ଦଶମନ୍ତପୁର, ୧୩।୯ ( ଅରବିନ୍ଦ ନାୟକ ): କୋରାପୁଟ ଜିଲା ଦଶମନ୍ତପୁର ବ୍ଲକ ବିରିଗୁଡା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଅନେକ ଅବ୍ୟବସ୍ଥା ଲାଗି ରହିଛି। ସ୍ବାସ୍ଥ୍ୟକେନ୍ଦ୍ରରେ ଜଣେ ଡାକ୍ତର ମନୋଜ କୁମାର ସ୍ବାଇଁ ନିଯୁକ୍ତି ହୋଇଥିଲେ ମଧ୍ୟ ଅଧିକାଂଶ ସମୟରେ ଛୁଟିରେ ରହୁଥିବାରୁ ଲୋକେ ଉଚିତ୍ ସ୍ବାସ୍ଥ୍ୟସେବା ପାଇ ପାରୁ ନ ଥିବା ଅଭିଯୋଗ ହୋଇଛି। ସଂପୃକ୍ତ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ସ୍ଥାୟୀ ଭାବେ ଡାକ୍ତର ନ ରହିଲେ ଆମେ ଚିକିତ୍ସାଳୟରେ ତାଲା ପକାଇ ଆନ୍ଦୋଳନ କରିବୁ ବୋଲି ଅଞ୍ଚଳବାସୀ ଚେତାବନୀ ଦେଇଛନ୍ତି। ମଙ୍ଗଳବାର ଅଞ୍ଚଳବାସୀ ସ୍ବାସ୍ଥ୍ୟକେନ୍ଦ୍ର ସମ୍ମୁଖରେ ୪ର୍ଥ ଶ୍ରେଣୀ କର୍ମଚାରୀ ଗଙ୍ଗାଧର ହେନ୍ତାଳ ଓ ସ୍ବାସ୍ଥ୍ୟକର୍ମୀ ଜୟନ୍ତୀ ସେନାପତିଙ୍କୁ ଘେରି କେବେ ଡାକ୍ତର ଆସିବେ ବୋଲି ପ୍ରଶ୍ନ କରିବାକୁ କିଛି ସମୟ ପର୍ଯ୍ୟନ୍ତ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିବା ଦେଖିବାକୁ ମିଳିଛି।
ମୁର୍କାର ପଞ୍ଚାୟତରେ ଥିବା ଟେରାଗୁଡ଼ା, ମାଲିଚେମା, କନ୍ଦୁପୁଟ, ବଡ଼ପଦା, ବିରୀଗୁଡ଼ା, ଝଲାଗୁଡ଼ା, ନାରାନଗୁଡ଼ା, ଚେଣ୍ଡିଗୁଡ଼ା ଭଳି ମୋଟ ୨୨ ଖଣ୍ଡ ଗାଁର ପ୍ରାୟ ୫ ହଜାରରୁ ଊର୍ଦ୍ଧ୍ୱ ଜନସାଧାରଣ ବିରିଗୁଡା ଉପ ସ୍ବାସ୍ଥ୍ୟକେନ୍ଦ୍ର ଉପରେ ର୍ନିଭରଶୀଳ। ତେଣୁ ଅଞ୍ଚଳବାସୀଙ୍କ ଚିକିତ୍ସା ବ୍ୟବସ୍ଥାକୁ ଆଖି ଆଗରେ ରଖି ସରକାରଙ୍କ ପକ୍ଷରୁ ଏକ ସ୍ବାସ୍ଥ୍ୟକେନ୍ଦ୍ର ସ୍ଥାପନ କରାଯାଇଛି । ହେଲେ ସଂପୃକ୍ତ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଡାକ୍ତର ନ ଥିବାରୁ କୌଣସି ଗୁରୁତର ରୋଗୀ ଆସିଲେ ସେଠାରେ କାର୍ଯ୍ୟରତ ୪ର୍ଥ କର୍ମଚାରୀ ହେନ୍ତାଳ ସ୍ବାସ୍ଥ୍ୟସେବା ଯୋଗାଇଥାନ୍ତି। ସ୍ବାସ୍ଥ୍ୟକେନ୍ଦ୍ରରେ ଡାକ୍ତର ରହୁ ନ ଥିବାରୁ ଆମେ କାହା ଭରଷାରେ ରୋଗୀଙ୍କୁ ସ୍ବାସ୍ଥ୍ୟକେନ୍ଦ୍ରକୁ ଆଣିବୁ ବୋଲି ଗ୍ରାମରଥବିର ମାଣ୍ଡିଂ, ରାଜେଶ ମାଣ୍ଡିଙ୍ଗା, କୃଷ ମାଣ୍ଡିଙ୍ଗା, ହାଡ଼ି ମାଣ୍ଡିଙ୍ଗା, ଡିଉ ହିକକାଙ୍କ ସମେତ ଗ୍ରାମବାସୀ ପ୍ରଶ୍ନ ଉଠାଇଛନ୍ତି। ଏହି ସ୍ବାସ୍ଥ୍ୟକେନ୍ଦ୍ରରେ ଏଭଳି ଅବ୍ୟବସ୍ଥା ଯୋଗୁ ରୋଗୀଙ୍କୁ ୧୮ କିମି ଦୂର ଲକ୍ଷ୍ମୀପୁର ଏବଂ ଦଶମନ୍ତପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେବାକୁ ବାଧ୍ୟ ହେଉଥିବା ଗ୍ରାମବାସୀ କହିଛନ୍ତି। ଉପ ସ୍ବାସ୍ଥ୍ୟକେନ୍ଦ୍ରଟି ସକାଳ ୮ ରୁ ୧୨ ଏବଂ ୪ ରୁ ୬ ଟା ଯାଏ ଖୋଲିବାର ନିୟମ ଥିବାବେଳେ ଜଣେ ପିଅନଙ୍କୁ ବାଦ ଦେଲେ ପ୍ରାୟତଃ ଡାକ୍ତର ଏଂ ଫାର୍ମାସିଷ୍ଟ ୧୧ଟାରେ ଆସି ଦିନ ୨ଟା ମଧ୍ୟରେ ଚାଲି ଯାଉଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। କୌଣସି ରୋଗୀ ଗୁରୁତର ହେଲେ ଆମେ ୧୮ କିମି ଦୂର ଚିକିତ୍ସାଳୟକୁ ନେଉଥିବା ସମୟରେ ଯଦି କୌଣସି ଅଘଟଣ ଘଟେ ତେବେ ଦାୟୀ କିଏ ରହିବ ବୋଲି ଗ୍ରାମବାସୀ ଶିତ୍ରୁ ମାଣ୍ଡିଙ୍ଗା, ସାରିଆ ମାଣ୍ଡିଙ୍ଗା, ଗୋବିନ୍ଦ ମାଣ୍ଡିଙ୍ଗା, ସାଲପୁ ମାଣ୍ଡିଙ୍ଗା ପ୍ରମୁଖ ଅଭିଯୋଗ କରିଛନ୍ତି। ତେବେ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଜଣେ ଡାକ୍ତର ଏଂ ଫାର୍ମାସିଷ୍ଟ ନିୟମିତ ନ ରୁହନ୍ତି ତେବେ ଆମେ ଆଗାମୀ ଦିନରେ ସ୍ବସ୍ଥ୍ୟକେନ୍ଦ୍ରରେ ତାଲା ଠୁଙ୍କି ଆନ୍ଦୋଳନ କରିବାକୁ ବାଧ୍ୟ ହେବୁ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି। ଏ ସମ୍ପର୍କରେ ସ୍ଥାନୀୟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଡାକ୍ତର ପାର୍ଥ ସାରଥୀ ପଣ୍ଡାଙ୍କୁ ଯୋଗାଯୋଗ କରିବାରୁ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
