ଚୌଦ୍ୱାର,୧୮ା୧୨(ଡି.ଏନ୍.ଏ): ଟାଙ୍ଗୀ-ଚୌଦ୍ୱାର ବ୍ଲକ ଶାଳଗାଁ ପଞ୍ଚାୟତ ଅଧୀନ ଶାଳଗାଁ ଗ୍ରାମରେ ଗୁରୁବାର ଭୋରରୁ ହାତୀ ଉପଦ୍ରବ ଦେଖିବାକୁ ମିଳିଥିଲା। ୧୬ଟିକିଆ ହାତୀପଲ ଧାନବିଲରେ ପଶି ଫସଲ ନଷ୍ଟ କରୁଥିବା ଦେଖି ସ୍ଥାନୀୟ ଲୋକେ ଭୟଭୀତ ହୋଇପଡିଥିଲେ। ଏ ସମ୍ପର୍କରେ ଖବରପାଇ ଚୌଦ୍ୱାର ଫରେଷ୍ଟ କାର୍ଯ୍ୟାଳୟର କର୍ମଚାରୀ ଘଟଣାସ୍ଥଳରେ ପହଞ୍ଚତ୍ ସ୍ଥାନୀୟ ଲୋକଙ୍କ ସହାୟତାରେ ହାତୀଙ୍କୁ ଘଉଡାଇଥିଲେ। ଫଳରେ ହାତୀପଲ ନିକଟସ୍ଥ ହନୁମାନହୁଡା ଜଙ୍ଗଲକୁ ପଳାଇ ଯାଇଥିଲେ। ହାତୀଙ୍କ ଗତିବିଧି ଉପରେ ବନ କର୍ମଚାରୀମାନେ ଦିନତମାମ ନଜର ରଖିଥିଲେ। ହାତୀଙ୍କ ଗତିବିଧି ଉପରେ ନଜର ରଖାଯାଇଛି। ସେମାନଙ୍କୁ ଜଙ୍ଗଲାଭିମୁଖୀ କରାଯିବା ପାଇଁ ଉଦ୍ୟମ ଜାରି ରହିଥିବା ଚୌଦ୍ୱାର ଫରେଷ୍ଟର ପୁରୁଷୋତ୍ତମ ସାହୁ କହିଛନ୍ତି। ସୂଚନାଯୋଗ୍ୟ, କଟକ ବନଖଣ୍ଡ ଅନ୍ତର୍ଗତ ଡାଳିଯୋଡା ସଂରକ୍ଷିତ ବନାଞ୍ଚଳ ଓ ଏହାର ଆଖପାଖ ଗ୍ରାମାଞ୍ଚଳରେ ଚନ୍ଦକା ଜଙ୍ଗଲରୁ ଆସିଥିବା ଏହି ହାତୀପଲ କିଛିଦିନ ହେବ ଉପଦ୍ରବ ଚଳାଇଛନ୍ତି। ଗତ ୪ ତାରିଖରେ ଆଗ୍ରାହାଟ ପଞ୍ଚାୟତର କୁଜିବର ଭରାଣ୍ଡୀ ମୌଜାରେ ଜଣେ ବୃଦ୍ଧଚାଷୀଙ୍କୁ ହାତୀ ଦଳିଦେବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା। ହାତୀ ଉକ୍ତ ଅଞ୍ଚଳ ଛାଡି ଯାଉ ନ ଥିବାରୁ ଗ୍ରାମବାସୀ ଆତଙ୍କିତ ଅବସ୍ଥାରେ ଦିନ କାଟୁଛନ୍ତି। ତୁରନ୍ତ ଏହାର ସ୍ଥାୟୀ ପ୍ରତିକାର କରିବା ପାଇଁ ସ୍ଥାନୀୟ ଅଞ୍ଚଳବାସୀ ଦାବି କରିଛନ୍ତି।
