଯ୍ୟ ଆରମ୍ଭରେ ଠିକ୍ ସମୟରେ ବର୍ଷା ନ ହେବାରୁ ସ୍ବଳ୍ପ ବୃଷ୍ଟିରେ ଚାଷୀମାନେ ପାଣି ପମ୍ପ ଲଗାଇ ରୁଆପୋତା କାର୍ଯ୍ୟ ସାରିଥିଲେ। ଅଧିକ ଅମଳ ହେବା ଆଶାରେ ଧାନ ରୁଆପୋତା କରାଯିବା ପରେ ରାସାୟନିକ ସାର ଓ କୀଟନାଶକ ଔଷଧ ଜମିରେ ପ୍ରୟୋଗ କରିଥିଲେ। ଧାନ ଗଛଗୁଡିକରେ ଯଥେଷ୍ଟ ପରିମାଣରେ ପିଲ ବାହାରି ଥିବାବେଳେ ଲଘୁଚାପଜନିତ ଲଗାଣ ବର୍ଷା ଯୋଗୁ ଜମିରୁ ପାଣି ନିଷ୍କାସିତ ହେବାରେ ବିଳମ୍ବ ହୋଇଥିଲା। ଅଧିକ ଦିନ ପାଣି ଜମି ରହିବା ଫଳରେ ଧାନ ଗଛର ପିଲଗୁଡ଼ିକ ପଚି ଗଲା। ଏବେ ଜମିରୁ ପାଣି ଛାଡ଼ିବା ପରେ ଦୁଇଦିନ ହେଲା ଟାଣ ଖରା ଯୋଗୁ ପାଣିରେ ଦୀର୍ଘଦିନ ବୁଡି ରହିଥିବା ଧାନ ଗଛଗୁଡିକ ପଚିବାକୁ ଆରମ୍ଭ କଲାଣି।
ଅନ୍ୟପକ୍ଷରେ ପାଚି ଥିବା ବିଆଳି କିସମ୍ ଧାନ ପାଣିରେ ବୁଡି ରହି ସେଥିରୁ ଗଜା ବାହାରୁଛି। କେତେଜଣ ଚାଷୀ ଓଦା ଥିବା ଧାନକୁ କାଟି ଆଣି କମ୍ ଦାମ୍ରେ ଚୁଡା ମିଲ୍ରେ ବିକ୍ରୟ କରୁଥିବା ଦେଖିବାକୁ ମିଳୁଛି। ଏପରିସ୍ଥଳେ ସମବାୟ ସମିତି ଓ ଗାଁ ମହାଜନଙ୍କଠାରୁ କରଜ କରି ଚାଷ କାର୍ଯ୍ୟରେ ବିନିଯୋଗ କରିଥିବା ଟଙ୍କା କିପରି ଚାଷୀ ଶୁଝିବେ ସେହି ଚିନ୍ତା ଏବେ ଘାରିଛି। ସେମାନଙ୍କୁ ସରକାରୀ ସହାୟତା ପ୍ରଦାନ କରା ନ ଗଲେ ଆର୍ଥତ୍କ ମେରୁଦଣ୍ଡ ଭାଙ୍ଗିପଡିବାର ଆଶଙ୍କା ପ୍ରକାଶ ପାଇଛି। ପ୍ରଶାସନ ସ୍ତରରେ ଖାଲପାଟ ଜମିରେ କ୍ଷତି ଘଟିଥିବା ଶାରଦ ଚାଷ ଜମିକୁ ଅନୁଧ୍ୟାନ କରି ଚାଷୀମାନଙ୍କୁ ଉଚିତ ପରିମାଣରେ କ୍ଷତିପୂରଣ ଦେବାକୁ ବେଡାରୀ ସରପଞ୍ଚ ଗୋକୁଳାନନ୍ଦ ବେହେରା, ନୃସିଂହ ଚରଣ ଶୁକ୍ଳ, ଧ୍ରୁବ ଚରଣ ସାହୁ, ନାରାୟଣ ସାହୁ, ବିସ୍ମୟ ଖୁଣ୍ଟିଆ, ଗଗନ ବିହାରୀ ବିଶ୍ୱାଳ, ନଗେନ୍ ମଲ୍ଲ ପ୍ରମୁଖ ଦାବି ଜଣାଇଛନ୍ତି। ପ୍ରକାଶ ଯେ, ବେଡାରୀ ମହୁରିଆ ଦଣ୍ଡା ପାଟ, ମୁକୁତି ଗହୀର, ବାରମାଣିଆ, ମହିଁଷିଗୋଠ, ବାଘତଳ ଚକ, କିଣିଲୋପାଟ, ପଦ୍ମପୁରପାଟ, ବେଡାରୀଛକିତା, ଦଳୁଆଣିପାଟ, ଶ୍ରୀଚନ୍ଦନପୁରପାଟ ଓ ପରକଣା ଗହୀରରେ ଥିବା ଖାଲପାଟ ଜମିରେ ବୁଡି ରହିଥିବା ଶାରଦ ଧାନ ବିଶେଷ ଭାବେ କ୍ଷତି ଘଟିଥିବା ଚାଷୀମାନେ ପ୍ରକାଶ କରିଛନ୍ତି।
