ମୁମ୍ବାଇ: ହିନ୍ଦୀ ସିନେମାର ଜଣାଶୁଣା ଗୀତିକାର ମାୟା ଗୋବିନ୍ଦଙ୍କର ୮୨ ବର୍ଷ ବୟସରେ ପରଲୋକ ହୋଇଛି । ଗୁରୁବାର ସକାଳେ ସେ ତାଙ୍କ ପୁଅ ଅଜୟଙ୍କ କୋଳରେ ଶେଷ ନିଶ୍ୱାସ ତ୍ୟାଗ କରିଛନ୍ତି । ତାଙ୍କର ଅନ୍ତିମ ସଂସ୍କାର ଜୁହୁସ୍ଥିତ ପୱନ ହଂସ ଶ୍ମଶାନ ଗୃହରେ କରାଯିବ । ୧୭ ଜାନୁୟାରୀ ୧୯୪୦ରେ ଉତ୍ତର ପ୍ରଦେଶର ଲକ୍ଷ୍ନୌରେ ଜନ୍ମ ନେଇଥିଲେ ମାୟା । ସ୍ନାତକ ଡିଗ୍ରୀ ହାସଲ କରିବା ପରେ ସେ ବିଏଡ କରିଥିଲେ । ଏହାସହ ସେ କଥକରେ ମଧ୍ୟ ଜଣେ ଭଲ ନୃତ୍ୟଶିଳ୍ପୀ ଥିଲେ ।
ମାୟା ଗୋବିନ୍ଦ ତାଙ୍କ କ୍ୟାରିୟରରେ ୩୫୦ରୁ ଅଧିକ ଫିଲ୍ମରେ ଗୀତ ଲେଖିଛନ୍ତି । ତାଙ୍କୁ ପ୍ରଥମ ବ୍ରେକ୍ ନିର୍ଦ୍ଦେଶକ ଆତ୍ମାରାମ ତାଙ୍କ ଫିଲ୍ମ ‘ଆରୋପ’ରେ ଦେଇଥିଲେ । ଯେଉଁଥିରେ ସେ ପ୍ରମାଣ କରିଥିଲେ କି ଲିରିକ୍ସ ଲେଖିବାରେ ସେ ଅନ୍ୟମାନଙ୍କଠାରୁ ଟିକେ ଭିନ୍ନ । ୧୯୭୯ରେ ‘ସାୱନ କୋ ଆନେ ଦୋ’ ଫିଲ୍ମର କଜରେ କି ବାତି ଗୋବିନ୍ଦଙ୍କୁ ପରିଚିତ କରାଇଥିଲା । ମାୟା ବାବରି, ଦଲାଲ, ଗଜ ଗାମିନି, ମେ ଖିଲାଡି ତୁ ଅନାଡି ଓ ହପ୍ତା ୱସୁଲି ଭଳି ଫିଲ୍ମ ପାଇଁ ଗୀତ ଲେଖିଛନ୍ତି । ଏହା ବ୍ୟତୀତ ମାୟା ଦୂରଦର୍ଶନରେ ପ୍ରସାରିତ ଧାରାବାହିକ ମହାଭାରତ ପାଇଁ ସେ ଖୁବ୍ ଗୀତ, ଦୋହା ଓ ଛନ୍ଦ ଲେଖିିଛନ୍ତି । ମାୟା ଗୋବିନ୍ଦ ହିଁ ଫାଲଗୁନି ପାଠକଙ୍କ ଲୋକପ୍ରିୟ ଗୀତ ‘ମେନେ ପାୟଲ ହେ ଛନକାଇ’ ମଧ୍ୟ ଲେଖିଥିଲେ ।
