ମୁମ୍ବାଇ, ୧୧।୭- ବଲିଉଡ୍ ସୁପର୍ ଷ୍ଟାର ଅମିତାଭ ବଚ୍ଚନଙ୍କ ଟିକିଏ ଝଲକ ପାଇବା ପାଇଁ ସୁଦୂର ଉତ୍ତର ପ୍ରଦେଶରୁ ମୁମ୍ବାଇ ଆସିଥିଲେ। କିନ୍ତୁ ଅମିତାଭଙ୍କ ଦର୍ଶନ ପାଇବା ପୂର୍ବରୁ ପ୍ରଶଂସକ ଜଣଙ୍କ ଦୁବୃର୍ତ୍ତଙ୍କ ମରଣାନ୍ତକ ଆକ୍ରମଣର ଶିକାର ହୋଇଛନ୍ତି। ଏମିତି ଏକ ଘଟଣା ଏବେ ସାମ୍ନାକୁ ଆସିଛି। ଉତ୍ତର ପ୍ରଦେଶର ଅକିଲ ଶେଖ୍ ନାମକ ଜଣେ ବ୍ୟକ୍ତି ବିଗ୍ ବି’ଙ୍କ ବଡ଼ ପ୍ରଶଂସକ। ବୃତ୍ତିରେ ସେ ଜଣେ କପଡ଼ା ବ୍ୟବସାୟୀ। ଅମିତାଭଙ୍କୁ ଦେଖିବା ପାଇଁ ମନ ବଳାଇ ଅଖିଲ ଗତ ଜୁନ୍ ଶେଷ ସପ୍ତାହରେ ସମସ୍ତ ଲକ୍ ଡାଉନା ନିୟମକୁ ଉଲ୍ଲଂଘନ କରି ମୁମ୍ବାଇ ଚାଲିଆସିଥିଲେ। ମୁମ୍ବାଇ ଆସିବା ପରେ ସେ ଜୁହୁସ୍ଥିତ ଅମିତାଭଙ୍କ ବଙ୍ଗଳା ‘ଜଲାସ’ ସମ୍ମୁଖ ଫୁଟ୍ଫାଥ୍ରେ ରହୁଥିଲେ। ଏହାପରେ ଗୋପୀ ଖାରଓ୍ବା ଓ ସୁରେଶ କଞ୍ଜି ଖାରଓ୍ବା ନାମକ ଦୁଇଜଣ ବ୍ୟକ୍ତିଙ୍କ ସହ ଅକିଲ୍ଙ୍କ ସାକ୍ଷାତ୍ ହୋଇଥିଲା। ଉଭୟ ଅକିଲ୍ଙ୍କ ସହ ଘନିଷ୍ଠତା ବଢ଼ାଇ ତାଙ୍କୁ ମଦ୍ୟପାନ ପାଇଁ ଟଙ୍କା ମାଗିଥିଲେ। କିନ୍ତୁ ଅକିଲ୍ ଟଙ୍କା ଦେବାକୁ ମନା କରିବାରୁ ସେମାନେ ତାଙ୍କୁ ଏକ ନିଛାଟିଆ ଯାଗାକୁ ନେଇଯାଇଥିଲେ। ସେଠାରେ ଗୋପୀ ଓ ସୁରେଶଙ୍କ ସହ ଅକିଲ୍ଙ୍କ କଥା କଟାକଟି ହୋଇଥିଲା। ଏହାପରେ ଉଭୟ ଏକ ଛୁରୀରେ ଅକିଲ୍ଙ୍କ ଛାତି, ହାତ ଓ ପେଟକୁ ମରଣାନ୍ତକ ଆକ୍ରମଣ କରି ଫେରାର ହୋଇଯାଇଥିଲେ। ପରେ ସ୍ଥାନୀୟ ଲୋକଙ୍କ ସହାୟତାରେ ଅକିଲ୍ଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ପୋଲିସ ଘଟଣାର ଅନୁସନ୍ଧାନ ଜାରି ରଖିଥିବା ଜୁହୁ ଥାନା ଅଧିକାରୀ କହିଛନ୍ତି।
