ଭେଡେନ,୨୫।୨(ହୃଷିକେଶ ଖମାରୀ): ବରଗଡ଼ ଜିଲାରେ ଅନେକ ଚାଷୀ ଏପର୍ଯ୍ୟନ୍ତ ଖରିଫରେ ଅମଳ ଧାନ ବିକ୍ରି କରି ପାରି ନାହାନ୍ତି । ଫଳରେ ପରିବାର ଗୁଜୁରାଣ ମେଣ୍ଟାଇବା ସେମାନଙ୍କ ପାଇଁ କଷ୍ଟସାଧ୍ୟ ହୋଇ ପଡିଛି । ଏଭଳି ଏକ ଘଟଣା ମଙ୍ଗଳବାର ସାମ୍ନାକୁ ଆସିଛି । ପାଖରେ ଟଙ୍କା ନଥିବା ଯୋଗୁଁ ଉକ୍ତ ବ୍ଲକର ଜଣେ ଚାଷୀ ରମେଶ ମହାପାତ୍ର ବିଦ୍ୟୁତ ଦେୟ ବାବଦକୁ ୪ବସ୍ତା ଧାନ ସ୍ଥାନୀୟ ବିଦ୍ୟୁତ୍ ବିଭାଗ କାର୍ଯ୍ୟାଳୟରେ ଗଦା କରିଛନ୍ତି।
ରମେଶ ଏବଂ ତାଙ୍କ ଭଉଣୀ ସଂଯୁକ୍ତାଙ୍କ ନାମରେ ଏକର ଚାଷଜମି ରହିଛି। ମାତ୍ର ଉଭୟଙ୍କୁ ଏପର୍ଯ୍ୟନ୍ତ ଧାନବିକ୍ରି ଟୋକନ ମିଳିପାରି ନାହିଁ। ଫଳରେ ପ୍ରାୟ ୪ଶହ ବସ୍ତା ଧାନ ବିକ୍ରି ଅପେକ୍ଷାରେ ରହିଛି। ଅନ୍ୟପକ୍ଷରେ ୨୫ତାରିଖ ସୁଦ୍ଧା ୮ହଜାର ଟଙ୍କା ବିଦ୍ୟୁତ୍ ବିଲ ପୈଠ ନ କଲେ ବିଦ୍ୟୁତ୍ ସଂଯୋଗ ବିଚ୍ଛିନ୍ନ କରିଦେବାକୁ ବିଦ୍ୟୁତ ବିଭାଗରୁ ନୋଟିସ୍ ପାଇବା ପରେ ସେ ଏଭଳି ନିଷ୍ପତ୍ତି ନେଇଥିବା ରମେଶ କହିଛନ୍ତି । ତେବେ ଏହି ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।
