ଢେଙ୍କାନାଳ ଅଫିସ, ୪।୭ – କିଛି ଦିନର ବ୍ୟବଧାନ ପରେ ଢେଙ୍କାନାଳ ଜିଲାରେ ପୁଣିଥରେ ହାତୀ ଉପଦ୍ରବ ଆରମ୍ଭ ହୋଇଛି। ଷଡ଼ଙ୍ଗୀ ରେଞ୍ଜ୍ ଯୋରନ୍ଦା ସେକ୍ସନ ଅଧୀନ ରୁପାବଳିଆ ଜଙ୍ଗଲ ତଳି ଅଞ୍ଚଳରେ ୫ଦିନ ହେଲା ଏକ ହାତୀପଲ ଆତଙ୍କ ସୃଷ୍ଟି କରି ଚାଲିଛନ୍ତି। ସେମାନଙ୍କ ଉପଦ୍ରବରେ ବ୍ୟାପକ ଫସଲ ନଷ୍ଟ ହୋଇଥିବାବେଳେ ଚାଷୀମାନେ ଚିନ୍ତାରେ ପଡିଛନ୍ତି। ଅଞ୍ଚଳବାସୀଙ୍କ କହିବା କଥା, ଗୋଟିଏ ପଲରେ ୫ ହାତୀ କିଛିଦିନ ହେଲା ଗ୍ରାମ ନିକଟବର୍ତ୍ତୀ ଅଞ୍ଚଳରେ ଚଲାବୁଲା କରୁଛନ୍ତି। ସେଥିରୁ ଗୋଟିଏ ହାତୀ ମହାପଦା ଗ୍ରାମର ହିମାଦ୍ରୀ ନାଥଙ୍କ ୧ ଏକର ଜମିରେ ହୋଇଥିବା ପରିବା ଫସଲ ନଷ୍ଟ କରିଦେଇଛି। ବନ କର୍ମଚାରୀ ପହଞ୍ଚତ୍ ହାତୀ ଘଉଡ଼ାଇବାକୁ ଉଦ୍ୟମ ଜାରି ରଖିଛନ୍ତି। ଏ ସଂକ୍ରାନ୍ତରେ ରେଞ୍ଜର ଗୌତମ ପ୍ରଧାନ କୁହନ୍ତି, ଯୋରନ୍ଦା ସେକ୍ସନର ବନ କର୍ମଚାରୀ ଉପଦ୍ରୁତ ଅଞ୍ଚଳକୁ ଯାଇ ହାତୀଙ୍କୁ ଘଉଡ଼ାଇବା ଜାରି ରଖିଛନ୍ତି। କ୍ଷତିଗ୍ରସ୍ତ ଚାଷୀ ଅଭିଯୋଗ କଲେ ତଦନୁଯାୟୀ ରିପୋର୍ଟକୁ ଡିଭିଜନ କାର୍ଯ୍ୟାଳୟକୁ ପଠାଇ ଦିଆଯିବ ବୋଲି ସେ ସୂଚନା ଦେଇଛନ୍ତି।
