କେପଟାଉନ୍,୩।୧୨:ଇଂଲଣ୍ଡ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଚାଲିଥିବା ୩ଟି ମ୍ୟାଚ୍ ବିଶିଷ୍ଟ ଟି -୨୦ ସିରିଜ୍ର ଶେଷ ମ୍ୟାଚ ଚଳିତ ସପ୍ତାହରେ କେପଟାଉନରେ ଖେଳାଯାଇଥିଲା। ଏହି ମ୍ୟାଚରେ ଇଂଲଣ୍ଡ ୯ ଉଇକେଟରେ ଜିତିଥିଲା। ଫଳରେ ଇଂଲଣ୍ଡ ଏହି ସିରିଜକୁ ୩-୦ ଜିତି ନେଇଥିଲା। କିନ୍ତୁ ଶେଷ ଟି -୨୦ ମ୍ୟାଚ୍ରେ ଇଂଲଣ୍ଡର ବିଜୟକୁ ନେଇ ପ୍ରଶ୍ନ ଉଠିଛି। ଇଂଲଣ୍ଡ ଦଳ ଉପରେ ଅଭିଯୋଗ ରହିଛି ଯେ, ମ୍ୟାଚ ସମୟରେ ଡ୍ରେସିଂ ରୁମରୁ ପଡିଆରେ ଖେଳୁଥିବା କ୍ୟାପଟେନ ଇଅନ ମୋର୍ଗାନଙ୍କୁ କୋଡ ୱାର୍ଡରେ ବାର୍ତ୍ତା ପଠାଯାଇଥିଲା। ପୂର୍ବତନ ଅଧିନାୟକ ମାଇକେଲ ଭନ ଇଂଲଣ୍ଡର ଏହି କାର୍ଯ୍ୟ ଉପରେ ପ୍ରଶ୍ନ ଉଠାଇଛନ୍ତି। ଏହା ନିୟମ ବିରୁଦ୍ଧ ବୋଲି ସେ କହିଛନ୍ତି। ଦକ୍ଷିଣ ଆଫ୍ରିକାର ଇନିଂସ ସମୟରେ ଏହି ଘଟଣା ୧୯ତମ ଓଭରରେ ଘଟିଥିଲା। ଇଂଲଣ୍ଡ ଦଳର ବିଶ୍ଳେଷକ ନାଥନ ଲେମନ୍ ଡ୍ରେସିଂ ରୁମରେ ବସିଥିଲେ। ଏହି ସମୟ ମଧ୍ୟରେ ସେ ମୋର୍ଗାନକୁ କାର୍ଡ ଦେଖାଉଥିବା ଦେଖିବାକୁ ମିଳିଥିଲା। ବଡ଼ କ୍ଲିପବୋର୍ଡରେ ୪ଇ ଏବଂ ୨ସି ଲେଖାଯାଇଥିଲା। ତେବେ ମ୍ୟାଚ ପରେ ଉଇକେଟ କିପର ଜୋସ ବଟଲର କହିଛନ୍ତି ଯେ ଏହା ତାଙ୍କ ଦଳକୁ ଅଧିକ ସାହାଯ୍ୟ କରିନାହିଁ। ସେ କହିଛନ୍ତି, ମୋର୍ଗାନ ଏବଂ ନାଥନ ଆଜିକାଲି ଏକାଠି ରଣନୀତି ପ୍ରସ୍ତୁତ କରୁଛନ୍ତି। ଏହା ଏକ ପ୍ରକାର ପରୀକ୍ଷଣ। ମୋର୍ଗାନ ବିଶ୍ୱର ସର୍ବୋତ୍ତମ ଅଧିନାୟକ। ମ୍ୟାଚ ସମୟରେ ଏହି ଘଟଣା ଘଟିବା ମାତ୍ରେ ମାଇକେଲ ଭାଓନ ଟୁଇଟ କରି ଏହାକୁ ସମାଲୋଚନା କରିଥିଲେ।
