ଖୋର୍ଦ୍ଧା ଅଫିସ,୧୩ା୧୨: ଖୋର୍ଦ୍ଧା ବିଦ୍ୟୁତ୍ ସବ୍ଡିଭିଜନ ଅଧୀନରେ କାର୍ଯ୍ୟରତ ଜଣେ କର୍ମଚାରୀ ଉପଭୋକ୍ତାଙ୍କ ଠାରୁ ଲକ୍ଷାଧିକ ଟଙ୍କା ଲୁଟ୍ କରିଥିବା ଅଭିଯୋଗ ଆସିଛି। ଉକ୍ତ କର୍ମଚାରୀ ଜଣଙ୍କ ଗରିବ, ଦିନ ମଜୁରିଆଙ୍କଠାରୁ ମିଟର ବସାଇବା ଲାଗି ଟଙ୍କା ଆଦାୟ କରିବା ସହ ବେଆଇନ ଭାବେ ଘରୋଇ କମ୍ପାନୀ ଏବଂ କ୍ରଶର ୟୁନିଟ୍କୁ ଲାଇନ ଦେଇ ଆସୁଛନ୍ତି। ଏହା ଜଣାପଡ଼ିବା ପରେ ଖୋର୍ଦ୍ଧା ବ୍ଲକ କୁରାଢ଼ମଲ୍ଲ ଗ୍ରାମର କେତେଜଣ ବ୍ୟକ୍ତି ରାଜ୍ୟ ଶକ୍ତି ସଚିବଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି। ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରାଗଲେ, ବହୁ ତଥ୍ୟ ପଦାକୁ ଆସିବ ବୋଲି ଅଭିଯୋଗରେ ଉଲ୍ଲେଖ ରହିଛି।
ଅଭିଯୋଗ ଅନୁଯାୟୀ, କୁରାଢ଼ମଲ୍ଲ ଗ୍ରାମର ମଙ୍ଗଳାସାହିର କେତେଜଣ ବ୍ୟକ୍ତିଙ୍କ ମିଟର ଖରାପ ଥିବା ଦର୍ଶାଇ ସମ୍ପୃକ୍ତ କର୍ମଚାରୀ ଜଣଙ୍କ ସେମାନଙ୍କଠାରୁ ଜଣ ପିଛା ୨ହଜାରରୁ ଊର୍ଦ୍ଧ୍ୱ ଟଙ୍କା ଆଦାୟ କରି ନେଇଛନ୍ତି। ବାରମ୍ବାର ଅଭିଯୋଗ ପରେ ସେସୁ ପକ୍ଷରୁ ମାଗଣାରେ ଦିଆଯାଇଥିବା ନୂଆ ମିଟର ବସାଇଛନ୍ତି। ଦଳେଇପୁଟ ଠାରେ ଜଣେ ବ୍ୟବସାୟୀଙ୍କୁ ଚୋରାରେ ଲାଇନ ଦିଆଯାଇଛି। ସେହିପରି ଦଳେଇପୁଟ ନିକଟରେ ଥିବା ଏକ ଆଜବେଷ୍ଟସ ଘରକୁ ହୁକ ପକାଇ ଲାଇନ ଦିଆଯାଇଛି। ଏଠାରେ ଅସମାଜିକ ବ୍ୟକ୍ତିଙ୍କ ଆଡ୍ଡାସ୍ଥଳୀ ପାଲଟିବା ସହ ଏସି, ହିଟର ଓ କୁଲର ଲାଗୁଛି। ତୋଟାପଡ଼ା ଛକରୁ କଦଳୀବାଡ଼ି ପର୍ଯ୍ୟନ୍ତ ଥିବା କେତେକ କ୍ରଶର ୟୁନିଟ୍ ମାଲିକଙ୍କ ଠାରୁ ମାସିକିଆ ଟଙ୍କା ନେଇ ଲାଇନ ଦିଆଯାଇଛି। ଫଳରେ ସରକାର କୋଟି କୋଟି ଟଙ୍କା ରାଜସ୍ବ ହରାଉଛନ୍ତି। ଏଥିସହିତ ଦଳେଇପୁଟରେ କେତେଜଣ ବ୍ୟବସାୟୀଙ୍କ ଦୋକାନରେ ବିଦ୍ୟୁତ ବାଇପାସ କରାଯାଇଛି।
କେତକ ସ୍ଥାନରେ ଡିଫେକ୍ଟିିଭ ମିଟର ପରିବର୍ତ୍ତନ ଲାଗି ବିଭାଗୀୟ ନିର୍ଦ୍ଦେଶ ସତ୍ତ୍ୱେ ନୂଆ ମିଟର ଲଗାଯାଇନାହିଁ। ଡିଫେକ୍ଟିଭ ମିଟର ଲାଗିଥିଲେ ମଧ୍ୟ ସେମାନଙ୍କଠାରୁ ୧୦ହଜାର ଟଙ୍କା ପରିବର୍ତ୍ତେ ୩ ହଜାର ଟଙ୍କା ବିଲ୍ ଦିଆଯାଉଛି। ସମ୍ପୃକ୍ତ କର୍ମଚାରୀ ଜଣଙ୍କ ବେଆଇନ ଭାବେ ହୁକ ପକାଇ ରୋଷେଇ କରୁଛନ୍ତି। କୁରାଢମଲ୍ଲ ଅଞ୍ଚଳରେ ଚାଲିଥିବା କ୍ରଶର ୟୁନିଟ୍ ବିଦ୍ୟୁତ୍ କଟିଗଲେ, ତୁରନ୍ତ ମରାମତି କରାଯାଉଛି। ହେଲେ ସ୍ଥାନୀୟ ଲୋକଙ୍କ ଅଭିଯୋଗ କଲେ ଘଣ୍ଟା ଘଣ୍ଟା ଧରି ସଜଡ଼ାଯାଉନାହିଁ ବୋଲି ଉଲ୍ଲେଖ ରହିଛି। ଏ ସମ୍ପର୍କରେ ସବ୍ଡିଭିଜନ କାର୍ଯ୍ୟନିର୍ବାହୀ ଅଧିକାରୀ ମାନସ ନାୟକ କହିଛନ୍ତି, ବିଦ୍ୟୁତ୍ ଶକ୍ତି ସଚିବଙ୍କ ନିକଟରେ ଅଭିଯୋଗ ହୋଇଥିବା ନେଇ ସୂଚନା ରହିଛି। ନିକଟରେ କ୍ରାଇମବ୍ରାଞ୍ଚ ଟିମ୍ ମଧ୍ୟ ଏହି ଅଭିଯୋଗ ଉପରେ ଯାଞ୍ଚ କରିଥିଲା। ବର୍ତ୍ତମାନ ପର୍ଯ୍ୟନ୍ତ ମୋ ପାଖରେ କୌଣସି ଅଭିଯୋଗ ହୋଇନାହିଁ। ଅଭିଯୋଗ ଆସିଲେ, ଘଟଣାର ତଦନ୍ତ କରାଯିବ ବୋଲି ସେ କହିଛନ୍ତି। ଅନ୍ୟପଟେ ଅକ୍ଟୋବର ୧୪ରେ ଦଳେଇପୁଟ ଗ୍ରାମର ଜଣେ ବ୍ୟକ୍ତି କାର୍ଯ୍ୟନିର୍ବାହୀଙ୍କୁ ଘଟଣା ସମ୍ପର୍କରେ ରେଜିଷ୍ଟ୍ରି ପୋଷ୍ଟରେ ଅଭିଯୋଗ କରିଛନ୍ତି। ଏଭଳି କୌଣସି ଅଭିଯୋଗ ପାଇ ନ ଥିବା କାର୍ଯ୍ୟନିର୍ବାହୀ ଅଧିକାରୀ ନାୟକ କହିଛନ୍ତି।
