ରସୁଲପୁର,୨୩ା୨(ଡି.ଏନ.ଏ.): ରସୁଲପୁର ବ୍ଲକ ଅନ୍ତର୍ଗତ ବାରବାଟୀ ନିକଟସ୍ଥ ବ୍ରାହ୍ମଣୀ ନଦୀଠାରୁ ଖଣ୍ଡିତର ପାର୍ଶ୍ୱସ୍ଥ ଖରସ୍ରୋତା ନଦୀ ମଧ୍ୟରେ ୧୨ କି.ମି. ପର୍ଯ୍ୟନ୍ତ ୧୬ନମ୍ବର ଜାତୀୟ ରାଜପଥ ଉପରେ ଦିନକୁ ଦିନ ଜବରଦଖଲ ବଢ଼ିବାରେ ଲାଗିଛି। ହେଲେ ଜବରଦଖଲ ହଟାଇବା ଦିଗରେ ରାଜପଥ କର୍ତ୍ତୃପକ୍ଷ, ସ୍ଥାନୀୟ ପୋଲିସ ଓ ଜିଲା ପ୍ରଶାସନ ପକ୍ଷରୁ ଗୁରୁତ୍ୱ ଦିଆଯାଉ ନାହିଁ। ଫଳରେ ରାଜପଥର ଏଭଳି ସ୍ଥିତି ଦୁର୍ଘଟଣା ମାତ୍ରାକୁ ବଢ଼ାଉଛି। ରାଜପଥ ଦେଇ ଯାତାୟାତ କରୁଥିବା ଧନଜୀବନ ପ୍ରତି ବିପଦ ବଢ଼ିବାରେ ଲାଗିଛି। ତେଣୁ ଏଥିପ୍ରତି ଜିଲା ପ୍ରଶାସନର ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।
ରାଜପଥକୁ ଅନୁପ୍ରବେଶ ମନା ବୋଲି କୁହାଯାଉଛି। ଏପରି କି ବୁଲା ଗୋରୁ, ଗାଡ଼ିମୋଟର ରାଜପଥ ମଧ୍ୟକୁ ଅବାଧ ପ୍ରବେଶକୁ ବାରଣ କରାଯାଇଛି। ଏଥି ସକାଶେ ରାଜପଥର ଉଭୟ ପାର୍ଶ୍ୱରେ ଲୁହା ପ୍ଲେଟ ବାଡ଼ା ଲଗାଯାଇଛି। ରାଜପଥ ପାର୍ଶ୍ୱସ୍ଥ ଗଁା ଲୋକଙ୍କ ସୁରକ୍ଷିତ ଯାତାୟାତ ପାଇଁ ରାଜପଥ କର୍ତ୍ତୃପକ୍ଷଙ୍କ ପକ୍ଷରୁ ଏକାଧିକ ଓଭର ବ୍ରିଜ, କାର୍ଟ ଅଣ୍ଡର ପାସ(ସିୟୁପି), ଭେଇକିଲ ଅଣ୍ଡର ପାସ(ଭିୟୁପି) ନିର୍ମାଣ କରାଯାଇଛି। ମାତ୍ର ଏ ସବୁ ସତ୍ତ୍ୱେ ରାଜପଥରୁ ଜବରଦଖଲ ଉଚ୍ଛେଦ ହୋଇପାରୁନାହିଁ। ବାରବାଟୀଠାରେ ରାଜପଥ ଉପରେ ଦୈନିକ ପରିବାହାଟ ବସୁଛି। ଏହାଛଡ଼ା ୧୨ କି.ମି. ଲମ୍ବ ରାଜପଥର ଉଭୟ ପାର୍ଶ୍ୱରେ ତରଭୂଜ, ପଇଡ଼, ଚା’ପାନ, ଜଳଖିଆ ଦୋକାନ, ଠେଲାଗାଡ଼ି ଓ ହୋଟେଲ ଆଦି ବ୍ୟବସାୟ ଚାଲିଛି। ରାଜପଥ ଦେଇ ଯାଉଥିବା ଯାତ୍ରୀ ରାସ୍ତାରେ ଗାଡ଼ିଗୁଡିକୁ ବେଆଇନ ଭାବେ ପାର୍କିଂକରି ବିଭିନ୍ନ ସାମଗ୍ରୀ କିଣିବା ସହ ଜଳଖିଆ ଓ ମିଲ୍ ଖାଉଛନ୍ତି। ଚା’ ମଧ୍ୟ ପିଉଛନ୍ତି। ଏଭଳି ସ୍ଥିତି ଦୁର୍ଘଟଣାକୁ ଆମନ୍ତ୍ରଣ କରୁଛି। ହୋଟେଲଗୁଡ଼ିକ ସମ୍ମୁଖରେ ଘଣ୍ଟାଘଣ୍ଟା ଧରି ବେଆଇନ ପାର୍କିଂ ଯୋଗୁ ଦୈନିକ ଅଧିକାଂଶ ଦୁର୍ଘଟଣା ଘଟୁଛି। ମର୍ମନ୍ତୁଦ ସଡ଼କ ଦୁର୍ଘଟଣାରେ ଅନେକ ମୂଲ୍ୟବାନ ଜୀବନ ଚାଲି ଯାଉଛି। ଗତ ଜାନୁୟାରୀରେ ରାଜପଥର ଗୋପାଳପୁର ଛକ ନିକଟରେ ଘଟିଥିବା ଦୁର୍ଘଟଣାକୁ ଏକ ଉଦାହରଣ ଭାବରେ ନିଆଯାଇ ପାରେ। ଏଠାରେ ଟ୍ରକ୍ର ବେଆଇନ ପାର୍କିଂ ଯୋଗୁ ଦୁର୍ଘଟଣା ଘଟିଥିଲା। ଏଥିରେ ଘଟଣା ସ୍ଥଳରେ ୨ କାର୍ ଯାତ୍ରୀ ପ୍ରାଣ ହରାଇଥିଲେ। ୩ରୁ ଊର୍ଦ୍ଧ୍ୱ ବ୍ୟକ୍ତି ଗୁରୁତର ହୋଇଥିଲେ। ସଡ଼କ ଦୁର୍ଘଟଣା ଯୋଗୁ ଅଧିକାଂଶ ବ୍ୟକ୍ତିଙ୍କ ମୃତ୍ୟୁ ଘଟୁଛି। ମୃତକଙ୍କ ମଧ୍ୟରେ ଯୁବକମାନଙ୍କ ସଂଖ୍ୟା ଅଧିକ ବୋଲି ଜଣାପଡ଼ିଛି। ଜବରଦଖଲ ଏକ ଅପରାଧ ହୋଇଥିଲେ ବି ଲୋକେ ଏଥିରୁ ନିବୃତ୍ତ ରହୁନାହାନ୍ତି।
ହେଲେ ଏ ସବୁ ପ୍ରଶାସନିକ ଅଧିକାରୀ ଦେଖି ନ ଦେଖିବା ଭଳି ହେଉଛନ୍ତି। ଅନ୍ୟପକ୍ଷରେ ସ୍ଥାନୀୟ ପୋଲିସର କୋହଳ ମନୋଭାବ ଯୋଗୁ ରାଜପଥ ଉପରେ ଜବରଦଖଲ ବଢୁଛି ବୋଲି ଅଭିଯୋଗ ହେଉଛି। ଏ ସମ୍ପର୍କରେ ରାଜପଥ ପ୍ରକଳ୍ପ ନିର୍ଦ୍ଦେଶକ ଜେ.ପି. ବର୍ମାଙ୍କୁ ପଚାରିବାରୁ ସେ ଜିଲା ପ୍ରଶାସନକୁ ଦୋଷ ଦେଇଛନ୍ତି। ସେ କହିଛନ୍ତି, ରାଜପଥ ଜବରଦଖଲ କରାଯାଇ ବ୍ୟବସାୟ ହେଉଥିବା ଖବର ସମ୍ପର୍କରେ ସେ ଅବଗତ ଅଛନ୍ତି। ରାଜପଥ ଉପରେ ଯେକୌଣସି ଜବରଦଖଲ ବେଆଇନ। ତାହାକୁ ହଟାଇବା ପାଇଁ ନିର୍ଦ୍ଦେଶକଙ୍କ କାର୍ଯ୍ୟାଳୟ ପକ୍ଷରୁ ଯାଜପୁର ଜିଲାପାଳଙ୍କୁ ଚିଠି ଲେଖାଯାଇଛି। ଏହା ସତ୍ୱେ ଜିଲା ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଉନାହିଁ। ତେଣୁ ଏ ନେଇ ତାଙ୍କ କାର୍ଯ୍ୟାଳୟ ପକ୍ଷରୁ ପୁଣି ରିମାଣ୍ଡର ଦିଆଯିବ। ତଥାପି କୌଣସି ପଦକ୍ଷେପ ନିଆ ନ ଗଲେ ଉପରିସ୍ଥ ଅଧିକାରୀଙ୍କୁ ଚିଠି ଜରିଆରେ ଅବଗତ କରାଯିବ ବୋଲି ସେ ସୂଚନା ଦେଇଛନ୍ତି। ଏ ସମ୍ପର୍କରେ ଜିଲା ପ୍ରଶାସନର ପ୍ରତିକ୍ରିୟା ମିଳି ପାରିନାହିଁ।
