ବ୍ରହ୍ମବରଦା,୨୦ା୫(ଯଯାତି କେଶରୀ ବେହେରା): ବ୍ରହ୍ମବରଦା-ଝାଲପଡ଼ା ବିଜୁ ସେତୁ କାମ ଅବଧିର ୫ ବର୍ଷ ପରେ ସରି ପାରୁନାହିଁ। ଫଳରେ ଲୋକେ ଯାତାୟାତ ପାଇଁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ନଦୀରେ ମୋଟ୍ ୮ ପିଲାର ହେବାକୁ ଥିବା ବେଳେ ଏଯାଏ ୭ ପିଲାର କାମ ସରିଛି। ଅନ୍ୟ ଗୋଟିଏ ପିଲର କାମ ବିଳମ୍ବ ହେଉଥିବା ସମ୍ପୃକ୍ତ ଠିକା ସଂସ୍ଥା ପକ୍ଷରୁ ସଫେଇ ଦିଆଯାଇଛି। ବର୍ତ୍ତମାନ ସମୟରେ ଅତ୍ୟାଧୁନିକ ଜ୍ଞାନକୌଶଳ ବ୍ୟବହାର କରାଯାଇ କାମ କରାଯାଇପରନ୍ତା। କିନ୍ତା ତାହା କରାଯାଉ ନାହିଁ। ଫଳରେ ଏହି ସେତୁକୁ ନେଇ ଜନ ଅସନ୍ତୋଷ ବଢିବାରେ ଲାଗିଛି।
ଗ୍ରାମ୍ୟ ଉନ୍ନୟନ ସଦର ଡିଭିଜନ ଏହି ସେତୁ ନିର୍ମାଣ କାର୍ଯ୍ୟ ତୁଲାଉଛି। ୧୦ କୋଟି ୪୨ଲକ୍ଷ ୩୯ ହଜାର୨୭୦ ଟଙ୍କା ବ୍ୟୟ ବରାଦରେ ୨୪ା୧୨ା୨୦୧୬ରୁ ଏହାର କାର୍ଯ୍ୟ ଆରମ୍ଭ ହୋଇଥିଲା। ୨୫ା୦୫ା୨୦୧୯ରେ କାର୍ଯ୍ୟ ଶେଷ ହେବାକୁ ସମୟ ଧାର୍ଯ୍ୟ କରାଯାଇଥିଲା। ହେଲେ ଆଜି ପର୍ଯ୍ୟନ୍ତ ତାହା ହୋଇ ପାରିନାହିଁ।
ଅନ୍ୟପକ୍ଷରେ ପୋଲ ପାଇଁ ବ୍ରହ୍ମବରଦା ପଟରୁ ଜମି ହରାଇଥିବା ମାଲିକମାନେ ଏପର୍ଯ୍ୟନ୍ତ ଜମିର ଉଚିତ ମୂଲ୍ୟ ପାଇ ପାରୁନାହାନ୍ତି। ଫଳରେ ସେମାନେ ବିଭିନ୍ନ ସମୟରେ ସେତୁ ନିର୍ମାଣ କାର୍ଯ୍ୟ ବନ୍ଦ କରାଉଥିବା କ୍ଷୋଭର ସହ ପ୍ରକାଶ କରିଛନ୍ତି। ବ୍ରହ୍ମବରଦା ଏକ ବ୍ୟବସାୟୀକ ପେଣ୍ଠସ୍ଥଳ ହୋଇଥିବାରୁ ଯାଜପୁର ବ୍ଲକ୍ର ଝାଲପଡ଼ା, ରୁଦ୍ରପୁର, ସୁଜନପୁର, ସାହାସପୁର ଏବଂ ବରୀ ବ୍ଲକ୍ର ବିଭିନ୍ନ ପଞ୍ଚାୟତର ୩୦ ହଜାରରୁ ଊର୍ଦ୍ଧ୍ୱ ଲୋକ ବ୍ରହ୍ମବରଦା ଉପରେ ନିର୍ଭର କରିଥାନ୍ତି। ହେଲେ ପୋଲ ନ ଥିବାରୁ ଲୋକେ ଖରା ଦିନରେ ବାଉଁଶ ପୋଲ ଉପରେ ନିର୍ଭର କରୁଥିବାବେଳେ ବର୍ଷା ଦିନରେ ହୁଲି ଡଙ୍ଗାକୁ ଭରସା କରୁଛନ୍ତି। କେଉଁଦିନ ନିର୍ମାଣ କାର୍ଯ୍ୟ ସମାପ୍ତ ହେବ ଓ ସୁରୁଖୁରୁରେ ଲୋକେ ଯାତାୟତ କରିବେ ତାହାକୁ ନେଇ ଅଞ୍ଚଳବାସୀଙ୍କ ମନରେ ପ୍ରଶ୍ନବାଚୀ ସୃଷ୍ଟି ହୋଇଛି। ଆଗକୁ ସାଧାରଣ ନିର୍ବାଚନ ଥିବାରୁ ଏହି ସେତୁକୁ ନେଇ ରାଜନୀତି ଜୋର ଧରିଛି। ଏ ସମ୍ପର୍କରେ ବିଭାଗୀୟ ଅଧିକାରୀଙ୍କ ପ୍ରତିକ୍ରିୟା ମିଳି ପାରିନାହିଁ। ଜିଲା ପ୍ରଶାସନ ଏ ଦିଗରେ ଦୃଷ୍ଟି ଦେଇ ତୁରନ୍ତ ସେତୁ କାର୍ଯ୍ୟ ଶେଷ କରିବାକୁ ଦାବି ହୋଇଛି।
