ଦୁବାଇ,୬।୮(ପି.ଟି.): ପ୍ରଥମଥର ପାଇଁ ଟେଷ୍ଟ କ୍ରିକେଟରେ ଫ୍ରଣ୍ଟ ଫୁଟ୍ ନୋ ବଲ ସଂକ୍ରାନ୍ତରେ ଫିଲ୍ଡ ଅମ୍ପାୟର ନୁହେଁ ଟିଭି ଅମ୍ପାୟର ନିଷ୍ପତ୍ତି ନେବେ। ବୁଧବାରଠାରୁ ଆରମ୍ଭ ହୋଇଥିବା ଇଂଲଣ୍ଡ- ପାକିସ୍ତାନ ଟେଷ୍ଟ ସିରିଜରେ ଟିଭି ଅମ୍ପାୟରଙ୍କୁ ଏହି ବିଶେଷ ଅଧିକାର ଦିଆଯାଇଛି ଓ ଏ ନେଇ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ବୁଧବାର ଘୋଷଣା କରିଛି। ଫ୍ରଣ୍ଟ ଫୁଟ ନୋ ବଲ ଟେକ୍ନୋଲୋଜି ନେଇ ବିଭିନ୍ନ ଦୃଷ୍ଟିକୋଣରୁ ବିଚର କରାଯାଇ ମୂଲ୍ୟାଙ୍କନ କରାଯିବ। ଏହାପରେ ଭବିଷ୍ୟତରେ ଏହି ଟେକ୍ନୋଲୋଜିର ବ୍ୟବହାର ନେଇ ନିଷ୍ପତ୍ତି ନିଆଯିବ। ଇଂଲଣ୍ଡ ଓ ପାକିସ୍ତାନ ମଧ୍ୟ ଏହାକୁ ସମର୍ଥନ କରିଛନ୍ତି। ଆଇସିସି ବିଶ୍ୱ ଚାମ୍ପିୟନଶିପ୍ରେ ମଧ୍ୟ ଏହାର ବ୍ୟବହାର ହେବ। ଏହି ୩ଟି ଟେଷ୍ଟରେ ଏହି ଟେକ୍ନୋଲୋଜି କିପରି ବ୍ୟବହାର ହେଉଛି ଓ ଏହା ପ୍ରଦର୍ଶନ ଉପରେ ମଧ୍ୟ ତର୍ଜମା କରାଯିବ।
ସଦ୍ୟସମାପ୍ତ ଇଂଲଣ୍ଡ- ଅୟର୍ଲାଣ୍ଡ ଦିନିକିଆ ସିରିଜରେ ମଧ୍ୟ ତୃତୀୟ ଅମ୍ପାୟର ଫ୍ରଣ୍ଟ ଫୁଟ୍ ନୋ ବଲକୁ ନଜର ରଖୁଥିଲେ। ଏହି ସିରିଜ ଆଇସିସି ଓ୍ବାଲ୍ଡ କପ୍ ସୁପର ଲଗ୍ର ଅଂଶବଶେଷ। ଗତବର୍ଷ ଭାରତ- ଓ୍ବେଷ୍ଟଇଣ୍ଡିଜ ସୀମିତ ଓଭର ସିରିଜରେ ମଧ୍ୟ ଏହି ଟେକ୍ନୋଲୋଜିର ବ୍ୟବହାର ହୋଇଥିଲା। ଚଳିତବର୍ଷ ପ୍ରାରମ୍ଭରେ ଅଷ୍ଟ୍ରେଲିଆରେ ଖେଳାଯାଇଥିବା ଟି୨୦ ମହିଳା ବିଶ୍ୱକପ୍ରେ ମଧ୍ୟ ଏହାର ବ୍ୟବହାର ହୋଇଥିଲା। ଇଂଲଣ୍ଡ ଓ ପାକିସ୍ତାନ ମଧ୍ୟରେ ମାଞ୍ଚେଷ୍ଟରରେ ବୁଧବାରଠାରୁ ପ୍ରଥମ ଟେଷ୍ଟ ମ୍ୟାଚ ଆରମ୍ଭ ହୋଇଛି। ସେହିପରି ଦ୍ୱିତୀୟ ଓ ତୃତୀୟ ଟେଷ୍ଟ ଯଥାକ୍ରମେ ଅଗଷ୍ଟ ୧୩ ଓ ୨୧ ତାରିଖରେ ଆରମ୍ଭ ହେବ।
