ନୂଆଦିଲ୍ଲୀ,୧୭।୭: ଇଂଲଣ୍ଡ କ୍ରିକେଟର ଜେମ୍ସ ଭିନ୍ସଙ୍କ ପରିବାର ଉପରେ କାହାର ଖରାପ ନଜର ଲାଗିଯାଇଛି। ଗତ ଚାରିମାସ ଧରି ତାଙ୍କ ଜୀବନର ସମସ୍ତ ସୁଖ ଏବଂ ଶାନ୍ତି ସବୁ ଚାଲିଯାଇଛି। ପରିସ୍ଥିତି ଏତେ ଖରାପ ହୋଇଛି ଯେ ସେ ନିଜ ସହର ଅର୍ଥାତ୍ ସାଉଥମ୍ପଟନ ଛାଡିବାକୁ ବାଧ୍ୟ ହୋଇଥିଲେ। ଇଂଲଣ୍ଡ ପାଇଁ ୧୩ଟି ଟେଷ୍ଟ, ୨୫ଟି ଦିନିକିଆ ଏବଂ ୧୭ଟି -୨୦ ଅନ୍ତର୍ଜାତୀୟ ଖେଳିଥିବା ଜେମ୍ସ ଭିନ୍ସଙ୍କ ସମ୍ପତ୍ତି ଉପରେ କ୍ରମାଗତ ଆକ୍ରମଣ ହେଉଛି। ପ୍ରଥମ ଆକ୍ରମଣ ୨୦୨୪ ଏପ୍ରିଲ ୧୫ରେ ହୋଇଥିଲା, ଯେତେବେଳେ ୩୩ ବର୍ଷିୟ ଭିନ୍ସ ରାତିରେ ତାଙ୍କ ପତ୍ନୀଙ୍କ ସହ ଶୋଇଥିଲେ, ଯେତେବେଳେ ହଠାତ୍ ଆଲାର୍ମ ଦ୍ୱାରା ସେ ଜାଗ୍ରତ ହୋଇଥିଲେ। ଆଉ ଯାହା ଦେଖିଲେ ତାଙ୍କ ପାଦ ତଳୁ ମାଟି ଖସିଯାଇଥିଲା। ତାଙ୍କ ଘର ଉପରକୁ କେହି ଆକ୍ରମଣ କରୁଥିଲେ। ଭଙ୍ଗାରୁଜା କରୁଥିଲେ। ଯାହା ଦେଖି ସେ ଡରିଯାଇଥିଲେ।
ସିସିଟିଭି ଫୁଟେଜରେ ଏହା ସ୍ପଷ୍ଟ ଭାବେ ଦେଖିବାକୁ ମିଳିଛି ଯେ ଜଣେ ଅଜ୍ଞାତ ଆକ୍ରମଣକାରୀ ଭିନ୍ସଙ୍କ ଘର କମ୍ପାଉଣ୍ଡରେ ପ୍ରବେଶ କରି ଗାଡି ଏବଂ ଘରକୁ ଟାର୍ଗେଟ କରୁଛନ୍ତି। ପୋଲିସ ପହଞ୍ଚିବା ବେଳକୁ ଆକ୍ରମଣକାରୀ ସବୁକିଛି ନଷ୍ଟ କରିଦେଇଥିଲେ। ଘର ଏବଂ କାରର ମରାମତି ପାଇଁ ଭିନ୍ସଙ୍କୁ ଅସ୍ଥାୟୀ ଭାବରେ ଘରୁ ବାହାରକୁ ଯିବାକୁ ପଡିଲା। ଘରକୁ ଫେରିବାର ପ୍ରାୟ ଏକ ସପ୍ତାହ ପରେ, ୧ ମେ’ରେ ପୁଣି ଦ୍ୱିତୀୟ ଆକ୍ରମଣ ହୋଇଥିଲା। ଏଥର ଭିନ୍ସ ଜାଗ୍ରତ ଥିବାବେଳେ ଆକ୍ରମଣକାରୀମାନେ ପ୍ରବେଶ କରିଥିଲେ। କିନ୍ତୁ ଘରେ କାର୍ଯ୍ୟକଳାପ ଦେଖି ଆକ୍ରମଣକାରୀମାନେ ଶୀଘ୍ର ଚାଲଯାଇଥିଲେ।
