ଓ୍ବାଶିଂଟନ,୧୫।୨ : ୯ ବର୍ଷ ପୂର୍ବେ ମୂଷା ଦ୍ୱାରା ମହାମାରୀ ବ୍ୟାପିଥିଲା। ଏହା ଯୋଗୁ ସଙ୍କଟ ସୃଷ୍ଟି ହୋଇଥିଲା। ବର୍ତ୍ତମାନ ଏହା ୨୦୨୪ରେ ପୁଣିଥରେ ଦେଖାଦେଇଛି ଏବଂ ଜଣେ ବୃଦ୍ଧ ବ୍ୟକ୍ତିଙ୍କର ଏଥିରେ ମୃତ୍ୟୁ ଘଟିଛି। ଏହାକୁ ନେଇ ଚିକିତ୍ସା ଜଗତରେ ଡାକ୍ତରଙ୍କ ଚିନ୍ତା ବଢ଼ିବାରେ ଲାଗିଛି।
ସମ୍ପ୍ରତି, ଆମେରିକାର ଆଲାସ୍କାର କେନାଇରେ ଜଣେ ବୃଦ୍ଧଙ୍କ ମୃତ୍ୟୁ ଆଲାସ୍କା ପକ୍ସ ନାମକ ଏକ ଅଜ୍ଞାତ ଭୂତାଣୁ ରେ ଘଟିଛି। ଏହା ସମସ୍ତଙ୍କ ଦୃଷ୍ଟି ଆକର୍ଷଣ କରିଛି। ଏହାର ଆବିଷ୍କାର ହେଉଛି ୨୦୧୫ରେ ହୋଇଥିଲା। ତେବେ ଏବେ ଏହା ଯୋଗୁ ପ୍ରଥମ ମୃତ୍ୟୁ ଘଟିଥିବା କୁହାଯାଉଛି।
ଆଲାସ୍କା ପକ୍ସ ଅର୍ଥୋପକ୍ସଭାଇରସ ଦ୍ୱାରା ସୃଷ୍ଟି ହୋଇଥାଏ।ଇଟା ଆକାରର ଭୂତାଣୁ ଯାହା ଉଭୟ ପ୍ରାଣୀ ଏବଂ ମଣିଷକୁ ସଂକ୍ରମିତ କରିପାରେ, ଚର୍ମର କ୍ଷତ କିମ୍ବା ଛୋଟଫୋଟକା ସୃଷ୍ଟି କରିଥାଏ ।
ଏହି ଭୂତାଣୁ ପ୍ରଥମେ ଆଲାସ୍କାର ଫେୟାରବ୍ୟାଙ୍କ ନିକଟରେ ରହୁଥିବା ଜଣେ ମହିଳାଙ୍କଠାରେ ଚିହ୍ନଟ ହୋଇଥିଲା ଏବଂ ଏହା ପରେ ମୁଖ୍ୟତଃ ଚୁଚୁନ୍ଦ୍ରା ପରି କ୍ଷୁଦ୍ର ସ୍ତନ୍ୟପାୟୀ ପ୍ରାଣୀମାନଙ୍କଠାରେ ଦେଖିବାକୁ ମିଳିଥିଲା। ତଥାପି, କୁକୁର ଏବଂ ବିଲେଇ ପରି ଗୃହପାଳିତ ପ୍ରାଣୀମାନେ ମଧ୍ୟ ଏହି ଭୂତାଣୁ ଦ୍ୱାରା ସଂକ୍ରମିତ ହୋଇପାରନ୍ତି।
ଆଲାସ୍କା ପକ୍ସର ଲକ୍ଷଣଗୁଡ଼ିକ ମଧ୍ୟରେ ଚର୍ମରେ ଏକ ବା ଏକାଧିକ ଫୋଟକା ସହିତ ଗଣ୍ଠି କିମ୍ବା ମାଂସପେଶୀ ଯନ୍ତ୍ରଣା ଏବଂ ଲିମ୍ଫ ନୋଡ ଫୁଲିଯାଇଥାଏ।
