ଖୋର୍ଦ୍ଧା ଅଫିସ,୮ା୪: ନକଲି ରାଶନକାର୍ଡ ଦେଇ ଭୋଟ ହାତେଇଥିବା ବେଳେ ନିର୍ବାଚନ ଫଳାଫଳ ଘୋଷଣା ପରେ ଏହି କାର୍ଡ କାର୍ଯ୍ୟକ୍ଷମ ହେଉନାହିଁ। ଏପରି କି ପ୍ରାର୍ଥୀ ବିଜୟ ହାସଲ କରିବା ପରେ ଭୋଟରଙ୍କୁ ଦେଇଥିବା କାର୍ଡକୁ ଜବରଦସ୍ତ ଛଡ଼ାଇ ନିଆଯାଇଛି। ଚିଲିକା ବ୍ଲକ ଚଣ୍ଡେଶ୍ୱର ପଞ୍ଚାୟତରୁ ଏଭଳି ସଙ୍ଗିନ ଅଭିଯୋଗ ଆସିଛି। ନକଲି ରାଶନ କାର୍ଡର ଶିକାର ହୋଇଥିବା ଦୁଇଜଣ ମହିଳା ଏ ନେଇ ଗୁରୁବାର ଚିଲିକା ବିଡିଓଙ୍କ ନିକଟରେ ଲିଖିତ ଅଭିଯୋଗ କରି କାର୍ଯ୍ୟାନୁଷ୍ଠାନ ଦାବି କରିଛନ୍ତି।
ଅଭିଯୋଗ ଅନୁଯାୟୀ, ଚଣ୍ଡେଶ୍ୱର ପଞ୍ଚାୟତ ଅଧୀନ ବଡ଼ପୋଖରୀଆପାଟଣା ଗ୍ରାମର ସାଧନା ପ୍ରଧାନ ଏବଂ ଅହଲ୍ୟା ଦେଈଙ୍କୁ ପୂର୍ବତନ ସରପଞ୍ଚ ସୁଧାକର ମହାପାତ୍ର ପୃଥକ ଭାବେ ଦୁଇଟି ରାଶନ କାର୍ଡ (ଯଥାକ୍ରମେ ନଂ. ୧୯୦୭୦୫୧୨୨୭୮ ଏବଂ ୧୯୦୭୦୫୧୨୨୭୧) ୩ମାସ ପୂର୍ବରୁ ଦେଇଥିଲେ। ତଦନୁସାରେ ଉଭୟେ ଡିସେମ୍ବର ଏବଂ ଜାନୁୟାରୀ ମାସରେ ଉପରୋକ୍ତ କାର୍ଡ ଦେଖାଇ ବିନା ଫିଙ୍ଗର ପ୍ରିଣ୍ଟରେ ଚାଉଳ ଆଣିଥିଲେ। ମାତ୍ର ଏବେ ଚାଉଳ ଆଣିବା ପାଇଁ ଦୁହେଁ ପଞ୍ଚାୟତ କାର୍ଯ୍ୟାଳୟକୁ ଯାଇଥିଲେ। ଯୋଗାଣ ସହାୟକ ସେମାନଙ୍କୁ ଚାଉଳ ଦେବାକୁ ମନା କରିଦେବା ସହ ସମ୍ପୃକ୍ତ କାର୍ଡ ଦୁଇଟିକୁ ରଖିଦେଇଥିଲେ। ଏଥିସହ ଏହି କାର୍ଡରେ ଆଉ ଚାଉଳ ଦିଆଯାଇପାରିବ ନାହିଁ ବୋଲି କହିଥିଲେ। ପରେ ଏହା ନକଲିି କାର୍ଡ ବୋଲି ସମ୍ପୃକ୍ତ ହିତାଧିକାରୀ ଦ୍ୱୟ ଜାଣିବାକୁ ପାଇଥିଲେ। ଏନେଇ ସେମାନେ ସୁଧାକରଙ୍କୁ ପଚାରିବାରୁ ସେ ନିଜ ହାତରୁ ସାମଗ୍ରୀ ଦେଉଥିଲେ, ଏଣିକି ଆଉ ଦିଆଯାଇପାରିବ ନାହିଁ ବୋଲି କହିଥିବା ସାଧନା ଏବଂ ଅହଲ୍ୟା ଅଭିଯୋଗ କରିଛନ୍ତି। ଏଠାରେ ପ୍ରଶ୍ନ ଉଠୁଛି, ରାଶନକାର୍ଡରେ ମୁଖ୍ୟମନ୍ତ୍ରୀଙ୍କ ଫଟୋ ଥାଇ ହିତାଧିକାରୀଙ୍କୁ ସୁଧାକର ପୂର୍ବରୁ ଦେଇଥିଲେ। ତେବେ କେଉଁ ଉଦ୍ଦେଶ୍ୟ ରଖି ସେ ଏହି ରାଶନକାର୍ଡ ଦେଇଥିଲେ ଏବଂ ଯଦି ତାହା ନକଲି ଥିଲା, ତେବେ ସେମାନଙ୍କୁ ଚାଉଳ କିପରି ମିଳୁଥିଲା ବୋଲି ସାଧାରଣରେ ପ୍ରଶ୍ନବାଚୀ ହୋଇଛି। ଏହି ଘଟଣାରୁ ପଞ୍ଚାୟତରେ ରାଶନ ସାମଗ୍ରୀ ବଣ୍ଟନରେ ହେରଫେର ହେଉଥିବା ସ୍ପଷ୍ଟ ହେଉଛି। ନିର୍ବାଚନ ପୂର୍ବରୁ ଭୋଟ ହାତେଇବା ପାଇଁ ଏକାଧିକ ଗ୍ରାମର ଲୋକଙ୍କୁ ଏଭଳି ନକଲି ରାଶନ କାର୍ଡ ଦିଆଯାଇଥିବା କେତେଜଣ ଗ୍ରାମବାସୀ ଗଣମାଧ୍ୟମ ଆଗରେ କହିଛନ୍ତି। ଏହି ଘଟଣାର ନିରପେକ୍ଷ ତଦନ୍ତ କରାଗଲେ, ବହୁ ଗୁମର ପଦାକୁ ଆସିବ ବୋଲି ଚର୍ଚ୍ଚା ହେଉଛି। ଚଳିତବର୍ଷ ପଞ୍ଚାୟତ ନିର୍ବାଚନରେ ଚଣ୍ଡେଶ୍ୱର ପଞ୍ଚାୟତ ଆସନ ମହିଳାଙ୍କ ପାଇଁ ସଂରକ୍ଷିତ ରହିଥିଲା। ସୁଧାକର ସରପଞ୍ଚ ପଦରେ ନିଜ ସ୍ତ୍ରୀ ଲିପାଲୀନାଙ୍କୁ ଠିଆ କରାଇବା ଉଦ୍ଦେଶ୍ୟ ନେଇ ଏଭଳି ନକଲି ରାଶନକାର୍ଡ ବାଣ୍ଟିଥିବା ଅଭିଯୋଗ ହେଉଛି। ଏ ସମ୍ପର୍କରେ ସୁଧାକର ମହାପାତ୍ରଙ୍କ ପ୍ରତିକ୍ରିୟା ମିଳି ନାହଁି। ଅନ୍ୟପକ୍ଷେ ଏହାର ଠିକ୍ ତଦନ୍ତ କରିବା ସହ ସପ୍ତାହ ମଧ୍ୟରେ ପଦକ୍ଷେପ ନିଆ ନ ଗଲେ ବ୍ଳକ କାର୍ଯ୍ୟାଳୟ ଆଗରେ ଧାରଣା ଦେବେ ବୋଲି ଗ୍ରାମବାସୀ କହିଛନ୍ତି। ଏନେଇ ବ୍ଲକ ଯୋଗାଣ ନିରୀକ୍ଷକ ଅରୁଣ ଲେଙ୍କା କହିଛନ୍ତି, ପ୍ରାଥମିକ ଅନୁସନ୍ଧାନରୁ ସମ୍ପୃକ୍ତ ରାଶନ କାର୍ଡ ନମ୍ବର ନକଲି ବୋଲି ଜଣାପଡ଼ିଛି। ଏହି ଘଟଣାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିଆଯିବ।
