ମାଞ୍ଚେଷ୍ଟର, ୬।୭: କରୋନା ଭାଇରସ ସଂକ୍ରମଣ ଜନିତ ୩ ମାସର ବ୍ରେକ୍ ପରେ ଇଂଲଣ୍ଡରେ ଅନ୍ତର୍ଜାତୀୟ କ୍ରିକେଟ ଆରମ୍ଭ ହେବାକୁ ଯାଉଛି। ଆସନ୍ତା ୮ ତାରିଖରୁ ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ମଧ୍ୟରେ ୩ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଅନୁଷ୍ଠିତ ହେବ। ପ୍ରଥମ ଟେଷ୍ଟ ସାଉଥାମ୍ପଟନର ଏଜେସ ବାଉଲ ଷ୍ଟାଡିୟମରେ ଜୈବ-ସୁରକ୍ଷିତ ପରିବେଶରେ ଖେଳାଯିବ। ଏଥିପାଇଁ ଉଭୟ ଦଳର ଖେଳାଳି ତାଲିକା ପ୍ରକାଶ ପାଇସାରିଛି। ଦୀର୍ଘଦିନଧରି ବିଶ୍ୱବ୍ୟାପୀ କ୍ରିକେଟ ଠପ୍ ହୋଇଯାଇଥିବାରୁ ସମସ୍ତ କ୍ରିକେଟ ପ୍ରେମୀଙ୍କ ନଜର ଏବେ ସାଉଥାମ୍ପଟନ ଉପରେ ରହିଛି। ଗତବର୍ଷ ଇଂଲଣ୍ଡ ଦଳ ଜୋ ରୁଟ୍ଙ୍କ ନେତୃତ୍ୱରେ ଓ୍ବେଷ୍ଟଇଣ୍ଡିଜ ଗସ୍ତ କରି ୧-୨ରେ ସିରିଜ ହାରିଥିଲା। ଏଥର ଇଂଲଣ୍ଡ ମାଟିରେ ସେହି ପ୍ରଦର୍ଶନକୁ ଦୋହରାଇବା ଲକ୍ଷ୍ୟରେ ରହିଛି ଜାସନ ହୋଲ୍ଡରଙ୍କ ଦଳ। ଓଭରଅଲ୍ ରେକର୍ଡରେ ଓ୍ବେଷ୍ଟଇଣ୍ଡିଜ ପଲା ଭାରି ଥିଲେ ହେଁ ଘରୋଇ ପରିବେଶରେ ଏଥର ଇଂଲଣ୍ଡର ପଲା ଭାରି ରହିବ ବୋଲି କ୍ରିକେଟ ବିଶେଷଜ୍ଞମାନେ ମତ ଦେଇଛନ୍ତି। ରେକର୍ଡ ଦେଖିଲେ ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ମଧ୍ୟରେ ୧୯୨୮ରୁ ୨୦୧୮-୧୯ ପର୍ଯ୍ୟନ୍ତ ମୋଟ ୩୭ଟି ସିରିଜ ଅନୁଷ୍ଠିତ ହୋଇଛି। ଏଥିରେ ୧୫୭ଟି ମ୍ୟାଚ ଖେଳାଯାଇ ଥିବାବେଳେ ଇଂଲଣ୍ଡ ୪୯ଟି ମ୍ୟାଚ ଜିତିଛି ଏବଂ ଓ୍ବେଷ୍ଟଇଣ୍ଡିଜ ୫୭ଟି ଟେଷ୍ଟରେ ବିଜୟଲାଭ କରିଛି। ଅବଶିଷ୍ଟ ୫୧ଟି ଟେଷ୍ଟ ଡ୍ର ରହିଛି। ଏହା ପୂର୍ବରୁ ୨୦୧୭ରେ ଓ୍ବେଷ୍ଟଇଣ୍ଡିଜ ଦଳ ଶେଷଥରପାଇଁ ଇଂଲଣ୍ଡ ଗସ୍ତରେ ଆସି ୩ ମ୍ୟାଚବିଶିଷ୍ଟ ସିରିଜ ଖେଳିଥିଲା। ସେତେବେଳେ ଇଂଲଣ୍ଡ ୨-୧ରେ ସିରିଜ ଜିତିନେଇଥିଲା। କରୋନା ଭାଇରସ ସଂକ୍ରମଣଜନିତ କଟକଣା ଯୋଗୁ ଏଥର ଉଭୟ ଦଳ ପର୍ଯ୍ୟାପ୍ତ ଅଭ୍ୟାସ ସୁଯୋଗ ପାଇ ନାହାନ୍ତି। ତେଣୁ ଆଗାମୀ ଟେଷ୍ଟ ସିରିଜ ରୋମାଞ୍ଚକ ହେବା ଆଶା କରାଯାଏ।
