ଜଗତ୍ସିଂହପୁର ଅଫିସ, ୨୯ା୧୦: ଲୋକଙ୍କ ସାମାଜିକ, ଆର୍ଥିକ ଏବଂ ପରିବେଶଗତ ଉନ୍ନତି ପାଇଁ ସଂଯୁକ୍ତ ରାଷ୍ଟ୍ରସମୂହ ୨୦୧୫ରେ ୧୭ଟି ପ୍ରସଙ୍ଗ ଉପରେ ଗୁରୁତ୍ୱାରୋପ କରିଥିଲେ। ୨୦୩୦ ସୁଦ୍ଧା ଏହି ଲକ୍ଷ୍ୟ ପୂରଣ ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଥିଲା। ଏହାକୁ ସଷ୍ଟେନେବୁଲ ଡେଭେଲପମେଣ୍ଟ ଗୋଲ୍ସ (ଏସ୍ଡିଜି) ବୋଲି କୁହାଯାଉଛି। ରାଜ୍ୟ ସରକାର ଓଡ଼ିଶାର ଦୀର୍ଘସ୍ଥାୟୀ ବିକାଶ ପାଇଁ ସଂଯୁକ୍ତ ରାଷ୍ଟ୍ର ସମୂହ ଦ୍ୱାରା ସ୍ଥିରୀକୃତ ଏସ୍ଡିଜି ୨୦୩୦ ଲକ୍ଷ୍ୟ ପୂରଣ ପାଇଁ ପଦକ୍ଷେପ ନେଉଛନ୍ତି। ଏହାକୁ ବାସ୍ତବ ରୂପାୟନ ଦେବା ପାଇଁ ଜଗତ୍ସିଂହପୁର ଜିଲା ପ୍ରଶାସନ ପକ୍ଷରୁ ପଦକ୍ଷେପ ନିଆଯାଇଛି। ଏନେଇ ଶୁକ୍ରବାର ଜିଲା ପରିଷଦ ସମ୍ମିଳନୀ କକ୍ଷରେ ଜିଲାର ସରକାରୀ ଅଧିକାରୀମାନଙ୍କୁ ନେଇ ୨ ଦିନିଆ ପ୍ରଶିକ୍ଷଣ କାର୍ଯ୍ୟକ୍ରମ ଆରମ୍ଭ ହୋଇଛି। ଏହାକୁ ଜିଲାପାଳ ପାରୁଲ ପଟୱାରୀ ଉଦ୍ଘାଟନ କରି କହିଥିଲେ, ସାରା ରାଜ୍ୟରେ ବର୍ତ୍ତମାନ ବିଭିନ୍ନ ଜନକଲ୍ୟାଣ ଯୋଜନା ଆରମ୍ଭ ହୋଇଛି । ଯାହାର ଫଳ ଲୋକମାନେ ପାଉଛନ୍ତି। କିନ୍ତୁ ଯୋଜନାଗୁଡିକର ଦୀର୍ଘସ୍ଥାୟୀ ଫଳ ନିମନ୍ତେ ଗ୍ରାମ ପଞ୍ଚାୟତଗୁଡିକୁ ଏକକ ଭାବେ ନେବାକୁ ପଡିବ। ପଞ୍ଚାୟତବାସୀଙ୍କ ଉନ୍ନତି ଜିଲା ବିକାଶରେ ସହାୟକ ହେବ ବୋଲି କହିଥିଲେ। କର୍ମଶାଳାରେ ସିୱାଇଏସ୍ଡିର ମେଣ୍ଟର ତଥା କୋଫାଉଣ୍ଡର ଜଗଦାନନ୍ଦ ଯୋଗଦେଇ କହିଥିଲେ, ୧୭ଟି ଦୀର୍ଘସ୍ଥାୟୀ ବିକାଶ ଲକ୍ଷ୍ୟକୁ ୨୦୩୦ ସୁଦ୍ଧା ପୂରଣ କରିବା ପାଇଁ ଜାତିସଂଘର ୧୯୩ଟି ସଦସ୍ୟ ରାଷ୍ଟ୍ର ପରିକଳ୍ପନା କରିଥିଲେ। ସେଥିମଧ୍ୟରେ ସାରା ବିଶ୍ୱରୁ ଗରିବ ହଟାଇବା ହେଉଛି ପ୍ରମୁଖ ଲକ୍ଷ୍ୟ। କ୍ଷୁଧାମୁକ୍ତ ବିଶ୍ୱ ଗଠନ ପାଇଁ ବିଭିନ୍ନ କାର୍ଯ୍ୟକ୍ରମ ହାତକୁ ନିଆଯାଇଛି ବୋଲି କହିଥିଲେ । କର୍ମଶାଳାରେ ରାଜ୍ୟ ଯୋଜନା ଓ ସଂଯୋଜନା ବିଭାଗର କାପାସିଟି ବିଲ୍ଡିଂ ଏକ୍ସପର୍ଟ ସରୋଜ କୁମାର ଦାଶ ଯୋଗଦେଇ କହିଥିଲେ, ଗରିବୀ ହଟାଇବା ସହ ସୁନ୍ଦର ପୃଥିବୀ ଗଠନ ଉପରେ ପରିକଳ୍ପନା କରାଯାଇଛି। ଏନେଇ ଲୋକଙ୍କ ଭଲ ସ୍ବାସ୍ଥ୍ୟ, ଉତ୍ତମମାନର ଶିକ୍ଷା, ସ୍ବଚ୍ଛ ପାନୀୟ ଜଳ ଓ ପରିମଳ ବ୍ୟବସ୍ଥା, ଲିଙ୍ଗଗତ ସମାନତା ରକ୍ଷା ଉପରେ ଗୁରୁତ୍ୱାରୋପ କରାଯାଉଛି। ଅଭିନବ ଉପାୟରେ ସଂରଚନା କରିବା ସହ ଦାୟିତ୍ୱ ସମ୍ପନ୍ନ ଭାବେ ଉତ୍ପାଦନ ଓ ବ୍ୟବହାର କରିବାକୁ ପଡିବ। ଅର୍ଥନୈତିକ ଅଭିବୃଦ୍ଧି ସାଙ୍ଗକୁ ସୁଲଭ ମୂଲ୍ୟରେ ଶକ୍ତି, ଶିଳ୍ପ, ଜଳବାୟୁ କାର୍ଯ୍ୟ ପ୍ରକ୍ରିୟା ଠିକ ଭାବେ ପରିଚାଳନା କରିବା ଆବଶ୍ୟକ। ଜଳ ଓ ସ୍ଥଳରେ ଜୀବନ ଶାନ୍ତିରେ କଟିବା ଉପରେ ଧ୍ୟାନ ଦେବାକୁ ପଡିବ। ଏହି ସଫଳତା ପାଇଁ ଦୃଢ ଇଚ୍ଛାଶକ୍ତିର ଆବଶ୍ୟକତା ରହିଛି ବୋଲି ଦାଶ କହିଥିଲେ। କର୍ମଶାଳାରେ ଜିଲାସ୍ତରୀୟ ଅଧିକାରୀ, ବିଡିଓ, ସ୍ବେଚ୍ଛାସେବୀ ଅନୁଷ୍ଠାନର କର୍ମକର୍ତ୍ତା, ଶିକ୍ଷାବିତ୍, ପରିବେଶବିତ୍, ସରପଞ୍ଚ, ରାଜ୍ୟ ଯୋଜନା ଓ ସଂଯୋଜନା ବିଭାଗର କର୍ମକର୍ତ୍ତା ପ୍ରମୁଖ ଉପସ୍ଥିତ ଥିଲେ। ଶେଷରେ ରାଜ୍ୟ ଯୋଜନା ଓ ସଂଯୋଜନା ବିଭାଗର ସହକାରୀ ନିର୍ଦ୍ଦେଶିକା ଡ. ଉପାସନା ମହାପାତ୍ର ଧନ୍ୟବାଦ ଦେଇଥିଲେ ।
