ଢେଙ୍କାନାଳ ଅଫିସ,୨୫।୪: ଓଡ଼ିଶାର ଜାଲ୍ ସାର୍ଟିଫିକେଟ ଚେର ଢେଙ୍କାନାଳକୁ ଲମ୍ବିଛି। ଏହା ସ୍ପଷ୍ଟ ହେବାପରେ ଡାକ ବିଭାଗ ପକ୍ଷରୁ ତନାଘନା ଆରମ୍ଭ ହୋଇଛି। ଏ ସଂକ୍ରାନ୍ତରେ ବିଧିବଦ୍ଧ ଯାଞ୍ଚ ପାଇଁ ଟାଉନ ଥାନାରେ ଅଭିଯୋଗ କରାଯାଇଥିବାବେଳେ ବୋର୍ଡ ଉତ୍ତରକୁ ଅପେକ୍ଷା କରାଯାଇଥିବା ଜଣାପଡ଼ିଛି।
ଜିଲା ଡାକମଣ୍ଡଳରେ ଗ୍ରାମାଞ୍ଚଳ ଶାଖା ପୋଷ୍ଟମାଷ୍ଟର ପଦବୀ ପାଇଁ ବହୁ ଆଶାୟୀ ପ୍ରାର୍ଥୀ ଓଡ଼ିଶା ଏବଂ ଉତ୍ତରପ୍ରଦେଶ ବୋର୍ଡର ମାଟ୍ରିକ୍ ସାର୍ଟିଫିକେଟ୍ ପ୍ରଦାନ କରିଛନ୍ତି। ସେମାନଙ୍କ ମଧ୍ୟରୁ ଅନେକେ ସନ୍ଦେହ ଘେରକୁ ଆସିଛନ୍ତି। ବିଶେଷ କରି ଉତ୍ତରପ୍ରଦେଶ ବୋର୍ଡ ସାର୍ଟିଫିକେଟ ପ୍ରଦାନ କରିଥିବା ପ୍ରାର୍ଥୀଙ୍କ ମାର୍କ, ସେମାନେ ଦାଖଲ କରିଥିବା ପ୍ରମାଣପତ୍ର ଯାଞ୍ଚ କରାଯାଉଛି। ଏ ସମ୍ପର୍କରେ ଯାଞ୍ଚ ପାଇଁ ଡାକମଣ୍ଡଳ ପକ୍ଷରୁ ଟାଉନ ଥାନାରେ ଅଭିଯୋଗ କରାଯିବା ସହ ଜିଲା ଶିକ୍ଷାଧିକାରୀଙ୍କୁ ଏହାର ନକଲ ପ୍ରଦାନ କରାଯାଇଛି। ଓଡ଼ିଶା ବୋର୍ଡ ଏବଂ ଉତ୍ତରପ୍ରଦେଶ ବୋର୍ଡ କର୍ତ୍ତୃପକ୍ଷଙ୍କୁ ଏ ସମ୍ପର୍କିତ ତଥ୍ୟ ମଗାଯାଇଥିଲେ ସୁଦ୍ଧା ଏହାର ଉତ୍ତର ଅଦ୍ୟାବଧି ମିଳି ନ ଥିବା ଜଣାପଡ଼ିଛି। ଉତ୍ତରପ୍ରଦେଶରେ ବୋର୍ଡର ଆଞ୍ଚଳିକ କର୍ତ୍ତୃପକ୍ଷଙ୍କୁ ମଧ୍ୟ ଏ ସମ୍ପର୍କରେ ଯାଞ୍ଚ କରିବା ପାଇଁ ଡାକମଣ୍ଡଳ ପକ୍ଷରୁ ଲିଖିତ ଭାବେ ଜଣାଯାଇଛି। ସାର୍ଟିଫିକେଟ ଯାଞ୍ଚ ହୋଇପାରି ନ ଥିବାରୁ ଆଶାୟୀ ପ୍ରାର୍ଥୀଙ୍କୁ ନିଯୁକ୍ତିପତ୍ର ପ୍ରଦାନ କରାଯାଇନାହିଁ।
ଏ ସଂକ୍ରାନ୍ତରେ ଢେଙ୍କାନାଳ ଡାକମଣ୍ଡଳ (ଢେଙ୍କାନାଳ-ଅନୁଗୋଳ ଜିଲା) ଅଧୀକ୍ଷକ ଜଗଦୀଶ ଦାଶ କୁହନ୍ତି, ଗ୍ରାମାଞ୍ଚଳ ଶାଖା ପୋଷ୍ଟ ମାଷ୍ଟର ପଦବୀ ପାଇଁ ଚୟନ ହୋଇଥିବା ପ୍ରାର୍ଥୀମାନେ ଉତ୍ତରପ୍ରଦେଶ ବୋର୍ଡ ଓ ଓଡ଼ିଶା ବୋର୍ଡର ମାଟ୍ରିକ ସାର୍ଟିଫିକେଟ୍ ପ୍ରଦାନ କରିଛନ୍ତି। ସେମାନଙ୍କ ମଧ୍ୟରୁ କେତେକଙ୍କ ଉପରେ ସନ୍ଦେହ ଉପୁଜୁଛି। ତେଣୁ ଅଦ୍ୟାବଧି ନିଯୁକ୍ତି ପ୍ରକ୍ରିୟା ସମ୍ପୂର୍ଣ୍ଣ ହୋଇନାହିଁ। ଜଣେ ପ୍ରାର୍ଥୀ ଦୁଇଟି ରାଜ୍ୟର ବୋର୍ଡ ସାର୍ଟିଫିକେଟ ପ୍ରଦାନ କରିପାରିବେ କି ନାହିଁ, ସେ ସମ୍ପର୍କରେ କ’ଣ ନିୟମ ରହିଛି ତାହା ଜାଣିବା ପାଇଁ ଓଡ଼ିଶା ବୋର୍ଡ କର୍ତ୍ତୃପକ୍ଷଙ୍କୁ ତଥ୍ୟ ମଗାଯାଇଛି। ତାହା ହସ୍ତଗତ ହୋଇନାହିଁ। ଘଟଣାର ଯାଞ୍ଚ ପାଇଁ ଟାଉନ ଥାନାରେ ଲିଖିତ ଭାବରେ ଜଣାଇଛୁ ବୋଲି ଡାକମଣ୍ଡଳ ଅଧୀକ୍ଷକ ସୂଚନା ଦେଇଛନ୍ତି। ଏ ସମ୍ପର୍କରେ ଟାଉନ ଥାନାଧିକାରୀ ରାଜେନ୍ଦ୍ର ମହାପାତ୍ର କୁହନ୍ତି,ଅଭିଯୋଗ ପାଇଛୁ। ଖୁବଶୀଘ୍ର ମାମଲା ରୁଜୁ ହେବ।
