ଲୋଇସିଂହା,୧୨।୮(ସୁଶାନ୍ତ ବାରିକ):ସ୍ବାଧୀନତା ଦିବସ ପୂର୍ବରୁ ବଲାଙ୍ଗୀର ଜିଲା ଲୋଇସିଂହା ଅଞ୍ଚଳବାସୀଙ୍କ ପାଇଁ ବଡ ଖୁସି ଖବର ଆସିଛି। ଲୋଇସିଂହା ଥାନା ହୀରାପୁର ଛକ ଅଞ୍ଚଳରେ ଚିହ୍ନଟ ଜାଗାରେ ହିଁ ଇଞ୍ଜିନିୟରିଂ କଲେଜ ସ୍ଥାପନ ପାଇଁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଅନୁମୋଦନ ପ୍ରଦାନ କରିଥିବା ବିଶ୍ୱସ୍ତ ସୂତ୍ରରୁ ଜାଣିବାକୁ ମିଳିିଛି।
ପ୍ରକାଶ ଯେ, ଦୀର୍ଘ ଦିନ ଧରି ଲୋଇସିଂହା ଅଞ୍ଚଳରେ ଏକ ଉଚ୍ଚ ଶିକ୍ଷାନୁଷ୍ଠାନ ସ୍ଥାପନ ପାଇଁ ଦାବି ହୋଇ ଆସୁଥିଲା। ନିକଟରେ ରାଜ୍ୟ ସରକାରଙ୍କ ପକ୍ଷରୁ ଲୋଇସିଂହାରେ ଏକ ଇଞ୍ଜିନିୟରିଂ କଲେଜ ସ୍ଥାପନ ପାଇଁ ପ୍ରସ୍ତାବ ହୋଇଥିଲା। ଏହାପରେ ପ୍ରସ୍ତାବିତ କଲେଜ ପାଇଁ ଜିଲା ପ୍ରଶାସନ ପକ୍ଷରୁ ଜାଗା ଚିହ୍ନଟ ପ୍ରକ୍ରିୟା ଆରମ୍ଭ ହୋଇଥିଲା। ଗତ ମେ ଶେଷ ସପ୍ତାହରେ ବଲାଙ୍ଗୀର ଜିଲାପାଳ ଗୌରବ ଶିବାଜୀ ଇସଲୱାର, ଉପଜିଲାପାଳ ଆଲୋକ ପଟେଲ ଏବଂ ସ୍ଥାନୀୟ ରାଜସ୍ବ କର୍ମଚାରୀ ଲୋଇସିଂହା ତହସିଲ ଅଧୀନ ହୀରାପୁର ଛକ ନିକଟରେ ଥିବା ବିସ୍ତୀର୍ଣ୍ଣ ଜାଗାକୁ ପରିଦର୍ଶନରେ ଯାଇଥିବା ବେଳେ ପ୍ରଥମେ ସେଠାରେ ଜାଗା ଚିହ୍ନଟ କରାଯାଇଥିଲା। ପରବର୍ତ୍ତୀ ସମୟରେ ବ୍ଲକର ଆଭ୍ୟନ୍ତରୀଣ ଅଞ୍ଚଳରେ ଥିବା ଏକ ଜାଗାକୁ ଅଧିକାରୀମାନେ ପରିଦର୍ଶନ କରିଥିଲେ। ଏହା ଜଣାପଡିବା ପରେ ଇଞ୍ଜିନିୟରିଂ କଲେଜ ଅନ୍ୟତ୍ର ସ୍ଥାପନ ମସୁଧାକୁ ନେଇ ସ୍ଥାନୀୟ ବୁଦ୍ଧିଜୀବୀ,ଶିକ୍ଷାବିତ୍ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା। ବଲାଙ୍ଗୀର ପଟରୁ ଲୋଇସିଂହା