ଗତ ନଅ ବର୍ଷ ମଧ୍ୟରେ ଆଲାସ୍କାରେ ହୋଇଥିବା ସାତୋଟି ମାମଲା ମଧ୍ୟରୁ ଅଧିକାଂଶ ସାମାନ୍ୟ ଥିଲା ଯାହା ଚିକିତ୍ସା ବିନା ଭଲ ହୋଇଥିଲା। ରୋଗ ପ୍ରତିରୋଧକ ଶକ୍ତି ଦୁର୍ବଳ ଥିବା ଲୋକଙ୍କ ପାଇଁ ଏହି ଭୂତାଣୁ ଅଧିକ ବିପଦ ସୃଷ୍ଟି କରିଥାଏ। ସଂକ୍ରମିତ ପ୍ରାଣୀମାନଙ୍କ ସହିତ ସିଧାସଳଖ ଯୋଗାଯୋଗ ମାଧ୍ୟମରେ ଆଲାସ୍କା ପକ୍ସର ସଂକ୍ରମଣ ହୁଏ ବୋଲି ଅନୁମାନ କରାଯାଏ।
ଯଦିଓ ଆଲାସ୍କା ପକ୍ସ କିପରି ବିସ୍ତାର ହୁଏ ତାହା ସ୍ପଷ୍ଟ ନୁହେଁ, ଅନୁସନ୍ଧାନକାରୀମାନେ ଏହା ଜୁନୋଟିକ ହୋଇଥାଇ ପାରେ ବୋଲି ଅନୁମାନ କରୁଛନ୍ତି। ଅର୍ଥତ୍ାତ ଏହା ପ୍ରାଣୀମାନଙ୍କଠାରୁ ମଣିଷ ପର୍ଯ୍ୟନ୍ତ ବିସ୍ତାର ହୋଇପାରେ। ତେଣୁ ଆଲାସ୍କା ପକ୍ସ କ୍ଷତ ଥିବା ବ୍ୟକ୍ତି ଏହାକୁ ସଂକ୍ରମଣର ବିପଦକୁ ହ୍ରାସ କରିବା ପାଇଁ ଏହାକୁ ଏକ ବ୍ୟାଣ୍ଡେଜରେ ଘୋଡାଇବା ଉଚିତ।
ନୂତନ ମାମଲାରେ, ଭାଇରସ କାରଣରୁ ମୃତ୍ୟୁବରଣ କରିଥିବା ବ୍ୟକ୍ତି କର୍କଟ ରୋଗ ଯୋଗୁ ଚିକିତ୍ସିତ ହେଉଥିଲେ, ଏହି କାରଣରୁ ତାଙ୍କର ରୋଗ ପ୍ରତିରୋଧକ ଶକ୍ତି ପ୍ରଭାବିତ ହୋଇଥିଲା। ଆସୋସିଏଟେଡ ପ୍ରେସ ଅନୁଯାୟୀ, ସେପ୍ଟେମ୍ବରରେ ପ୍ରଥମେ ତାଙ୍କ ଡାହାଣ ବାହୁ ତଳେ ଏକ ଲାଲ କ୍ଷତ ଚିହ୍ନଟ ହୋଇଥିଲା। କ୍ରମାଗତ ଥକାପଣ ଏବଂ ଜଳୁଥିବା ଯନ୍ତ୍ରଣା ପାଇଁ ଚିକିତ୍ସିତ ହେଉଥିଲେ। ନଭେମ୍ବରରେ ଡାକ୍ତରଖାନାରେ ଭର୍ତ୍ତି ହୋଇଥିଲେ ମଧ୍ୟ ପରବର୍ତ୍ତୀ ମାସରେ ତାଙ୍କର ମୃତ୍ୟୁ ହୋଇଥିଲା।
