ନୂଆଦିଲ୍ଲୀ,୧୪।୧୨: ୨୦୨୦ରେ ମାଓବାଦୀଙ୍କ ସହ ସମ୍ପୃକ୍ତ ମାମଲାରେ ଗିରଫ ହୋଇ ଗତବର୍ଷ ଜେଲରେ ପ୍ରାଣ ହରାଇଥିବା ୮୩ ବର୍ଷୀୟ ସାମାଜିକ କର୍ମୀ ତଥା କାଥୋଲିକ୍ ଧର୍ମଗୁରୁ ଫାଦର ଷ୍ଟାନ୍ ସ୍ବାମୀଙ୍କ କମ୍ପ୍ୟୁଟରରେ ଅନେକ ଆପରାଧିକ ଦସ୍ତାବିଜ୍ ଖଞ୍ଜାଯାଇଥିଲା। ଆମେରିକାର ଏକ ଫୋରେନ୍ସିକ୍ ସଂସ୍ଥା ଏଭଳି ରିପୋର୍ଟ କରିବା ପରେ ଜାତୀୟ ତଦନ୍ତକାରୀ ସଂସ୍ଥା (ଏନ୍ଆଇଏ)ର ଅଭିଯୋଗକୁ ନେଇ ସନ୍ଦେହ ସୃଷ୍ଟି ହୋଇଛି। ଷ୍ଟାନ୍ ସ୍ବାମୀ କୋର୍ଟରେ ଅନେକ ଥର ନିଜକୁ ନିର୍ଦ୍ଦୋଷ ଦାବି କରି ଚିକିତ୍ସା ପାଇଁ ଅନୁମତି ଦେବାକୁ ନିବେଦନ କରିଥିଲେ ମଧ୍ୟ ଭାରତୀୟ ଅଦାଲତ ତାଙ୍କୁ ଜାମିନ ଦେଇ ନ ଥିଲେ। ଫଳରେ ଆତଙ୍କବାଦ ଅଭିଯୋଗରେ ୮ ମାସ ଜେଲରେ ରହିବା ପରେ ୨୦୨୧ ଜୁଲାଇରେ ତାଙ୍କର ମୃତ୍ୟୁ ଘଟିଥିଲା। ମାସାଚୁସେଟ୍ସର ଡିଜିଟାଲ ଫୋରେନ୍ସିକ୍ ସଂସ୍ଥା ଆର୍ସେନାଲ କନ୍ସଲ୍ଟିଂ ତାଙ୍କ କମ୍ପ୍ୟୁଟରର ଏକ ଇଲେକ୍ଟ୍ରୋନିକ୍ କପିକୁ ଯାଞ୍ଚ କରିଥିଲେ। ହ୍ୟାକରମାନେ ତାଙ୍କ କମ୍ପ୍ୟୁଟରରୁ ହ୍ୟାକ୍ କରିବା ପରେ ସେଥିରେ ପ୍ରମାଣ ଖଞ୍ଜିଥିଲେ ବୋଲି ଏଥିରୁ ସ୍ପଷ୍ଟ ହୋଇଛି। ସିଭିଲ୍ ସୋସାଇଟି ଏବଂ ସମାଲୋଚକମାନଙ୍କ ମୁହଁ ବନ୍ଦ କରିଦେବା ଲାଗି ଭାରତ ସରକାର ଯେଉଁ ଦମନଲୀଳା ଚଳାଇଛନ୍ତି, ଷ୍ଟାନ୍ ସ୍ବାମୀ ଓ ତାଙ୍କ ସହଯୋଗୀମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ତାହାର ଏକ ଉଦାହରଣ ବୋଲି ଉକ୍ତ ସଂସ୍ଥା ରିପୋର୍ଟରେ କୁହାଯାଇଛି। ବେଆଇନ ମାଓବାଦୀ ସଂଗଠନ ସହ ସମ୍ପର୍କ ରଖିବା ଅଭିଯୋଗରେ ଅନେକ ସାମାଜିକ କର୍ମୀ, ଶିକ୍ଷାବିତ୍ ଓ ଆଇନଜୀବୀଙ୍କୁ ଆତଙ୍କବାଦ ନିରୋଧୀ ଆଇନରେ ଜେଲ ପଠାଯାଇଥିଲା। ନରେନ୍ଦ୍ର ମୋଦି ସରକାରଙ୍କୁ କ୍ଷମତାଚ୍ୟୁତ କରିବା ପାଇଁ ସେମାନେ ଯୋଜନା କରୁଥିବା ଅଭିଯୋଗ ହୋଇଥିଲା ଏବଂ ପ୍ରମାଣକୁ କମ୍ପ୍ୟୁଟରରେ ଖଞ୍ଜା ଯାଇଥିଲା ବୋଲି ନୂଆ ରିପୋର୍ଟରେ କୁହାଯାଇଛି।
ଅନୂ୍ୟନ ୨ ଜଣ ଅଭିଯୁକ୍ତଙ୍କ କମ୍ପ୍ୟୁଟରରେ ହ୍ୟାକରମାନେ ଜାଲିଆତି କରି ବହୁସଂଖ୍ୟାରେ ଆପରାଧିକ ଦସ୍ତାବିଜ୍ ଭରିଥିଲେ ବୋଲି ୨୦୨୧ରେ ଓ୍ବାଶିଂଟନ ପୋଷ୍ଟ ଖବର ପ୍ରକାଶ କରିଥିଲା। ଉକ୍ତ ମାଲଓ୍ବେରରେ ଅନେକଙ୍କୁ ଟାର୍ଗେଟ କରାଯାଇଥିଲା। ଇସ୍ରାଏଲ୍ର ଏନ୍ଏସ୍ଓ ଗ୍ରୁପ୍ ବିଭିନ୍ନ ସରକାର ଓ ସେମାନଙ୍କ ସଂସ୍ଥାକୁ ଯୋଗାଇଥିବା ସ୍ପାଏଓ୍ବେର୍ରେ ଉକ୍ତ ଅଭିଯୁକ୍ତମାନଙ୍କ ସମେତ ଅନେକଙ୍କୁ ଗୋଇନ୍ଦା ଟାର୍ଗେଟରେ ରଖାଯାଇଥିବା ପେଗାସସ୍ ପ୍ରୋଜେକ୍ଟ ତଦନ୍ତରୁ ଜଣାପଡ଼ିଥିଲା। ଓ୍ବାଶିଂଟନ ପୋଷ୍ଟ ଓ ଅନ୍ୟ ୧୬ଟି ନ୍ୟୁଜ୍ ସଂସ୍ଥା ପକ୍ଷରୁ ଏହି ତଦନ୍ତ କରାଯାଇଥିଲା। ତେବେ ଏନ୍ଏସ୍ଓରୁ ସ୍ପାଏଓ୍ବେର କିଣିଥିବା ଅଭିଯୋଗକୁ ଭାରତ ସରକାର ସ୍ପଷ୍ଟ କରି ନ ଥିଲେ କି ଖଣ୍ଡନ କରି ନ ଥିଲେ। ମୋଦି ସରକାରରେ ମାନବାଧିକାର ପାଇଁ ଲଢ଼େଇ କରୁଥିବା ଲୋକଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନର ଏହା ଭୟଙ୍କର ଉଦାହରଣ ବୋଲି ସିଭିଲ୍ ସୋସାଇଟି ସଂଗଠନଗୁଡ଼ିକ କହିଛନ୍ତି।
