ନୂଆଗାଁ,୨୬।୪( ଧନେଶ୍ୱର ସାହୁ): ଚାଷ ଜମିକୁ ଜଳସେଚନର ସୁବିଧା ଯୋଗାଇ ଦେବା ପାଇଁ ସରକାର ଅନେକ କୋଟି ଟଙ୍କା ବ୍ୟୟ କରୁଛନ୍ତି। ଜଳସେଚନ ପ୍ରକଳ୍ପ ନିର୍ମାଣ ପରେ ଚାଷ ଜମିରେ ପାଣି ମାଡୁ ଥିବା ସରକାରୀ ରିପୋର୍ଟ କହୁଛି। ସେହି ଅନୁସାରେ ଚାଷୀମାନଙ୍କଠାରୁ ରାଜସ୍ବ ବିଭାଗ ଜଳକର ଆଦାୟ କରୁଛି। କିନ୍ତୁ ଜମିରେ ପାଣି ନ ମାଡ଼ି ମଧ୍ୟ ଚାଷୀ ଜଳକର ଦେଉଥିବା ଅଭିଯୋଗ ହେଉଛି।
ନୟାଗଡ଼ ଜିଲା ନୂଆଗାଁ ତହସିଲ ଅଧୀନରେ ୩୨,୫୪.୭୩ ଏକର ଚାଷ ଜମି ରହିଥିବା ବେଳେ ସେଥିମଧ୍ୟରୁ ୩,୫୨.୮୪୮ ଏକର ଜଳ ସେଚିତ ଜମି ରହିଥିବା ସରକାରଙ୍କ ତଥ୍ୟ କହୁଛି। ଜଳସେଚିତ ଜମି ପାଇଁ ଚାଷୀମାନେ ଜଳ କର ବାବଦକୁ ବର୍ଷକୁ ଏକର ପିଛା କିସମ ଅନୁସାରେ ୧୦୨ ଟଙ୍କା ୭୫ ଟଙ୍କା ଓ ୪୫ ଟଙ୍କା ଦେବାକୁ ପଡୁଛି। ପ୍ରତିବର୍ଷ ଜଳକର ନ ଦେଲେ ପରବର୍ତ୍ତୀ ବର୍ଷ ବକେୟା ବାବଦକୁ ସୁଧ ମଧ୍ୟ ଆଦାୟ କରୁଛି ରାଜସ୍ବ ବିଭାଗ। କିନ୍ତୁ ନୂଆଗାଁ ତହସିଲର ମହିତମା ରାଜସ୍ବ ବିଭାଗର ସୋରଡା ଗ୍ରାମର ମାତ୍ର ଅଳ୍ପ କିଛି ଜମିକୁ ଛାଡି ଦେଲେ ଅନ୍ୟ କୌଣସି ଜମିରେ ପାଣି ମାଡୁ ନାହିଁ। ଜଳସେଚନ ପାଇଁ କୁଆଁରିଆ ନଦୀରୁ ପାଣି ଆସିବା ପାଇଁ ଡ୍ରେନ କରାଯାଇଥିଲେ ମଧ୍ୟ ବର୍ତ୍ତମାନ ତାହା ସବୁ ପୋତି ହୋଇ ପଡିଲାଣି। ଫଳରେ ଜମିକୁ ପାଣି ମାଡୁ ନାହିଁ। ସେହିପରି ନୂଆଗାଁ , ମହିପୁର , ବାହାଡାଝୋଲା ରାଜସ୍ବ ବିଭାଗ ଅଧୀନରେ ଥିବା ଚାଷ ଜମିକୁ ପାଣି ଯୋଗାଇବା ପାଇଁ କ୍ଷୁଦ୍ର ଜଳ ସେଚନ ବିଭାଗ ଦ୍ୱାରା ଅନେକ ଜଳସେଚନ ପ୍ରକଳ୍ପ ନିର୍ମାଣ କରାଯାଉଛି। କିନ୍ତୁ ଉକ୍ତ ପ୍ରକଳ୍ପଗୁଡ଼ିକ ଠିକାଦାର ଏବଂ ବିଭାଗୀୟ ଅଧିକାରୀମାନଙ୍କୁ ସୁହାଇଲା ଭଳି କରାଯାଉଥିବାରୁ କୌଣସି ଗୋଟିଏ ପ୍ରକଳ୍ପ କାମରେ ଆସୁ ନ ଥିବା ଚାଷୀମାନେ ଅଭିଯୋଗ କରିଛନ୍ତି। କେଉଁଠି ପ୍ରକଳ୍ପ ଅଧପନ୍ତରିଆ ହୋଇ ପଡିରହିଛି ତ ଆଉ କେଉଁଠି ପାଣି ଅଟକାଇବା ପାଇଁ ଚାବି ଲାଗି ନାହିଁ। ପୁଣି କେଉଁଠି ନିମ୍ନମାନର ନିର୍ମାଣ କାର୍ଯ୍ୟ ଯୋଗୁଁ ପ୍ରକଳ୍ପ ଭାଙ୍ଗିରୁଜି ଗଲାଣି। ଜଳ ସମ୍ପଦ ବିଭାଗ , କ୍ଷୁଦ୍ର ଜଳସେଚନ , ଉଠା ଜଳସେଚନ ଆଦି ବିଭାଗ ଦ୍ୱାରା ସରକାର ଅନେକ କୋଟି ଟଙ୍କା ବ୍ୟୟରେ ପ୍ରକଳ୍ପ ନିର୍ମାଣ କରୁଥିବା ବେଳେ ଠିକାଦାର ଓ ବିଭାଗୀୟ ଅଧିକାରୀମାନେ ନିର୍ମାଣ କାର୍ଯ୍ୟ କରି ଲାଭବାନ ହେଉଛନ୍ତି। ଚାଷୀ ଜଳସେଚନ ମାଧ୍ୟମରେ ଜଳ ଯୋଗାଇ ନ ପାରିବା ବାବଦରେ ନୂଆଗାଁ ତହସିଲଦାର ହେମନ୍ତ କୁମାର ନାୟକଙ୍କୁ ପଚାରିବାରେ ଯେଉଁ ଚାଷୀମାନଙ୍କ ଚାଷ ଜମିରେ ପାଣି ମାଡୁନି କିନ୍ତୁ ଜଳକର ଦେଉଛନ୍ତି ସେମାନେ ଲିଖିତ ଭାବେ ଅଭିଯୋଗ କଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।
