ଆଦିସ୍ ଅବା,୨୪।୧୨: ଆଫ୍ରିକାର ଇଥୋପିଆରେ ବନ୍ଧୁକଧାରୀଙ୍କ ଆଖିବୁଜା ଗୁଳି ମାଡ଼ରେ ୧୦୦ରୁ ଅଧିକ ଜଣଙ୍କ ମୃତ୍ୟୁ ଘଟିଛି। ବୁଲେନ କାଉଣ୍ଟିର ବେକୋଜି ଗାଁରେ ଏଭଳି ଅଭାବନୀୟ ଘଟଣା ଘଟିଥିବା ମାନବାଧିକାର ଆୟୋଗ ପକ୍ଷରୁ ସୂଚନା ଦିଆଯାଇଛି। ଏହି ଘଟଣା ପରେ ଗ୍ରାମବାସୀ ଜୀବନ ଭୟରେ ଗାଁ ଛାଡ଼ି ସୁରକ୍ଷିତ ସ୍ଥାନକୁ ପଳାଇ ଯାଉଥିବା ସ୍ଥାନୀୟ ପ୍ରଶାସନ ପକ୍ଷରୁ କୁହାଯାଇଛି। ୨୦୧୮ରେ ପ୍ରଧାନମନ୍ତ୍ରୀ ଆବିୟ ଅହମ୍ମଦ କ୍ଷମତାକୁ ଆସିବା ପରେ ଏଭଳି ହିଂସା ବଢ଼ିବାରେ ଲାଗିଛି। ପ୍ରଧାନମନ୍ତ୍ରୀଙ୍କ ଲୋକତାନ୍ତ୍ରିକ ସୁଧାର ଯୋଗୁ ବିରୋଧୀ ଦଳଙ୍କ କ୍ଷମତା ହ୍ରାସ ପାଇଥିବାରୁ ଏଭଳି ସ୍ଥିତି ସୃଷ୍ଟି ହେବାରେ ଲାଗିଛି। ଗତ ୬ ସପ୍ତାହ ଧରି ଇଥୋପିଆରେ ସୈନ୍ୟ ବାହିନୀ ଏବଂ ବିଦ୍ରୋହୀଙ୍କ ମଧ୍ୟରେ ସଂଘର୍ଷ ଜାରି ରହିଛି। ଏହାଯୋଗୁ ସାଧାରଣ ଲୋକଙ୍କ ମଧ୍ୟରେ ଆତଙ୍କ ଦେଇଛି। ଏହି ସଂଘର୍ଷ ଯୋଗୁ ଇତିମଧ୍ୟରେ ୯ଲକ୍ଷ ୫୦ ହଜାର ଲୋକ ଭିଟାମାଟି ଛାଡ଼ିଥିବା କୁହାଯାଉଛି।
