ପୁରୀ ଅଫିସ,୬ା୮: ସରକାରୀ ସ୍ବାସ୍ଥ୍ୟକେନ୍ଦ୍ରରେ ଅସ୍ତ୍ରୋପଚାର ଓ ଚିକିତ୍ସା ସୁବିଧା ଥିବା ସତ୍ତ୍ବେ ରୋଗୀଙ୍କୁ ଘରୋଇ କ୍ଲିିନିକ୍ରେ ଅପରେଶନ୍ ପାଇଁ ଡାକ୍ତର ବାଧ୍ୟ କରୁଛନ୍ତି। ଏଭଳି ଭାବେ ରୋଗୀଙ୍କୁ ଶୋଷଣ କରାଯାଉଛି। ପୁରୀ ପେଣ୍ଠକଟାର ହରେକୃଷ୍ଣ ସରାବ ଏହି ଅଭିଯୋଗ ଆଣି କାର୍ଯ୍ୟାନୁଷ୍ଠାନ ଦାବି କରିଛନ୍ତି। ସରାବ କହିଛନ୍ତି ଯେ, ଗୁରୁବାର ସେ ପୁରୀ ଜିଲା ମୁଖ୍ୟ ଚିକିତ୍ସାଳୟକୁ ଯାଇ ହାର୍ନିଆ ସମସ୍ୟା ସମ୍ପର୍କରେ ଡାକ୍ତରଙ୍କୁ ଜଣାଇଥିଲେ। ଅସ୍ତ୍ରୋପଚାର ହେବ ବୋଲି ଡାକ୍ତର ତାଙ୍କୁ କହିଥିଲେ। ଏହାପରେ ସେ ଅସ୍ତ୍ରୋପଚାର ପାଇଁ ଆଗ୍ରହୀ ଥିବା ଜଣାଇଥିଲେ ମଧ୍ୟ ଡାକ୍ତର ତାଙ୍କୁ ଘରୋଇ କ୍ଲିନିକ୍ରେ ଅସ୍ତ୍ରୋପଚାର ଅଧିକ ସୁରକ୍ଷିତ ବୋଲି କହି ସେଠାକୁ ଯିବାକୁ ପ୍ରବର୍ତ୍ତାଇ ଥିଲେ। ଏଥିଲାଗି ତାଙ୍କୁ ୨୦ରୁ ୨୫ ହଜାର ଟଙ୍କା ଖର୍ଚ୍ଚ ହେବ ବୋଲି କହିଥିଲେ। ମାତ୍ର ତାଙ୍କ ପାଖରେ ଏତେ ଅର୍ଥ ନ ଥିବା କହିବାରୁ ଚିକିତ୍ସା ବାବଦ ଅର୍ଥ କମ୍ କରାଯିବ ବୋଲି ପ୍ରତିଶ୍ରୁତି ଦେଇଥିଲେ। ସେହିଭଳି ଦୁଇ ଦିନ ତଳେ ଭୀମସେନ ରାଉତଙ୍କୁ ନେଇ ତାଙ୍କ ପୁତ୍ର ବିଭୂତି ଭୂଷଣ ଜିଲା ମୁଖ୍ୟ ଚିକିତ୍ସାଳୟକୁ ଯାଇଥିଲେ। ଡାକ୍ତର ମଧ୍ୟ ତାଙ୍କୁ ଘରୋଇ କ୍ଲିନ୍ିକ ଯିବାକୁ କହିଥିଲେ। ବିଭୂତି କହିଛନ୍ତି, ସେ ମୁଖ୍ୟ ଚିକିତ୍ସାଳୟରେ ଆଡମିଶନ ହୋଇଥିଲେ। ମାତ୍ର ପରେ ତାଙ୍କୁ ପରେ ଘରୋଇ କ୍ଲିନିକ୍ରେ ଅସ୍ତ୍ରୋପଚାର କରିବା ପାଇଁ ବାଧ୍ୟ କରିଥିଲେ। ମାତ୍ର ସେ ଡାକ୍ତରଙ୍କୁ ମନା କରି ଫେରିଥିଲେ। ପରେ କିନ୍ତୁ ତାଙ୍କୁ ଫୋନ୍ କରି କମ୍ ଖର୍ଚ୍ଚରେ ଘରୋଇ ହସ୍ପିଟାଲ ଯିବାକୁ ଡାକ୍ତର ପ୍ରବର୍ତ୍ତାଇଥିଲେ। ସୂଚନା ଅଧିକାର କର୍ମୀ ବିଶ୍ୱଜିତ ମହାନ୍ତି କହିଛନ୍ତି, ଜିଲା ମୁଖ୍ୟ ଚିକିତ୍ସାଳୟରେ ହାର୍ନିଆ ଭଳି ଛୋଟ ଅସ୍ତ୍ରୋପଚାର ନ ହେବା ଦୁର୍ଭାଗ୍ୟଜନକ ପ୍ରସଙ୍ଗ। ଏହାର ଫାଇଦା ଉଠାଇ ଡାକ୍ତରମାନେ ରୋଗୀଙ୍କୁ ଘରୋଇ କ୍ଲିନିକ୍କୁ ଯିବାକୁ ବାଧ୍ୟ କରୁଛନ୍ତି। ଏନେଇ ସିଡିଏମ୍ଓଙ୍କୁ ସୂଚନା ନାହିଁ ବୋଲି କହିବା ଭୁଲ ହେବ। କେବଳ ସେବା ମନୋଭାବ ରହିଲେ ଏହି ସମସ୍ୟାର ସମାଧାନ ହୋଇପାରିବ। ଅନ୍ୟପକ୍ଷରେ ଏ ନେଇ ଜିଲା ମୁଖ୍ୟ ଚିକିତ୍ସାଧିକାରୀ ସୁଜାତା ମିଶ୍ର କହିଛନ୍ତି, କୋଭିଡ୍ ଯୋଗୁ ବୈଦ୍ୟୁତିକ ପଦ୍ଧତିର ବ୍ୟବହାର ହେଉଥିବା ସବୁ ଅସ୍ତ୍ରୋପଚାର ଏବେ ବନ୍ଦ ରହିଛି। ଜଣେ ମାତ୍ର ଟେକ୍ନିସିଆନ୍ ଥିବାରୁ ଅସ୍ତ୍ରୋପଚାର କରାଯାଇପାରୁନାହିଁ। ଅତି ଜରୁରିକାଳୀନ ସ୍ଥିତିରେ ଅପରେଶନ୍ କରୁଛୁ। ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା ମାଧ୍ୟମରେ ରୋଗୀଙ୍କୁ ଘରୋଇ ଡାକ୍ତରଖାନାକୁ ରେଫର୍ କରାଯାଉଛି। ତେବେ ଡାକ୍ତର ଜାଣିଶୁଣି ଡିସ୍ଚାର୍ଜ କରିବା ପରେ ଘରୋଇ କ୍ଲିନିକ୍କୁ ଡାକୁଛନ୍ତି କାହିଁକି ବୋଲି ପଚାରିବାରୁ ସିଡିଏମ୍ଓ ମିଶ୍ର କହିଛନ୍ତି, ଏଭଳି ହୋଇଥିବା ଅଭିଯୋଗ ସମ୍ପର୍କରେ ସୋସିଆଲ୍ ମିଡ଼ିଆରୁ ଶୁଣିବାକୁ ପାଇଛି। ଏ ନେଇ ତଦନ୍ତ ନିର୍ଦ୍ଦେଶ ଦିଆଯାଇଛି। ଅଭିଯୋଗରେ ସତ୍ୟାସତ୍ୟ ଥିବା ଜଣାପଡ଼ିଲେ ବିଭାଗୀୟ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
