ଉପେନ୍ଦ୍ର ରାଉତ
ବଅଁରପାଳ,୧୨ା୮ – କାମର ଚାପ ହ୍ରାସ ପାଇଁ ହେଉ ଅବା ସୁସ୍ଥ ଜୀବନଯାପନ, ସଭିଙ୍କୁ ଲୋଡ଼ା ମନୋରଞ୍ଜନ। କିନ୍ତୁ ୫ ମାସ ହେଲା କରୋନା କଟକଣା ପାଇଁ ମନୋରଞ୍ଜନର ଏକ ବଡ଼ ମାଧ୍ୟମ ସିନେମା ହଲ୍ରେ ପକାଇ ଦିଆଯାଇଛି ତାଲା। ଫଳରେ ରାତି ପାହିଲେ ଯେଉଁଠି ଅସମ୍ଭାଳ ଭିଡ଼ ଜମୁଥିଲା ସେଠି ଏବେ ଅସ୍ବାଭାବିକ ନୀରବତା ଛାଇଯାଇଛି। ଗତ ୫ ତାରିଖଠାରୁ ଜିମ୍, ଯୋଗ କେନ୍ଦ୍ରକୁ ‘ହଁ’ କୁହାଯାଇଥିଲେ ହେଁ ସିନେମା ହଲ୍ ପୂର୍ବପରି ‘ନା’ରେ ରହିଯାଇଛି। ଫଳରେ ମନୋରଞ୍ଜନର ଏହି ମାଧ୍ୟମ ଗତ ମାର୍ଚ୍ଚ ମାସରୁ ଏଯାଏ ମଥା ଟେକିପାରୁ ନାହିଁ।
ଅନୁଗୋଳ ଜିଲାରେ ୬ଟି ସିନେମା ହଲ୍ ରହିଛି। କେବଳ ଅନୁଗୋଳରେ ୨ଟି ଦିବ୍ୟଜୋତି ଓ କାଞ୍ଚନ ପ୍ରେକ୍ଷାଳୟ ଥିବାବେଳେ ନାଲ୍କୋରେ ସିନେଫ୍ଲେକ୍ସ, ବଅଁରପାଳରେ ଆଶାଟକିଜ ଓ ତାଳଚେରରେ ୨ଟି ରହିଛି। କରୋନା ପୂର୍ବରୁ ଏସବୁ ହଲ୍ଗୁଡ଼ିକ ଅନେକ ସମୟରେ ହାଉସ୍ଫୁଲ୍ ରହୁଥିଲା। ନୂଆ ନୂଆ ଚଳଚ୍ଚିତ୍ର ଦେଖିବାର ଉତ୍ସାହ ଦର୍ଶକମାନଙ୍କୁ ଟାଣିଆଣୁଥିଲା। ଭଲ ରୋଜଗାର ହେଉଥିବାରୁ ଏହି ବ୍ୟବସାୟ ସମ୍ପ୍ରସାରଣର ଆଶା ସଞ୍ଚାର ହେଉଥିଲା। କିନ୍ତୁ ମାର୍ଚ୍ଚ ୨୫ରେ ଲକ୍ଡାଉନ୍ ଘୋଷଣା ପରଠାରୁ ବ୍ୟବସାୟ ବନ୍ଦ ରହିଛି। ଫଳରେ କ୍ଷତି ବଢ଼ି ଚାଲିଥିବା କେତେଜଣ ହଲ୍ ମାଲିକ ପ୍ରକାଶ କରିଛନ୍ତି। ସେମାନଙ୍କ କହିବା ଅନୁଯାୟୀ, ଗତ କିଛି ବର୍ଷ ହେଲା ସିନେମା ମୁକ୍ତିଲାଭର ଧାରା ବଦଳିଛି। ପୂର୍ବରୁ କେବଳ ପର୍ବପର୍ବାଣିରେ ଆସୁଥିବା ଓଡ଼ିଆ ଚଳଚ୍ଚିତ୍ର ଏବେ ଅନ୍ୟ ସମୟରେ ମଧ୍ୟ ରିଲିଜ ହେଉଛି। ଏଥିସହ ଅଧିକରୁ ଅଧିକ ହିନ୍ଦୀ ଫିଲ୍ମ ପରଦାମଣ୍ଡନ କରିବା ସିନେମା ହଲ୍ ବ୍ୟବସାୟୀମାନଙ୍କୁ ବେଶ୍ ସୁହାଇ ଆସିଛି। ହେଲେ କରୋନା କଟକଣା ଲଗାଯିବା ପରଠାରୁ ପ୍ରେକ୍ଷାଳୟଗୁଡ଼ିକ ସମ୍ପୂର୍ଣ୍ଣ ଠପ୍ ହୋଇଯାଇଛି। ସାମାଜିକ ଦୂରତ୍ୱ ସହ କଟକଣା ମଧ୍ୟରେ ହଲ୍ଗୁଡ଼ିକୁ ଖୋଲିବାକୁ ବିଭିନ୍ନ ସମୟରେ ଦାବି ହେଉଥିଲେ ମଧ୍ୟ ସରକାରଙ୍କ ପକ୍ଷରୁ ସବୁଜ ସଂକେତ ଦିଆଯାଉ ନାହିଁ। ସେମାନେ ସରକାରଙ୍କୁ ଟିକସ ଦେବା ସହ ନିୟମିତ ବିଦ୍ୟୁତ୍ ଦେୟ ପ୍ରଦାନ କରୁଛନ୍ତି। ଏପରିକି କର୍ମଚାରୀଙ୍କୁ ଦରମା ମଧ୍ୟ ଦେଉଛନ୍ତି। ଗୋଟିଏ ଗୋଟିଏ ହଲ୍ରେ ୨୦ରୁ ଅଧିକ କର୍ମଚାରୀ ଥିବାରୁ ଦରମା ବାବଦରେ ମାସିକ ଲକ୍ଷାଧିକ ଟଙ୍କା ବ୍ୟୟ କରିବାକୁ ପଡ଼ୁଛି। ହଲ୍ର ମେଣ୍ଟେନାନ୍ସ ଖର୍ଚ୍ଚ ବଢ଼ିଚାଲିଛି। ଆୟ ଆଦୌ ନ ଥିବା ବେଳେ ଅତ୍ୟଧିକ ବ୍ୟୟ ବହନ କରିବା ଅସମ୍ଭବ ହୋଇପଡ଼ୁଛି। ଆଗାମୀ ଦିନରେ ହଲ୍ ଖୋଲିବା ଦିଗରେ ସରକାର ବିଚାର ନ କଲେ ସବୁଦିନ ପାଇଁ ପ୍ରେକ୍ଷାଳୟ ବନ୍ଦ କରିବା ଭଳି ପରିସ୍ଥିତି ଆସିବା ଅସମ୍ଭବ ନୁହେଁ। ଏହାଦ୍ୱାରା ବହୁ କର୍ମଚାରୀ କର୍ମସଂସ୍ଥାନ ସହ ରୋଜଗାର ହରାଇବସିବେ। ତେଣୁ ଏ ଦିଗରେ ତୁରନ୍ତ ପଦକ୍ଷେପ ନିଆଯିବା ଆବଶ୍ୟକ ବୋଲି ଅନୁଗୋଳ ଜିଲାର ସିନେମା ହଲ୍ ମାଲିକମାନେ ଦାବି କରିଛନ୍ତି।
ଟ୍ୟାକ୍ସ ଛାଡ଼ କରାଯାଉ
ଗତ ମାର୍ଚ୍ଚମାସରୁ ସିନେମା ହଲ ବନ୍ଦ ରହିଛି। ବ୍ୟବସାୟ ନ ଥିଲେ ମଧ୍ୟ ସରକାରଙ୍କୁ ଟ୍ୟାକ୍ସ ଦିଆଯାଉଛି। ୩୫ ଜଣ କର୍ମଚାରୀଙ୍କୁ ଦରମା ସହ ସେମାନଙ୍କ ପ୍ରୋଭିଡେଣ୍ଟ ଫଣ୍ଡ ପରିଚାଳନା କରାଯାଉଛି। ମାଲିକମାନେ ହତାଶ ହୋଇପଡ଼ୁଥିବାରୁ ସ୍ବତନ୍ତ୍ର ଗାଇଡ୍ଲାଇନ୍ ଆଣି ସରକାର ହଲଗୁଡିକୁ ଚଳାଇବା ପାଇଁ ଅନୁମତି ଦିଅନ୍ତୁ। ନଚେତ କର୍ମଚାରୀଙ୍କୁ ଦରମା ପ୍ରଦାନ ସହ ଟ୍ୟାକ୍ସ ଛାଡ଼ କରନ୍ତୁ।
– ସଂଗ୍ରାମ ମିଶ୍ର, ମାଲିକ ଦିବ୍ୟଜୋତି ସିନେମା ହଲ୍, ଅନୁଗୋଳ
ବୁଡିଯାଉଛି ବ୍ୟବସାୟ
ଗତ ୫ ମାସ ମଧ୍ୟରେ କେତେ ପର୍ବପର୍ବାଣି ଗଲାଣି। ଆଗକୁ ପୂଜା ଋତୁ ଆସୁଛି। ସାଧାରଣତଃ ଏସବୁ ସମୟରେ ନୂଆ ଓଡ଼ିଆ ସିନେମା ସହ ବିଗ୍ ବଜେଟ୍ର ହିନ୍ଦୀ ଫିଲ୍ମ ପରଦା ମଣ୍ଡନ କରିଥାନ୍ତା। ହଲ୍ଗୁଡ଼ିକ ହାଉସ୍ଫୁଲରେ ଚାଲୁଥାନ୍ତା। କିନ୍ତୁ ମାର୍ଚ୍ଚରୁ ହଲ୍ଗୁଡ଼ିକୁ ବନ୍ଦ ରଖାଯାଇଥିବାରୁ ଏହି ବ୍ୟବସାୟ ଏକପ୍ରକାର ବୁଡ଼ିଯାଉଛି।
– ରାଜୀବ ଜେନା, ମାଲିକ କାଞ୍ଚନ ଟକିଜ, ଅନୁଗୋଳ
ହଲ୍ ଚାଲୁ ପାଇଁ ଅନୁମତି ମିଳୁ
ଦୀର୍ଘ ଦିନ ହେଲା ସିନେମା ହଲଗୁଡ଼ିକରେ ତାଲା ଝୁଲାଇ ଦିଆଯାଇଛି। ବ୍ୟବସାୟ ବନ୍ଦ ଥିଲେ ବି ପ୍ରତି ମାସରେ ବିଦ୍ୟୁତ୍ ବିଲ୍ ସହ ଟ୍ୟାକ୍ସ ଦେବାକୁ ପଡ଼ୁଛି। କର୍ମଚାରୀମାନେ ଆମ ଉପରେ ନିର୍ଭରଶୀଳ ଥିବାରୁ ସେମାନଙ୍କୁ ଦରମା ଦେଉଛୁ। ସରକାର ହଲଗୁଡିକୁ ଚଳାଇବା ପାଇଁ ଅନୁମତି ଦେଲେ କର୍ମଚାରୀମାନଙ୍କ ଜୀବନ ଜୀବିକା ରକ୍ଷାହୋଇପାରନ୍ତା।
– ପଙ୍କଜ ସାମଲ, ମାଲିକ ଆଶା ଟକିଜ୍, ବଅଁରପାଳ
