ଆଳି,୧୬।୧୨(ଡି.ଏନ.ଏ.): ଚଳିତବର୍ଷର ଏନ୍ଆର୍ଟିଏସ୍ ପରୀକ୍ଷା ମଙ୍ଗଳବାର ଅନୁଷ୍ଠିତ ହୋଇଯାଇଛି। ଏହି ପରୀକ୍ଷାର ମାତୃଭାଷା (ସାହିତ୍ୟ) ପ୍ରଶ୍ନପତ୍ରରେ ବ୍ୟାପକ ତ୍ରୁଟି ପରିଲକ୍ଷିତ ହୋଇଛି। ଉକ୍ତ ପରୀକ୍ଷା ସାଧାରଣତଃ ୧୦୦ ମାର୍କ ପୂର୍ଣ୍ଣସଂଖ୍ୟା। ୨୫ ମାର୍କ ବିଶିଷ୍ଟ ୪ଟି ବିଷୟ ଭାଷା (ସାହିତ୍ୟ), ଗଣିତ, ବିଜ୍ଞାନ ଓ ସାମାଜିକ ବିଜ୍ଞାନକୁ ନେଇ ହୋଇଥାଏ। ମଙ୍ଗଳବାର ପରୀକ୍ଷାରେ ସାହିତ୍ୟ ୨୫ ନଂ.ରେ ଯେଉଁ ପ୍ରଶ୍ନ ଆସିଛି, ସେଥିରୁ ୫ଟି ପ୍ରଶ୍ନ ଅଷ୍ଟମ ଶ୍ରେଣୀ ଭାଷା ପାଠ୍ୟ ପୁସ୍ତକରେ ନାହିଁ ବୋଲି ଅଭିଯୋଗ ହେଉଛି। ଯେପରିକି ବି ସେଟ୍ ପ୍ରଶ୍ନପତ୍ରର ୨ ନଂ. ପ୍ରଶ୍ନରେ ତାର କଥା ନ ମାନିଲେ ନଈରେ ନେଇ ଫୋପାଡି ଦେବ ବୋଲି ଅଜୁ କାହାକୁ କହିଛି। ଏହା ପାଠ୍ୟ ପୁସ୍ତକରେ ନାହିଁ। ପ୍ରଶ୍ନ ନଂ. ୧୮ରେ ଭାରତର ଟେକ ରଖିବାକୁ ଆମେ କ’ଣ କରିବୁ। ଏହା ଭାରତ ମା’ ପଦ୍ୟରୁ ଆସିଛି, ଯାହା ପାଠ୍ୟ ପୁସ୍ତକ ଅନ୍ତର୍ଭୁକ୍ତ ନୁହେଁ। ପ୍ରଶ୍ନ ନଂ. ୧୯ରେ ଆସାମବାସୀଙ୍କ ପ୍ରସିଦ୍ଧ ତୀର୍ଥ ସ୍ଥାନର ନାମ କ’ଣ। ଏହି ପ୍ରଶ୍ନଟି ଆସାମ ଭ୍ରମଣ ଗଦ୍ୟରୁ ଆସିଛି। ଏହା ପ୍ରଚଳିତ ପାଠ୍ୟ ପୁସ୍ତକ ଅନ୍ତର୍ଗତ ନୁହେଁ। ପ୍ରଶ୍ନ ନଂ. ୨୨ରେ ଜଳ କେଉଁଥିରୁ ଜାତ ହୁଏ ବୋଲି ପଠିତ କବିତାରେ କୁହାଯାଇଛି। ଏହି ପ୍ରଶ୍ନଟି ଜଳ ପଦ୍ୟରୁ ଆସିଛି। ଏହା ମଧ୍ୟ ପାଠ୍ୟ ପୁସ୍ତକରେ ନାହିଁ। ସେହିଭଳି ପ୍ରଶ୍ନ ନଂ. ୨୪ରେ ଜଡ଼ ମଧ୍ୟରେ ଶକ୍ତି ନିହିତ ଥିବା କବି କାହାଠାରୁ ଜାଣିଲେ। ଏହା ଶିବରାତ୍ରି ପଦ୍ୟରୁ ଆସିଛି। ଏହା ମଧ୍ୟ ପାଠ୍ୟ ପୁସ୍ତକ ବାହାରୁ ଆସିଛି। ଏହା ଜାଣିବା ପରେ ଛାତ୍ରୀଛାତ୍ର ଓ ଅଭିଭାବକ ମହଲରେ ତୀବ୍ର ଅସନ୍ତୋଷ ଦେଖାଦେଇଛି। ଏଥିପାଇଁ ଗ୍ରେସ୍ ମାର୍କ ଦେବାକୁ ବିଭିନ୍ନ ମହଲରୁ ଦାବି ହେଉଛି।