ବ୍ଲକ ମୁଖ୍ୟାଳୟ ୩ କିମି ପୂର୍ବରୁ ହୀରାପୁର ଛକ ପଡୁଥିବା ବେଳେ ଏହା ୨୬ ନଂ ଜାତୀୟ ରାଜପଥ କଡରେ ଅବସ୍ଥିତ। ରେଳ ଷ୍ଟେଶନର ଦୂରତା ପ୍ରାୟ ୩ କିମି ହେବ। ଯାତାୟତ ଦୃଷ୍ଟିରୁ ସୁବିଧା ହେବା ସହିତ ଉପଯୁକ୍ତ ଜମି ମଧ୍ୟ ଉପଲବ୍ଧ ରହିଛି। ଜାତୀୟ ରାଜପଥ ସହ ସଂଯୋଗ ଥିବାରୁ ଛାତ୍ରୀଛାତ୍ର, ଶିକ୍ଷକ ଓ କର୍ମଚାରୀମାନଙ୍କ ଯିବାଆସିବାରେ କୌଣସି ଅସୁବିଧା ହେବନାହିଁ।
ଇଞ୍ଜିନିୟରିଂ କଲେଜ ପାଇଁ ହୀରାପୁର ଛକ ଚିହ୍ନଟ ଜାଗା ଉପଯୁକ୍ତ ବୋଲି ବୁଦ୍ଧିଜୀବୀ ଓ ଶିକ୍ଷାପ୍ରେମୀ ମତପୋଷଣ କରିଥିଲେ। ଏନେଇ ଗତ ଜୁନ ୨ ତାରିଖରେ ଧରିତ୍ତ୍ରୀରେ ‘ଇଞ୍ଜିନିୟରିଂ କଲେଜ ପାଇଁ ହୀରାପୁର ଛକ ବିହ୍ନଟ ଜାଗା ଉପଯୁକ୍ତ’ ଶୀର୍ଷକ ଏକ ଖବର ପ୍ରକାଶ ପାଇଥିଲା। ବିଶ୍ୱସ୍ତ ସୂତ୍ରରୁ ଜଣାପଡିଛି ଯେ, ସୋମବାର ମୁଖ୍ୟମନ୍ତ୍ରୀ ଇଞ୍ଜିନିୟରିଂ କଲେଜ ପାଇଁ ହୀରାପୁର ଛକ ସ୍ଥାନକୁ ଅନୁମୋଦନ କରିଛନ୍ତି। ନିକଟରେ ରାଜ୍ୟ ସରକାର ଲୋଇସିଂହାକୁ ଏନଏସି ମାନ୍ୟତା ଦେଇଥିବା ବେଳେ କାର୍ଯ୍ୟ ଆରମ୍ଭ ହୋଇଛି। ହୀରାପୁର ଛକରେ ଇଞ୍ଜିନିୟରିଂ କଲେଜ ସ୍ଥାପନ ହେଲେ ଛାତ୍ରୀଛାତ୍ର ନିଜ ଅଞ୍ଚଳରେ ବୈଷୟିକ ଶିକ୍ଷା ହାସଲର ସୁଯୋଗ ପାଇପାରିବେ। ଏଥିସହ ଶିକ୍ଷା, ରୋଜଗାର ଓ ଅଞ୍ଚଳରେ ଆର୍ଥତ୍କ ବିକାଶରେ ଏହି ଅନୁଷ୍ଠାନ ଗୁରୁତ୍ୱପୂର୍ଣ୍ଣ ଭୂମିକା ନେବ ବୋଲି ଅଞ୍ଚଳବାସୀ ଆଶା ବ୍ୟକ୍ତ କରିଛନ୍ତି। ଏହାକୁ ସ୍ଥାନୀୟ ଲୋକେ ସ୍ବାଗତ କରିବା ସହ ଶୀଘ୍ର ଭିତ୍ତିଭୂମି ନିର୍ମାଣ ଓ ଶିକ୍ଷାଦାନ ଆରମ୍ଭ କରିବାକୁ ଦାବି କରିଛନ୍ତି।
Dharitri – Odisha’s No.1 Odia Daily
