ଓ୍ବାଶିଂଟନ୍,୧୪।୩: ଆମେରିକାରେ ଚାଇନାର ଆପ ଟିକଟକ ଉପରେ ପ୍ରତିବନ୍ଧକ ଲଗାଇବା ସପକ୍ଷରେ ମତ ଦେଇଛନ୍ତି ଆମେରିକାର ସାଂସଦ। ଅଧିକାଂଶ ସାଂସଦ ଟିକଟକ ଉପରେ ପ୍ରତିବନ୍ଧକ ଲଗାଇବା ପାଇଁ ଭାରତର ଉଦାହରଣ ଦେଇଛନ୍ତି ଏବଂ କହିଛନ୍ତି ଯେ ଜାତୀୟ ସୁରକ୍ଷାକୁ ଦୃଷ୍ଟିରେ ରଖି ଟିକଟକ ଉପରେ ଭାରତ ନିଷେଧ କରିବାକୁ ନିଷ୍ପତ୍ତି ନେଇଛି। ଆମେରିକାର କଂଗ୍ରେସର ନିମ୍ନ ସଦନ ହାଉସ୍ ଅଫ୍ ରିପ୍ରେଜେଣ୍ଟିଭ୍ସରେ ‘procting amerikans from foreign advisory control application act’ ନାମକ ଏକ ବିଲ ଉପରେ ମତଦାନ ହୋଇଥିଲା। ଏହି ବିଲ ଆମେରିକାରେ ଟିକଟକ ଇତ୍ୟାଦି ବିଦେଶୀ ଆପ ଉପରେ ପ୍ରତିବନ୍ଧକ ଲଗାଇଥାଏ।
୨୦୨୦ରେ ଭାରତ ସରକାର ଟିକଟକ ଉପରେ ମଧ୍ୟ ପ୍ରତିବନ୍ଧକ ଲଗାଇଥିଲେ। ବର୍ତ୍ତମାନ ଆମେରିକାର ସାଂସଦମାନେ ମଧ୍ୟ ଭାରତର ଉଦାହରଣ ଦର୍ଶାଇ ଏହି ବିଲ ସପକ୍ଷରେ ମତ ଦେଇଛନ୍ତି। ଆମେରିକୀୟ ସାଂସଦମାନେ କହିଛନ୍ତି ଯେ, ଟିକଟକରେ ସ୍ବଚ୍ଛତାର ଅଭାବ ରହିଛି ଏବଂ ଏହାର କାର୍ଯ୍ୟନିର୍ବାହୀମାନେ ବ୍ୟବହାରକାରୀଙ୍କ ଗୋପନୀୟତା ରକ୍ଷା କରିବାକୁ ମଧ୍ୟ ଇଚ୍ଛୁକ ନୁହଁନ୍ତି। ୟୁରୋପୀୟ ୟୁନିଅନ ଏବଂ କାନାଡାରେ ମଧ୍ୟ ଏହି ଆପର ବ୍ୟବହାର ଉପରେ ପ୍ରତିବନ୍ଧକ ଲଗାଯାଇଛି। ଆମେରିକାର କଂଗ୍ରେସ ସଦସ୍ୟ ଗ୍ରେଗ ମର୍ଫି କହିଛନ୍ତି, ଟିକଟକ ଚାଇନା ଦ୍ୱାରା ଆମେରିକାର ନାଗରିକଙ୍କ ଚିନ୍ତାଧାରା ଉପରେ ନଜର ରଖିବା ଏବଂ ବ୍ୟବହାର କରିବା ଉଦ୍ଦେଶ୍ୟରେ ବ୍ୟବହାର କରାଯାଉଛି।
ଆମେରିକା କଂଗ୍ରେସର ନିମ୍ନ ଗୃହରେ ୩୫୨ ଭୋଟ ଏହି ବିଲ ସପକ୍ଷରେ ଥିବାବେଳେ ଏହି ବିଲ ବିରୋଧରେ ୬୫ ଭୋଟ ଦିଆଯାଇଥିଲା। ବର୍ତ୍ତମାନ ଏହି ବିଲ ଆମେରିକାର ଉପର ଗୃହ ସିନେଟକୁ ଯିବ।
