ନୂଆଦିଲ୍ଲୀ,୨୧।୨:ଉତ୍ତର ଓଡ଼ିଶାରେ ବସବାସ କରୁଥିବା ଶ୍ରମଜୀବୀ ଓ ସେମାନଙ୍କ ପରିବାର ସଦସ୍ୟଙ୍କୁ ଉପଯୁକ୍ତ ଚିକିତ୍ସା ସେବା ଯୋଗାଇ ଦେବା ପାଇଁ ବାଲେଶ୍ୱରଠାରେ ଏକ ଅତ୍ୟାଧୁନିକ ୧୦୦ଶଯ୍ୟା ବିଶିଷ୍ଟ ଇଏସ୍ଆଇସି ହସ୍ପିଟାଲ ଖୁବଶୀଘ୍ର ନିର୍ମାଣ ହେବାକୁ ଯାଉଛି ବୋଲି କେନ୍ଦ୍ର ଶ୍ରମ ମନ୍ତ୍ରୀ ଭୂପେନ୍ଦ୍ର ଯାଦବ ଘୋଷଣା କରିଛନ୍ତି। ବିଶେଷକରି କେନ୍ଦ୍ର ସରକାରଙ୍କ ଶ୍ରମ ମନ୍ତ୍ରଣାଳୟ ଅଧୀନରେ ଥିବା ରାଜ୍ୟ କର୍ମଚାରୀ ବୀମା ନିଗମ(ଇଏସ୍ଆଇସି)ର ୧୯୦ତମ ସାଧାରଣ ବୈଠକ ସୋମବାର ଚଣ୍ଡୀଗଡ଼ଠାରେ ଅନୁଷ୍ଠିତ ହୋଇଛି। ଉକ୍ତ ବୈଠକରେ କେନ୍ଦ୍ର ଶ୍ରମମନ୍ତ୍ରୀ ଭୂପେନ୍ଦ୍ର ଯାଦବ ଅଧ୍ୟକ୍ଷତା କରିଥିବାବେଳେ ଉଭୟ ମନ୍ତ୍ରଣାଳୟ ଓ ଇଏସ୍ଆଇସିର ବରିଷ୍ଠ ଅଧିକାରୀ ଓ ଅନ୍ୟମାନେ ବୈଠକରେ ଯୋଗ ଦେଇଥିଲେ। ଏଥିରେ ଦେଶର ଶ୍ରମିକଙ୍କ ସୁରକ୍ଷା ପାଇଁ ବିଭିନ୍ନ ବିଷୟରେ ବିସ୍ତୃତ ଆଲୋଚନା ହୋଇଥିଲା ବେଳେ ଶ୍ରମଜୀବୀଙ୍କ ପାଇଁ ବିଭିନ୍ନ ପଦକ୍ଷେପ ବିଷୟରେ ବିସ୍ତୃତ ଆଲୋକପାତ କରିଥିଲେ। ଏହି ଅବସରରେ ବାଲେଶ୍ୱର ସମେତ ଦେଶର ୧୨ଟି ସ୍ଥାନରେ ଇଏସ୍ଆଇସି ହସ୍ପିଟାଲ୍ ଖୋଲିବାକୁ ନିଷ୍ପତ୍ତି ନିଆଯାଇଛି। ସେହିଭଳି ପ୍ରଧାନମନ୍ତ୍ରୀ ମଧ୍ୟ ଦେଶର ଶ୍ରମଜୀବି ଭାଇ ଭଉଣୀଙ୍କୁ ଉପଯୁକ୍ତ ସେବା ଓ ସୁବିଧା ଯୋଗାଇ ଦେବା ପାଇଁ ଉଭୟ ମନ୍ତ୍ରଣାଳୟ ଓ ନିଗମକୁ ମଧ୍ୟ ପ୍ରତିଶ୍ରୁତି ଦେଇଛନ୍ତି। ଏପରିକି ଶ୍ରମଜୀବୀଙ୍କ ସ୍ବାସ୍ଥ୍ୟ ସୁରକ୍ଷା ପାଇଁ ଦେଶର ବିଭିନ୍ନ ରାଜ୍ୟରେ ନୂତନ ଇଏସ୍ଆଇସି ହସ୍ପିଟାଲ ଖୋଲିବା ସହ ପୁରୁଣା ଇଏସ୍ଆଇସି ହସ୍ପିଟାଲର ଉନ୍ନତୀକରଣ ପାଇଁ ମଧ୍ୟ ସରକାର ମଞ୍ଜୁର ଦେଇଥିବା ଶ୍ରମ ମନ୍ତ୍ରୀ ଉକ୍ତ ବୈଠକରେ ମତପ୍ରକାଶ କରିଥିଲେ।
ଓଡ଼ିଶାର ବାଲେଶ୍ୱର ବ୍ୟତୀତ କର୍ନାଟକର ବେଲାଗାଭି, ତେଲଙ୍ଗାନାର ସାମସାବାଦ, ମହାରାଷ୍ଟ୍ରର ବାରମତି, ରାଜସ୍ଥାନର ଆଜମେର ନିକଟସ୍ଥ କିଶନଗଡ଼ରେ ୧୦୦ ଶଯ୍ୟା ବିଶିଷ୍ଟ ଇଏସ୍ଆଇସି ହସ୍ପିଟାଲ ହେବ। ସେହିପରି ଆନ୍ଧ୍ର ପ୍ରଦେଶର କୁର୍ନୁଲଠାରେ ୩୦ବେଡ୍ ବିଶିଷ୍ଟ ଇଏସଆଇସି ହସ୍ପିଟାଲ ହେବ। ଅପରପକ୍ଷରେ ଉତ୍ତର ପ୍ରଦେଶର ଗ୍ରେଟର ନୋଏଡାଠାରେ ମଧ୍ୟ ଏକ ୩୫୦ ବେଡେଡ୍ ବିଶିଷ୍ଟ ଇଏସ୍ଆଇସି ହସ୍ପିଟାଲ ହେବାର ଘୋଷଣା କରାଯାଇଛି। ଅପରପକ୍ଷରେ ସିକିମ୍ର ରଙ୍ଗୋପାଠାରେ ଅବସ୍ଥିତ ୩୦ ଶଯ୍ୟା ବିଶିଷ୍ଟ ଇଏସ୍ଆଇସି ହସ୍ପିଟାଲକୁ ୧୦୦ ଶଯ୍ୟାକୁ ବୃଦ୍ଧି କରାଯିବ। ଏପରିକି ରାଜ୍ୟ ସରକାରଙ୍କ ଚିକିତ୍ସାଳୟ ଯଥା ଆନ୍ଧ୍ରପ୍ରଦେଶର ବିଜୟଓ୍ବାଡା ନିକଟସ୍ଥ ଗୁଣ୍ଡାଲା ଏବଂ ଝାଡ଼ଖଣ୍ଡର ରାଞ୍ଚତ୍ଠାରେ ଅବସ୍ଥିତ ସରକାରୀ ଚିକିତ୍ସାଳୟକୁ ବର୍ତ୍ତମାନ ଇଏସ୍ଆଇସି ଦ୍ୱାରା ପ୍ରତ୍ୟକ୍ଷ ଭାବେ ପରିଚାଳନା କରାଯାଉଛି।
