ଭୁବନେଶ୍ୱର,୧୧ା୯(ବ୍ୟୁରୋ): କରୋନା କବଳରୁ ମୁକ୍ତି ପାଇବା ପାଇଁ ଟିକା ହେଉଛି ଏକମାତ୍ର ଭରସା। ମାତ୍ର ଟିକା ଯଦି କାମ କରିବନି ତେବେ ମଣିଷ ଜୀବନଧାରଣ କେମିତି କରିବ ବୋଲି ଅନେକ ପ୍ରଶ୍ନ ମନରେ ଉଙ୍କି ମାରୁଛି।
ଏକ ଗବେଷଣାରୁ ଜଣାପଡ଼ିଛି, ୨୦% ଲୋକଙ୍କ ଶରୀରରେ ଟିକା କାମ କରୁନାହିଁ। ଆଇଏଲ୍ଏସ୍ ନିର୍ଦ୍ଦେଶକ ଡା. ଅଜୟ କୁମାର ପରିଡ଼ା କହିଛନ୍ତି, ରାଜ୍ୟରେ କରୋନା ଏବେ ନିୟନ୍ତ୍ରଣାଧୀନ ଅଛି। ଟିକାକରଣ ଜୋରସୋର୍ରେ ଚାଲିଥିବାରୁ ସ୍ଥିତି ଭଲ ରହିଛି । ରାଜ୍ୟରେ ପ୍ରାୟ ୭୦-୮୦ ପ୍ରତିଶତ ଲୋକଙ୍କ ଦେହରେ ଟିକା କାମ କରୁଛି । ମାତ୍ର ୨୦% ଲୋକଙ୍କ କ୍ଷେତ୍ରରେ ଟିକା ସେତେଟା ପ୍ରଭାବ ପକାଉନି। ଜେନ୍ମ ସିକ୍ୟୁଏନ୍ସିଂ ବିଶ୍ଳେଷଣରୁ ଏହା ଜଣାପଡ଼ିଛି । ଡବଲ ଡୋଜ୍ ପରେ ତୃତୀୟ କି ବୁଷ୍ଟର ଡୋଜ୍ ଦେବା ନେଇ ଅନୁଧ୍ୟାନ ଚାଲିଛି। ସମାନ କି ଅନ୍ୟ କମ୍ପାନୀ ଟିକା ଦିଆଯିବ, ସେନେଇ ବି ବିଶ୍ଳେଷଣ ଚାଲିଛି। କିଛି ନିଷ୍ପତ୍ତି ନିଆଯାଇନାହିଁ। କିଛି ଦିନ ପରେ ଏହା ସ୍ପଷ୍ଟ ହୋଇଯିବ।
ସୂଚନାଯୋଗ୍ୟ, ଅଗଷ୍ଟରୁ ସେପ୍ଟେମ୍ବର ପ୍ରଥମ ସପ୍ତାହ ଭିତରେ ରାଜ୍ୟର ୬୦୦ ସାମ୍ପଲକୁ ଜେନମ ସିକ୍ୱେନ୍ସିଂ କରାଯାଇଥିଲା। ସେଥିମଧ୍ୟରୁ ୪୨୫ ଡେଲ୍ଟା ଭାରିଏଣ୍ଟ ବାହାରିଥିଲା । ଅନ୍ୟ ସବୁ ସାମ୍ପଲ ଅନ୍ୟ ଭାରିଏଣ୍ଟର । କୌଣସି ନୂଆ ମ୍ୟୁଟେସନ ଚିହ୍ନଟ ହୋଇନାହିଁ। ଟିକା ନେଲା ପରେ ବି ୨୦ ପ୍ରତିଶତ ଲୋକଙ୍କ ଶରୀରରେ ଆଣ୍ଟିବଡି ସୃଷ୍ଟି ହେଉନି। ଅଧିକ ସାମ୍ପଲର ଜେନମ ସିକ୍ୱେନ୍ସିଂରେ ଓଡ଼ିଶା ଦେଶରେ ୪ ନମ୍ବରରେ ରହିଛି। ଜାନୁୟାରୀରୁ ବର୍ତ୍ତମାନ ସୁଦ୍ଧା ଓଡ଼ିଶାର ୬ ହଜାର ସାମ୍ପଲ ଜେନମ ସିକ୍ୱେନ୍ସିଂ ହୋଇଛି ବୋଲି ଆଇଏଲ୍ଏସ୍ ନିର୍ଦ୍ଦେଶକ କହିଛନ୍ତି।
