ଖଇରା,୨୨ା୫(ଡି.ଏନ.ଏ.): ବାଲେଶ୍ୱର ଜିଲା ଅଧୀନ ଖଇରା ବ୍ଲକର ପ୍ରଥମ ୫-ଟି ରୂପାନ୍ତରଣ ସ୍କୁଲ ଭାବେ ଖଇରା ହାଇସ୍କୁଲ ଅନ୍ତର୍ଭୁକ୍ତ ହେବା ସହ ଏହା ଅଞ୍ଚଳ ପାଇଁ ଗର୍ବ ବୋଲି କୁହାଯାଉଛି। ହେଲେ ବାହାରକୁ ସ୍ମାର୍ଟ ଦେଖାଯାଉଥିବା ଏହି ସ୍କୁଲର ଭିତରକୁ ଚାହିଁଲେ ସ୍ମାର୍ଟଠାରୁ କିଛି ପଛରେ ରହି ଯାଇଛି। ଧିରେଧିରେ ଏହି ଅଭାବ ଏବେ ସାଧାରଣ ଲୋକଙ୍କ ଦୃଷ୍ଟି ଗୋଚର ହେଉଛି। ବିଶେଷ କରି ଗୁରୁବାର ପର୍ଯ୍ୟଟନ ଓ ସଂସ୍କୃତି ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀ ଏହି ବିଦ୍ୟାଳୟର ଶୌଚାଳୟ ପରିଦର୍ଶନ କରିବା ବେଳେ ଏହା ତାଙ୍କ ନଜରକୁ ଆସିଥିଲା। ଏଥିଲାଗି ସେ ବ୍ଲକ ପ୍ରଶାସନ ଉପରେ ବିରକ୍ତି ପ୍ରକାଶ କରିଥିଲେ। ୫-ଟିରେ ଅନ୍ତର୍ଭୁକ୍ତ ହେବା ପରେ ସ୍ମାର୍ଟ କ୍ଲାସ, ଲାଇବ୍ରେରୀ,ଲାବୋରେଟୋରୀ,ପାଣି ସଂଯୋଗ, ଖେଳପଡିଆ ଇତ୍ୟାଦି ସୌନ୍ଦର୍ଯ୍ୟକରଣ ପାଇଁ ୩୭ଲକ୍ଷ ମିଳିଥିବା ବେଳେ ଅନ୍ୟାନ୍ୟ ପାଣ୍ଠି ମିଶାଇ ପାଖାପାଖି ୬୦ଲକ୍ଷ ଟଙ୍କା ବ୍ୟୟ କରାଯାଇଛି। ଗତ ନଭେମ୍ବର ୧୧ତାରିଖରେ ଖୋଦ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜିଲାର ଅନ୍ୟ ବିଦ୍ୟାଳୟ ସହ ଖଇରା ବିଦ୍ୟାଳୟକୁ ଭିଡିଓ କନଫରେନ୍ସିଂ ମାଧ୍ୟମରେ ଉଦ୍ଘାଟନ କରିଥିଲେ। ହେଲେ କାମ ଆଶାନୁରୁପ ହୋଇ ନ ଥିବା ଅଭିଯୋଗ ହୋଇଛି। ଶୌଚାଳୟ ନିର୍ମାଣ ବେଳେ କାନ୍ଥ ଟାଇଲିକୁ ଚଟାଣରେ ବିଛା ଯିବା ଏବଂ ଛାତ୍ରୀଛାତ୍ରମାନେ ଭୟରେ ଶୌଚାଳୟ ନ ଯିବା ଯୋଗୁ ଆବର୍ଜନାପୂର୍ଣ୍ଣ ହୋଇ ପଡ଼ିଛି। ଯାହାକୁ ନେଇ ମନ୍ତ୍ରୀ ବ୍ଲକ ପ୍ରଶାସନ ଓ ସ୍କୁଲ କର୍ତ୍ତୃପକ୍ଷଙ୍କ ଉପରେ ଅସନ୍ତୋଷ ପ୍ରକାଶ କରିଥିଲେ। ଏବେ ଦ୍ୱିତୀୟ ପର୍ଯ୍ୟାୟରେ ୧୮ଟି ବିଦ୍ୟାଳୟ କାମ ଚାଲୁଥିବା ବେଳେ ଏହାର ସଫଳ ରୂପାୟନ ନେଇ ପ୍ରଶ୍ନ ଉଠିଛି। ନିର୍ର୍ଦ୍ଦିଷ୍ଟ ଏଜେନ୍ସିକୁ ଅନୁକମ୍ପା ପ୍ରଦର୍ଶନ କରାଯାଉଥିବାରୁ ଏହି ରୂପାନ୍ତରଣ ଲକ୍ଷ୍ୟ ଓ ଉଦ୍ଦେଶ୍ୟ ପୂରଣରେ ବାଧା ସୃଷ୍ଟି ହେଉଥିବା କିଛି ଅବିଭାବକ ଓ ସ୍କୁଲ କର୍ତ୍ତୃପକ୍ଷ ଅଭିଯୋଗ କରିଛନ୍ତି। ଏ ସମ୍ପର୍କରେ ବିଡିଓ ପର୍ଶୁରାମ ପଣ୍ଡାଙ୍କୁ ପଚାରିବାରେ ସବୁ କିଛି ସରକାରୀ ଗାଇଡ୍ଲାଇନ ଭିତରେ ହେଉଛି। କାମ କରିବା ବେଳେ କାଁଭାଁ ଭୁଲ ହେଲେ ପୁରା ଯୋଜନା ଉପରେ ପ୍ରଶ୍ନ ଉଠିବା ଯୁକ୍ତିଯୁକ୍ତ ନୁହେଁ ବୋଲି ସେ କହିଛନ୍ତି।
