ବାରିପଦା ଅଫିସ/ଠାକୁରମୁଣ୍ଡା, ୩୧।୧୦ଡି.ଏନ.ଏ.) ମୟୂରଭଞ୍ଜ ଜିଲା କରଞ୍ଜିଆ ବନଖଣ୍ଡ ଅଧୀନରେ ଥିବା ଦୁଧିଆଣୀ ଓ କରଞ୍ଜିଆ ରେଞ୍ଜରେ ହାତୀପଲ ପଶି ବ୍ୟାପକ କ୍ଷୟକ୍ଷତି ଚଳାଇଛନ୍ତି। ଖାଦ୍ୟ ଅନ୍ବେଷଣରେ ଆସିଥିବା ୫୮ଟି ହାତୀ ବିଭିନ୍ନ ଦଳରେ ବିଭକ୍ତ ହୋଇ ଫସଲ ନଷ୍ଟ କରିବା ସହିତ ଗାଁ ଗଣ୍ଡାରେ ପଶି ଉପତ୍ାତ କରୁଛନ୍ତି। ଫଳରେ ୨୦ରୁ ଉର୍ଦ୍ଧ୍ୱ ଗ୍ରାମର ଜନସାଧାରଣ ଆତଙ୍କିତ ଅବସ୍ଥାରେ ରହୁଛନ୍ତି। ଦୀର୍ଘ ଦିନ ଧରି ଝାଡ଼ଖଣ୍ଡ ଓ ଶିମିଳିପାଳରୁ ଆସିଥିବା ହାତୀମାନେ ଧାନ କ୍ଷେତରେ ପଶି ପାଚିଲା ଧାନ ଖାଇବା ସହିତ କ୍ଷେତ ଗୁଡିକ ଜଗି ରହୁଛନ୍ତି।
ପାଚିଲା ଧାନକୁ ବଞ୍ଚାଇବା ପାଇଁ ମଣିଷ ଓ ହାତୀ ମଧ୍ୟରେ ଲଢେଇ ହେଉଛି।
ସୂଚନା ମୁତାବକ, ଝାଡଖଣ୍ଡରୁ ଆସିଥିବା ୪୭ଟି ହାତୀ ମଧ୍ୟରୁ ଦୁଧିଆଣୀ ରେଞ୍ଜ ମନୋହରପୁର ଅଞ୍ଚଳରେ ୨୫ଟି, ବୁଢୀପାଟରେ ୨୦ଟି ଓ ଟଙ୍ଗାବିଲାରେ ୨ଟି ହାତୀ ଥିବା ବେଳେ ଠାକୁରମୁଣ୍ଡା ଅଞ୍ଚଳରେ ଶିମିଳିପାଳରୁ ଆସିଥିବା ୧୧ଟି ହାତୀ ବିଭିନ୍ନ ସ୍ଥାନରେ ରହିଛନ୍ତି। ଦିନ ତମାମ ଜଙ୍ଗଲରେ ରହିବା ପରେ ସଞ୍ଜ ନଇଁଲେ ହାତୀମାନେ ଚଳପ୍ରଚଳ କରି ଶୁକୃଳୀ ବ୍ଳକର ଘର୍ମାବେଡା, ସୁନାପୋଷି, ହଳଦିଆ, କାଞ୍ଜିଆମ, ପୋଖରିଆ, ବାରିଆ, ଶିରମଣିପୁର, ଚତୁରାଞ୍ଜଳୀ ଓ ଯଶିପୁର ବ୍ଳକର ବୁଢୀପାଳ, ପାହାଡିପୁରା, ଧାତିକିଆ, ଯାମକେଶର, ବାଉଁଶନଳୀ, ଠାକୁରମୁଣ୍ଡା ବ୍ଳକର କେଶିଡିହା, ଚମ୍ପାଝର, ମିଟୁଆଣି ଆଦି ଗ୍ରାମରେ ପ୍ରବେଶ କରୁଛନ୍ତି। ଶିମିଳିପାଳ ଜଙ୍ଗଲ ଭିତରୁ ଚାଲି ଆସିଥିବା ୭ ଟିକିଆ ହାତୀ ପଲ ଶୁକ୍ରବାର ବିଳମ୍ବିତ ରାତିରେ ଠାକୁରମୁଣ୍ଡା ରେଞ୍ଜ ଅନ୍ତର୍ଗତ କେଶଡ଼ିହା ଗ୍ରାମର ବୁରୁ ସାହିରେ ପଶି ଚାଷୀଙ୍କ ଧନ ଫସଲ ନଷ୍ଟ କରିଦେଇଛନ୍ତି। ଲୋକମାନେ ହାତୀକୁ ଦେଖି ଭୟଭୀତ ହେଉଥିବା ବେଳେ ଧାନ କ୍ଷେତକୁ ବଞ୍ଚାଇବାକୁ ଯାଇ ହାତୀ ଓ ମଣିଷ ମୁହାଁମୁହିଁ ହେବାକୁ ପଡିଛି। ହାତୀ ପାଇଁ ରାତି ତମାମ ବିଦ୍ୟୁତକାଟ୍ କରାଯାଉଥିବାରୁ ଲୋକମାନେ ଅନ୍ଧାରରେ ରହିବାକୁ ସୁରକ୍ଷିତ ମଣୁନାହାନ୍ତି। ଏପରିକି ହାତୀ ପାଇଁ ରାତି ହେଲେ ଘରୁ ବାହାରିବା ନିରାପଦ ବୋଲି ଅଞ୍ଚଳର ମଦନ ମହାନ୍ତ, ସୁରେଶ ମହାନ୍ତ କହିଛନ୍ତି। ତେବେ ହାତୀର ଗତିବିଧି ଉପରେ ନଜର ରଖିବା ପାଇଁ ଆବଶ୍ୟକ କର୍ମଚାରୀ ଅଭାବ ସହିତ ଗ୍ରାମବାସୀଙ୍କ ମଧ୍ୟରେ ଉତ୍ତମ ସମ୍ପର୍କ ନ ଥିବାରୁ ହାତୀ ପାଇଁ ବିଭିନ୍ନ ସମସ୍ୟା ଉପୁଜୁଛି। ହାତୀ ଘଉଡାଇବା ପାଇଁ ନିୟମ ନ ଥିବାରୁ ବନବିଭାଗ କେବଳ ଗତିପଥ ବଦଳାଇବାକୁ ଚେଷ୍ଟା ଜାରି ରଖିଛି ା ହାତୀ ଗତବିଧିକୁ ଲକ୍ଷ୍ୟ କରି ବିଭାଗ ପକ୍ଷରୁ ଗାଁ ଗୁଡିକରେ ଡାକବାଜି ଯନ୍ତ୍ର ସାହାଯ୍ୟରେ ସଚେତନ କରାଯାଉଛି। ତେବେ ବର୍ଷ ତମାମ ଏହି ଅଞ୍ଚଳରେ ହାତୀମାନେ ରହୁଥିବା ବେଳେ ଜଙ୍ଗଲକୁ ଫେରୁ ନାହାନ୍ତି। ବିଭାଗ ପକ୍ଷରୁ ଉଚିତ ପଦକ୍ଷେପ ଗ୍ରହଣ କଲେ ହାତୀ ଓ ମଣିଷ ଲଢେଇରେ ସାମାନ୍ୟତମ ସୁଧାର ଆସିପାରନ୍ତା ବୋଲି ପରିବେଶବିତ୍ ମାନେ ମତପ୍ରକାଶ କରିଛନ୍ତି ା
