ପ୍ୟୋଙ୍ଗ୍ୟାଙ୍ଗ,୬ା୩: ଉତ୍ତର କୋରିଆ ଶନିବାର ଏକ ବାଲାଷ୍ଟିକ କ୍ଷେପଣାସ୍ତ୍ର ପରୀକ୍ଷା ପରେ ରବିବାର ପୁଣି ଏକ ଗୁରୁତ୍ୱପୂର୍ଣ୍ଣ ସ୍ପାଇ ସାଟେଲାଇଟ୍ ପରୀକ୍ଷା କରିଛି। ଏନେଇ ଏହାର ପଡ଼ୋଶୀ ଦେଶ ପୁଣି ଥରେ ଅସନ୍ତୋଷ ବ୍ୟକ୍ତ କରିଛନ୍ତି। ଉତ୍ତର କୋରିଆ କହିଛି, ଏଥର ଏହା ଏକ ଗୁରୁତ୍ୱପୂର୍ଣ୍ଣ ଅନୁସନ୍ଧାନ ଉପଗ୍ରହ (ସ୍ପାଇ ସାଟେଲାଇଟ୍) ପରୀକ୍ଷା କରିଛି। ଚଳିତ ବର୍ଷ ଉତ୍ତର କୋରିଆ ଦ୍ୱାରା ଏହା ହେଉଛି ନବମ ପରୀକ୍ଷା। ଏହି ପରୀକ୍ଷଣ ପରେ କୋରିଆ ଉପଦ୍ୱୀପର ଦେଶଗୁଡ଼ିକର ଚିନ୍ତା ବଢ଼ିଯାଇଛି।
ଉତ୍ତର କୋରିଆର ଏହି ପରୀକ୍ଷଣକୁ ଆମେରିକା, ଦକ୍ଷିଣ କୋରିଆ ଏବଂ ଜାପାନ ଦୃଢ଼ ନିନ୍ଦା କରିଛନ୍ତି। ଏହି ଦେଶଗୁଡ଼ିକ ମତରେ, ଉତ୍ତର କୋରିଆ ଆଗାମୀ ସମୟରେ ପ୍ରମୁଖ ଅସ୍ତ୍ରଶସ୍ତ୍ର ପରୀକ୍ଷା କରିବାକୁ ପ୍ରସ୍ତୁତ ହେଉଛି। ଏହି ଦେଶଗୁଡିକ କହିଛନ୍ତି, ଉତ୍ତର କୋରିଆର ପରୀକ୍ଷା ହେଉଛି ମିଳିତ ଜାତିସଂଘ ସୁରକ୍ଷା ପରିଷଦର ନିଷ୍ପତ୍ତିକୁ ସିଧାସଳଖ ଉଲ୍ଲଂଘନ।
ଚଳିତ ବର୍ଷ ଜାନୁୟାରୀରେ ଉତ୍ତର କୋରିଆ ରେକର୍ଡ ସଂଖ୍ୟକ କ୍ଷେପଣାସ୍ତ୍ର ପରୀକ୍ଷଣ କରିଥିଲା। ୨୦୧୭ ପରେ ଉତ୍ତର କୋରିଆ କହିଛି, ଏହା ଦୀର୍ଘତମ ଦୂରଗାମୀ କ୍ଷେପଣାସ୍ତ୍ର (ଆଇସିବିଏମ)ର ପରୀକ୍ଷଣ ଆରମ୍ଭ କରିଛି।
ଅନ୍ୟପକ୍ଷରେ ଦକ୍ଷିଣ କୋରିଆରେ ରାଷ୍ଟ୍ରପତି ନିର୍ବାଚନ ହେବାକୁ ଥିବାବେଳେ ଏହି ପରୀକ୍ଷା ଉତ୍ତର କୋରିଆ ଦ୍ୱାରା କରାଯାଉଛି।
ଉତ୍ତର କୋରିଆ ନିକଟ ଭବିଷ୍ୟତରେ ଏହାର ସ୍ପାଇ ସାଟେଲାଇଟ୍କୁ କକ୍ଷପଥରେ ଉତ୍କ୍ଷେପଣ କରିବାକୁ ଚେଷ୍ଟା କରୁଛି। ଦକ୍ଷିଣ କୋରିଆର ଶାସକ ଦଳର ପ୍ରାର୍ଥୀ ଲି ଜେ-ମ୍ୟୁଙ୍ଗଙ୍କ ବୈଦେଶିକ ନୀତିର ଉପଦେଷ୍ଟା ଲି ଜୋଙ୍ଗ-ସେକ୍ କହିଛନ୍ତି, ଆଇସିବିଏମ ଲଞ୍ଚ୍ କରିବା ପାଇଁ ବ୍ୟବହୃତ ହେଉଥିବା ଟେକ୍ନୋଲୋଜି ହେତୁ ଯେକୌଣସି ଉପଗ୍ରହ ଉତ୍କ୍ଷେପଣର ଭୟଙ୍କର ପରିଣାମ ହେବ।
