ମୁମ୍ବାଇ,୧୩।୭ : ରିଜର୍ଭ ବ୍ୟାଙ୍କର ଡେପୁଟି ଗଭର୍ନର ପଦବୀ ଦୌଡ଼ରେ ୮ ପ୍ରାର୍ଥୀ ଦାବିଦାର ରହିଛନ୍ତି। କ୍ୟାବିନେଟ ସଚିବଙ୍କ ଅଧ୍ୟକ୍ଷତାରେ ଗଠିତ କମିଟି ଚଳିତ ମାସ ୨୩ରେ ଏହି ପଦବୀ ଲାଗି ସାକ୍ଷାତକାର ନେବ। ସ୍ବାସ୍ଥ୍ୟଗତ ସମସ୍ୟା କାରଣରୁ କାର୍ଯ୍ୟକାଳ ସରିବାର ୩ ମାସ ଆଗରୁ ଡେପୁଟି ଗଭର୍ନର ଭାବେ କାର୍ଯ୍ୟରତ ଏନ୍.ଏସ୍.ବିଶ୍ୱନାଥ ଅବସର ନେବା ଯୋଗୁ ଗୋଟିଏ ପଦବୀ ଖାଲି ପଡିଛି। ସାକ୍ଷାତ୍କାର ଭିଡିଓକନଫରେନ୍ସ ଦ୍ୱାରା ହେବ ବୋଲି ଜଣାପଡିଛି। ସାକ୍ଷାତ୍କାର ପରେ ଚୟନ ହୋଇଥିବା ନାମକୁ ପ୍ରଧାନମନ୍ତ୍ରୀଙ୍କ ଚୂଡାନ୍ତ ନିଷ୍ପତ୍ତି ଲାଗି ପଠାଯିବ। ସର୍ଚ୍ଚ କମିଟିରେ କ୍ୟାବିନେଟ ସଚିବଙ୍କ ବାଦ୍ ଆର୍ବିଆଇ ଗଭର୍ନର, ଆର୍ଥତ୍କ ସେବା ସଚିବ ଏବଂ ୨ ସ୍ବାଧୀନ ସଦସ୍ୟ ରହିଛନ୍ତି। ବର୍ତ୍ତମାନ ଖାଲି ଥିବା ପଦବୀ କେନ୍ଦ୍ରୀୟ ବ୍ୟାଙ୍କରେ କାର୍ଯ୍ୟ କରୁଥିବା ବ୍ୟକ୍ତି ବିଶେଷଙ୍କ ମଧ୍ୟରୁ ପୂରଣ କରାଯିବ। ଆର୍ବିଆଇ ନିୟମ ଅନୁସାରେ କେନ୍ଦ୍ରୀୟ ବ୍ୟାଙ୍କରେ ୪ ଡେପୁଟି ଗଭର୍ନର ଥିବା ବେଳେ ର଼୍ୟାଙ୍କରୁ ୨, ଜଣେ ବାଣିଜ୍ୟିକ ବ୍ୟାଙ୍କର ଏବଂ ଅନ୍ୟ ଜଣେ ଅର୍ଥନୀତିଜ୍ଞ ରହିବେ, ଯେ କି ମୁଦ୍ରାନୀତି କମିଟି ବିଭାଗ ଦାୟିତ୍ୱ ତୁଲାଇବେ। ବର୍ତ୍ତମାନ ଆର୍ବିଆଇରେ ୩ ଡେପୁଟି ଗଭର୍ନର ଯଥା- ବି.ପି.କାନୁନଗୋ, ଏମ.କେ.ଜୈନ, ମାଇକେଲ ଦେବବ୍ରତ ପାତ୍ର ବର୍ତ୍ତମାନ ଅବସ୍ଥାପିତ ଅଛନ୍ତି। ନିକଟରେ କାନୁନଗୋଙ୍କ କାର୍ଯ୍ୟକାଳ ଗୋଟିଏ ବର୍ଷ ବଢାଯାଇଛି। ସେ ୨୦୧୭ରେ ରିଜର୍ଭ ବ୍ୟାