ଭୁବନେଶ୍ୱର, ୨୧।୨(ବ୍ୟୁରୋ): ଅର୍ଥ ପାଇଁ ୧୭ଜଣଙ୍କୁ ବିବାହ କରିଥିବା ରସିକିଆ ନକଲି ଡାକ୍ତର ରମେଶ ଚନ୍ଦ୍ର ସ୍ବାଇଁଙ୍କ ଠକେଇ ପେଡି ଖୋଲିବାରେ ଲାଗିଛି। ଶନିବାରଠାରୁ ୫ଦିନିଆ ରିମାଣ୍ଡରେ ଆଣି କମିଶନରେଟ ପୋଲିସ ମାରାଥନ୍ ଜେରା କରୁଛି। ରବିବାର ରିମାଣ୍ଡର ଦ୍ୱିତୀୟ ଦିନରେ ମହିଳା ଥାନା, ସାଇବର, ଆଣ୍ଟିଫ୍ରଡ୍ ସେଲ୍ ଓ ସ୍ପେଶାଲ ସ୍କ୍ବାଡ୍କୁ ନେଇ ଗଠିତ ସ୍ବତନ୍ତ୍ର ଟିମ୍ ତାଙ୍କୁ ଜେରା କରି ବହୁ ଗୁରୁତ୍ୱପୂର୍ଣ୍ଣ ତଥ୍ୟ ହାସଲ କରିଛି। ମହିଳାଙ୍କୁ ପ୍ରତାରିତ କରିବା ଓ ଠକେଇ ମାମଲାରେ ବିଭିନ୍ନ ଦିଗକୁ ନେଇ ସ୍ବତନ୍ତ୍ର ଟିମ୍ ଅନୁସନ୍ଧାନ ଜାରି ରଖିଛି। ପୋଲିସ ଟିମ୍ ରମେଶଙ୍କୁ ୮ ଘଣ୍ଟାରୁ ଅଧିକ ସମୟ ଜେରା କରିଥିଲା। ବିଭିନ୍ନ ପ୍ରଶ୍ନର ସେ ସନ୍ତୋଷଜନକ ଉତ୍ତର ଦେଇ ନ ଥିବା ବିଶ୍ୱସ୍ତ ସୂତ୍ରରୁ ଜଣାପଡ଼ିଛି। ତେବେ ଅଭିଯୁକ୍ତ ରମେଶ ନିଜକୁ କେନ୍ଦ୍ର ସରକାରଙ୍କ ଅଧିକାରୀ ବୋଲି ପରିଚୟ ଦେଇ କୋଲକାତାର ଜଣେ ବ୍ୟବସାୟୀଙ୍କଠାରୁ ହ୍ୟାଚେରି ମେଶିନ କିଣି ୧ ଲକ୍ଷରୁ ଅଧିକ ଟଙ୍କା ଠକିଥିବା ଅଭିଯୋଗ ଆସିଛି। ଅନ୍ୟପକ୍ଷରେ ରମେଶଙ୍କ ନାମରେ ଭୁବନେଶ୍ୱର ସହରାଞ୍ଚଳ ପୋଲିସ ଜିଲାର ୨ଟି ଥାନାରେ ୨ ମାମଲା ଥିବାବେଳେ ଭରତପୁର ଥାନାରେ ଏବେ ଆଉଏକ ମାମଲା ରୁଜୁ କରାଯାଇଛି। ଏମ୍ସରେ ଚାକିରି ଦେବାକୁ କହି ଜଣେ ଯୁବକଙ୍କଠାରୁ ୧୨ ଲକ୍ଷ ୯୨ ହଜାର ଠକିଛନ୍ତି। ଏନେଇ ଭରତପୁର ଥାନା ପୋଲିସ ରମେଶଙ୍କ ନାମରେ ଏକ ମାମଲା (ନଂ.୬୨/୨୨) ରୁଜୁ କରି ତଦନ୍ତ ଆରମ୍ଭ କରିଛି।
ପୋଲିସ ସୂଚନା ଅନୁଯାୟୀ, ଫୁଲେଶ୍ୱର ବସ୍ତିରେ ରହୁଥିବା ସଞ୍ଜୟ କୁମାର ଦାସଙ୍କ ସହ ରମେଶଙ୍କର ୨୦୨୧ ଜାନୁୟାରୀରେ ପରିଚୟ ହୋଇଥିଲା। ରମେଶ ତାଙ୍କୁ କେନ୍ଦ୍ର ସରକାରଙ୍କ ସ୍ବାସ୍ଥ୍ୟ ମନ୍ତ୍ରାଳୟର ଅତିରିକ୍ତ ସଚିବ ବୋଲି ପରିଚୟ ଦେଇ ଏମ୍ସ କିମ୍ବା ଇଫ୍କୋରେ ଚାକିରି କରାଇଦେବାକୁ କହି ବିଭିନ୍ନ ପର୍ଯ୍ୟାୟରେ ୧୨ ଲକ୍ଷ ୯୨ ହଜାର ଟଙ୍କା ନେଇ ଠକିଥିଲେ। ଗଣମାଧ୍ୟମରେ ରମେଶଙ୍କ କଳାକାରନାମା ଜାଣିବା ପରେ ସଞ୍ଜୟ ଶନିବାର ଥାନାରେ ଅଭିଯୋଗ କରିଥିଲେ। ତେବେ ଏହି ମାମଲାରେ ଅଧିକ ତଦନ୍ତ ପାଇଁ ରମେଶଙ୍କୁ ଆଉଥରେ ରିମାଣ୍ଡରେ ଆଣିବାକୁ କୋର୍ଟରେ ଆବେଦନ କରାଯିବ ବୋଲି ତଦନ୍ତକାରୀ ଅଫିସର ବିଜୟ ଦାସ କହିଛନ୍ତିି।
ଅଭିଯୁକ୍ତ ରମେଶ ବିଭିନ୍ନ ମାଟ୍ରିମୋନିଆଲ୍ ସାଇଟ୍ ଏବଂ ସୋସିଆଲ୍ ମିଡିଆରୁ ଉଚ୍ଚଶିକ୍ଷିତା ମହିଳାଙ୍କ ସହିତ ସମ୍ପର୍କ ଯୋଡ଼ିବା ସହ ମିଥ୍ୟା ପରିଚୟ ଓ ପ୍ରତିଶ୍ରୁତି ଦେଇ ଫସାଇ ବିବାହ କରୁଥିଲେ। ବିଶେଷକରି ଏକୁଟିଆ ରହୁଥିବା ମଧ୍ୟବୟସ୍କା ମହିଳାଙ୍କୁ ସେ ଟାର୍ଗେଟ କରୁଥିଲେ। ଏହାପରେ ସୁବିଧା ଦେଖି ଟଙ୍କା, ସୁନା ଓ ସମ୍ପତ୍ତି ଲୁଟୁଥିଲେ। ତେବେ ରମେଶଙ୍କ ଦ୍ୱାରା ପ୍ରତାରଣାର ଶିକାର ହୋଇଥିବା ଦିଲ୍ଲୀର ଜଣେ ମହିଳା ଗତବର୍ଷ ଜୁଲାଇରେ ଭୁବନେଶ୍ୱର ମହିଳା ଥାନାରେ ଅଭିଯୋଗ କରିବା ପରେ କମିଶନରେଟ ପୋଲିସ ତାଙ୍କୁ ଗିରଫ କରିଥିଲା। ତେବେ ତଦନ୍ତବେଳେ ତାଙ୍କର ଚାକିରି ଓ ନାମଲେଖା ଠକେଇ ପଦାକୁ ଆସିଥିଲା।
