ପୁରୀ,୧୭ା୮(ଅଜିତ ମହାନ୍ତି)ପୁରୀ ତାଳବଣିଆସ୍ଥିତ ଇନ୍ଡୋର ଷ୍ଟାଡିୟମରେ ଜିଲାସ୍ତରୀୟ ୭୭ତମ ସ୍ବାଧୀନତା ଦିବସ ସମାରୋହ ଅବସରରେ ମଙ୍ଗଳବାର ଜଣେ ନକଲି ଆର୍ମି ଅଫିସରଙ୍କୁ ପୋଲିସ ଗିରଫ କରିଛି। ସେ ଆର୍ମି ପାରା କମାଣ୍ଡୋ ବେଶରେ ସମାରୋହ ସ୍ଥଳକୁ ଆସିଥିଲେ। ଗିରଫ ହୋଇଥିବା ନକଲି ପାରା କମାଣ୍ଡୋ ହେଲେ ପୁରୀ କୁମ୍ଭାରପଡ଼ା ଥାନା ଅନ୍ତର୍ଗତ ଅବକାଶ ଲେନ୍ର ସୁନୀଲ କୁମାର ଦାସ(୨୨)। ପୋଲିସ ତାଙ୍କଠାରୁ ଆର୍ମି ପୋଷାକ ସହ ବିଭିନ୍ନ ନ୍ୟାଶନାଲ ଏମ୍ବ୍ଲେମ୍, ଅନ୍ୟାନ୍ୟ ମନୋଗ୍ରାମ ସହ ଗୋଟିଏ ମୋବାଇଲ ଜବତ କରିଛି। ଏନେଇ କୁମ୍ଭାରପଡ଼ା ଥାନା ପୋଲିସ ଏକ କେସ୍ (ନଂ. ୨୦୮/୨୩) ରୁଜୁ କରିଛି। କଡ଼ା ସୁରକ୍ଷା ବଳୟ ମଧ୍ୟରେ କିପରି ଏହି ଘଟଣା ଘଟିଲା ତାହା ସାଧାରଣରେ ପ୍ରଶ୍ନ ହୋଇଛି।
ସୂଚନା ଅନୁଯାୟୀ, ତାଳବଣିଆସ୍ଥିତ ଷ୍ଟାଡିୟମରେ କଡ଼ା ସୁରକ୍ଷା ବଳୟ ମଧ୍ୟରେ ଜିଲାସ୍ତରୀୟ ୭୭ତମ ସ୍ବାଧୀନତା ଦିବସ ପାଳନ କରାଯାଉଥିଲା। ଜଣେ ଯୁବକ ଆର୍ମି କମାଣ୍ଡୋ ପୋଷାକ ପିିନ୍ଧି ପ୍ରଶାସନ ପକ୍ଷରୁ କରାଯାଇଥିବା ଭିଆଇପି ଜୋନରେ ନିମନ୍ତ୍ରିତ ଅତିଥିମାନଙ୍କ ଚେୟାରରେ ବସିଥିବା ଦେଖିବାକୁ ମିଳିଥିଲା। ତେବେ ତାଙ୍କ ବେଶପୋଷାକ ଓ ଚାଲିଚଳଣ ଦେଖି ସନ୍ଦେହ ସୃଷ୍ଟି ହେବାରୁ ପୋଲିସକୁ ଅବଗତ କରାଯାଇଥିଲା। ପୋଲିସ ଅଧିକାରୀ ସମ୍ପୃକ୍ତ ଯୁବକଙ୍କୁ ପଚରାଉଚରା କରିବାରୁ ସେ ନକଲି ବେଶପୋଷାକ ପିନ୍ଧି ଆସିଥିବା ସ୍ବୀକାର କରିଥିଲେ। ଦେଶ ମାତୃତ୍ୱକୁ ଭଲପାଇବା ସହ ପାରା କମାଣ୍ଡୋ ହେବାକୁ ଇଚ୍ଛା ରହିଥିବାରୁ ଏଭଳି ବେଶ ହୋଇ ଆସିଥିବା ସେ କହିଥିଲେ। ତେବେ ତାଙ୍କର ଏପରି ବୟାନକୁ ଗ୍ରହଣ ନ କରି ଅତିରିକ୍ତ ଏସ୍ପି, ସିଟି ଡିଏସ୍ପି ପ୍ରମୁଖ ସମ୍ପୃକ୍ତ ଯୁବକଙ୍କୁ ଧରି ସମୁଦ୍ରକୂଳ ଥାନାକୁ ନେଇଥିଲେ। ଥାନାର ଏସ୍ଆଇଙ୍କ ଅଭିଯୋଗ କ୍ରମେ ପୋଲିସ ଏକ ମାମଲା (୨୦୯/୨୩) ରୁଜୁ କରି ତାଙ୍କୁ ଗିରଫ ପରେ ବୁଧବାର କୋର୍ଟ ଚାଲାଣ କରିଛି। ଅପରପକ୍ଷରେ ତାଳବଣିଆ ଇନ୍ଡୋର ଷ୍ଟାଡିୟମ ପରେଡ ଗ୍ରାଉଣ୍ଡରେ କଡ଼ା ସୁରକ୍ଷା ବ୍ୟବସ୍ଥା ସତ୍ତ୍ୱେ ଏହି ଯୁବକ କିଭଳି ନକଲି ଆର୍ମି ପୋଷାକ ପିନ୍ଧି ପଡ଼ିଆକୁ ପ୍ରବେଶ କଲେ ସେନେଇ ସାଧାରଣରେ ପ୍ରଶ୍ନ ଉଠିଛି।
