ନୂଆଦିଲ୍ଲୀ,୧୭।୨: ଦକ୍ଷିଣ ଆଫ୍ରିକାର କିମ୍ବଦନ୍ତୀ ବ୍ୟାଟ୍ସମ୍ୟାନ୍ ତଥା ପୂର୍ବତନ ଅଧିନାୟକ ଫାଫ୍ ଡୁ ପ୍ଲେସିସ୍ ବୁଧବାର ଟେଷ୍ଟ କ୍ରିକେଟରୁ ସନ୍ୟାସ ଘୋଷଣା କରିଛନ୍ତି। ୩୬ ବର୍ଷୀୟ ଏହି କ୍ରିକେଟର ନିଜ ଦେଶ ପାଇଁ ୬୯ ଟେଷ୍ଟ ମ୍ୟାଚ୍ ଖେଳିଥିଲେ। ଏଥିରେ ସେ ହାରାହାରି ୪୦.୦୩ରେ ୪୧୬୩ରନ୍ ସ୍କୋର କରିଥିଲେ, ଯେଉଁଥିରେ ୧୦ ଶତକ ଏବଂ ୨୧ ଅର୍ଦ୍ଧଶତକ ରହିଛି। ତେବେ ଡୁ ପ୍ଲେସିସ୍ ଏକ ଇନ୍ଷ୍ଟାଗ୍ରାମ ପୋଷ୍ଟ ମାଧ୍ୟମରେ ଏନେଇ ସୂଚନା ଦେଇଛନ୍ତି।
View this post on Instagram
ଦୀର୍ଘ ୮ ବର୍ଷ ଧରି ଡୁ ପ୍ଲେସିସ୍ଙ୍କ ଟେଷ୍ଟ କ୍ୟାରିୟର ଚାଲିଥିଲା। ସେ ନଭେମ୍ବର ୨୦୧୨ରେ ଅଷ୍ଟ୍ରେଲିଆ ବିପକ୍ଷରେ ଆଡିଲେଡ୍ରେ ନିଜର ଟେଷ୍ଟ ଡେବ୍ୟୁ କରିଥିଲେ। ଚଳିତ ମାସରେ ରାଓ୍ବଲପିଣ୍ଡିରେ ପାକିସ୍ତାନ ବିପକ୍ଷରେ ସେ ତାଙ୍କର ଶେଷ ଟେଷ୍ଟ ମ୍ୟାଚ୍ ଖେଳିଥିଲେ। ପାକିସ୍ତାନ ଗସ୍ତରେ ଏହି ଡାହାଣହାତୀ ବ୍ୟାଟ୍ସମ୍ୟାନଙ୍କ ପ୍ରଦର୍ଶନ ଅତ୍ୟନ୍ତ ନୈରାଶ୍ୟଜନକ ଥିଲା। ସେ ୨ ଯେଷ୍ଟରେ ମାତ୍ର ୫୫ ରନ୍ କରିଥିଲେ।
ବ୍ୟାଟ୍ସମ୍ୟାନ୍ ବ୍ୟତିତ ଅଧିନାୟକତ୍ୱରେ ଡୁ ପ୍ଲେସିସ୍ଙ୍କ ଭଲ ରେକର୍ଡ ରହିଛି। ତାଙ୍କ ଅଧିନାୟକତ୍ୱରେ ଦକ୍ଷିଣ ଆଫ୍ରିକା ୩୬ ଟେଷ୍ଟ ମ୍ୟାଚ୍ ଖେଳିଥିଲା। ଏଥିରୁ ୧୮ ମୁକାବିଲା ଦଳ ଜିତିଥିଲା। ଗତବର୍ଷ ଟେଷ୍ଟ ଏବଂ ଟି୨୦ ଟିମ୍ର ଅଧିନାୟକ ପଦକୁ ସେ ତତ୍କାଳ ପ୍ରଭାବ ପକାଇ ଛାଡ଼ିଥିଲେ। ତାଙ୍କୁ ଦିନିକିଆ ଅଧିନାୟକ ପଦରୁ ହଟାଯିବା ପରେ ସେ ଏଭଳି ନିଷ୍ପତ୍ତି ନେଇଥିଲେ।
