ଅତାବିରା,୫ା୬(ଯୁଧିଷ୍ଠିର ମହାପାତ୍ର):ଗ୍ରୀଷ୍ମ ସମୟରେ ବିଦ୍ୟୁତ କାଟ ହେବ ନାହିଁ ବୋଲି ସରକାର କହୁଥିବା ବେଳେ ଏହାର ବ୍ୟତିକ୍ରମ ଦେଖିବାକୁ ମିଳିଛି ବରଗଡ ଜିଲା ସରଣ୍ଡା ଅଞ୍ଚଳରେ l ସରଣ୍ଡାରେ ବାରମ୍ବାର ବିଦ୍ୟୁତ ସରବରାହ ବିଚ୍ଛିନ୍ନ ହେଉଛି। ଏବେ ପ୍ରବଳ ଗ୍ରୀଷ୍ମ ପ୍ରବାହ ଅନୁଭୂତ ହେଉଥିବା ବେଳେ ଗୁରୁବାର ବିଦ୍ୟୁତ ବିଭ୍ରାଟ ଜନ ଜୀବନକୁ ଅସ୍ତବ୍ୟସ୍ତ କରି ପକାଇଛି l
ପ୍ରକାଶ ଯେ, ଭୋଇପାଲି ଭୁଲିଆ ଛକ ପାଖରେ ଥିବା ବିଦ୍ୟୁତ ଟ୍ରାନ୍ସଫର୍ମରରୁ ସରଣ୍ଡା ଅଞ୍ଚଳର ମହାପାତ୍ର ପଡ଼ା, ଗୌରପଡା, ମନ୍ଦିର ଛକ, ଭୁଲିଆଘର ଛକ ଆଦି ଅଞ୍ଚଳକୁ ବିଦ୍ୟୁତ ସଂଚାରଣ ହୋଇଥାଏ l ଏହି ୧୦୦ କିଲୋୱାଟ ଟ୍ରାନ୍ସଫର୍ମର ଉପରେ ୧୫୦ରୁ ଅଧିକ ଉପଭୋକ୍ତା ଗତ ୧୦ ବର୍ଷରୁ ଊର୍ଦ୍ଧ୍ୱ ହେବ ନିର୍ଭର କରି ଆସୁଥିଲେ। ଏଣୁ ଏହି ଅଞ୍ଚଳରେ ଅଧିକ କିଲୋୱାଟ ଟ୍ରାନ୍ସଫର୍ମର ଲଗାଇବାକୁ ଦାବି ହୋଇ ଆସୁଥିଲା l ଗତ ଜାନୁୟାରୀ ମାସରେ ସରଣ୍ଡାର ଦ୍ୱାଦଶ ଜ୍ୟୋର୍ତିଲିଙ୍ଗ ମନ୍ଦିର ପ୍ରତିଷ୍ଠା ସମୟରେ ଆଉ ଏକ ଟ୍ରାନ୍ସଫର୍ମର ମନ୍ଦିର ପାଖ ଜାତୀୟ ରାଜପଥ କଡ଼ରେ ବସାଯାଇଥିଲା l ଫଳରେ ଦୁର୍ଦ୍ଦଶା ଦୂର ହେଲା ବୋଲି ଲୋକେ ଭାବି ନେଇଥିଲେ l ତେବେ ଗତ ମାର୍ଚ୍ଚ ମାସ ୨୦ ତାରିଖ ଦିନ ସେହି ନୂତନ ଟ୍ରାନ୍ସଫର୍ମରକୁ ଏକ ହାଇୱା ଧକ୍କା ଦେବାରୁ ତାହା ଭାଙ୍ଗି ଯାଇଥିଲା। ସେହିଠାରେ ପୂର୍ବରୁ ଥିବା ଅନ୍ୟ ଏକ ୨୫ କେଭିଏର ଟ୍ରାନ୍ସଫର୍ମର ବି ଭାଙ୍ଗି ଯାଇଥିଲା l ଦୁର୍ଘଟଣା ପରେ ପୁରୁଣା ୧୦୦ କେଭିଏ ଟ୍ରାନ୍ସଫର୍ମର ଉପରେ ସମସ୍ତ ଲୋଡ଼ ଦିଆଯାଇଛି। ସେହି ଦିନରୁ ଅଞ୍ଚଳର ଉପଭୋକ୍ତା ବାରମ୍ବାର ବିଦ୍ୟୁତ ସେବାରୁ ବଞ୍ଚତ୍ତ ହୋଇ ଡହଳବିକଳ ହେଉଛନ୍ତି l ଏପରି କି ସରଣ୍ଡା ମନ୍ଦିର ଛକରେ ଲାଗିଥିବା କେବୁଲ ଲୋଡ଼ କଣ୍ଟ୍ରୋଲ କରି ନ ପାରି ଗୁରୁବାର ପୋଡ଼ି ନଷ୍ଟ ହୋଇଯାଇଛି l ଗ୍ରାମବାସୀ ୨୫୦ କେଭିଏର ଟ୍ରାନ୍ସଫର୍ମର ଦେବାକୁ ଦାବି କରୁଥିବା ବେଳେ କେହି କର୍ଣ୍ଣପାତ କରୁ ନ ଥିବାରୁ ଗରମରେ ଆଉଟୁପାଉଟୁ ହେବାକୁ ପଡୁଛି ା ଏନେଇ ଅତାବିରା ବିଦ୍ୟୁତ ବିଭାଗ ଏସଡ଼ିଓଙ୍କୁ ପଚାରିବାରେ, ସରଣ୍ଡା ଅଞ୍ଚଳରେ ଥିବା ଟ୍ରାନ୍ସଫର୍ମରକୁ ପୁନଃ ୨୫୦ କେଭିଏ ଦେବାକୁ ପ୍ରସ୍ତାବ ଦିଆଯାଇଛି ବୋଲି କହିଥିଲେ l
Dharitri – Odisha’s No.1 Odia Daily
