ଦୁବାଇ,୧୪।୧୦: ଚେନ୍ନାଇ ସହ ଫାଇନାଲ ଖେଳିବ କେକେଆର୍। ବୁଧବାର ଖେଳାଯାଇଥିବା ଦିଲ୍ଲୀ କ୍ୟାପିଟାଲ୍ସ ବିପକ୍ଷ ମ୍ୟାଚ୍ରେ କୋଲକାତା ନାଇଟ୍ ରାଇଡର୍ସ ରୋମାଞ୍ଚକର ବିଜୟ ହାସଲ କରିଥିଲା। ୧୩୫ ରନ୍ର ବିଜୟ ଲକ୍ଷ୍ୟକୁ କୋଲକାତା ୧୯.୫ ଓଭରରେ ୭ ଉଇକେଟ ହରାଇ ହାସଲ କରିନେଇଥିଲା। ୧୨୩/୧ ଉଇକେଟରୁ ୧୩୦ ଯାଏ ଆସୁଆସୁ କେକେଆର୍ ୭ ରନ୍ରେ ୬ ଉଇକେଟ ହରାଇଥିଲା। ଶେଷ ତିନି ଓଭରରେ ମ୍ୟାଚ୍ ଦିଲ୍ଲୀ ହାତକୁ ଯାଉଥିବା ଭଳି ଲାଗିଥିଲା। ହେଲେ ରାହୁଲ ତ୍ରିପାଠୀ ଧୌର୍ଯ୍ୟର ସହ ବ୍ୟାଟିଂ କରି ୨୦ ଓଭରର ୫ମ ବଲ୍ରେ ଛକା ମାରି କେକେଆର୍କୁ ତୃତୀୟ ଥର ପାଇଁ ଫାଇନାଲରେ ପହଞ୍ଚାଇଥିଲେ। କେକେଆର୍ର ବିଜୟ ପରେ ଅଧିନାୟକ ଇଓନ ମୋର୍ଗାନ ପ୍ରତିକ୍ରିୟା ରଖି ମ୍ୟାଚ୍କୁ ସହଜରେ ଜିତିଥିଲେ ଅଧିକ ଖୁସି ଲାଗିଥାନ୍ତା ବୋଲି କହିଛନ୍ତି।
ଯେଉଁଭଳି ଭାବେ ଆରମ୍ଭ ହୋଇଥିଲା ତାକୁ ଦେଖିଲେ ବିଜୟ ଆହୁରି ସହଜ ହୋଇପାରିଥାନ୍ତା। ଭେଙ୍କଟେଶ ଆୟର ଓ ଶୁବମନ ଗିଲ ଆମକୁ ଭଲ ପ୍ଲାଟଫର୍ମ ଦେଇଥିଲେ। ହେଲେ ପରେ କାକର ପଡ଼ିବାରୁ ମ୍ୟାଚ୍ର ଦିଗ ବଦଳିଯାଇଥିଲା। ଖୁସି ଏତିକି ଆମେ ଫାଇନାଲରେ ପହଞ୍ଚିଗଲୁ। ଯଦି ମ୍ୟାଚ୍କୁ ସହଜରେ ଜିତିଥାନ୍ତୁ ଅଧିକ ଖୁସି ଲାଗିଥାନ୍ତା। ମାତ୍ର ଦିଲ୍ଲୀ ଟିମ୍ ବହୁତ ମଜଭୂତ। ଦୁଇଟି ବଲ୍ରେ ଜିତିବା ଲାଗି ୬ ରନ୍ ମୁସ୍କିଲ ଥିଲା। ରାହୁଲ ଛକା ମାରି ଆମକୁ ଜିତାଇ ଦେଲେ। ଦଳର ମ୍ୟାନେଜମେଣ୍ଟ ଯୁବ ଖେଳାଳିମାନଙ୍କୁ ନିଜ ଅନୁଯାୟୀ ଖେଳିବାକୁ ପ୍ରୋତ୍ସାହିତ କରୁଛି। ଆମେ ସମସ୍ତ ଯୋଜନାରେ ସଫଳ ହେଉଛୁ। ଫାଇନାଲରେ ମଧ୍ୟ ବିଜୟ ଅଭିଯାନ ଜାରି ରଖିବୁ ବୋଲି ଆଶା। ଆଇପିଏଲ୍ର ସର୍ବଶ୍ରେଷ୍ଠ ଟିମ୍ ସହ ଖେଳିବାର ଅଛି। ଏଣୁ ଫାଇନାଲରେ କିଛି ବି ହୋଇପାରେ ବୋଲି ମୋର୍ଗାନ କହିଛନ୍ତି।
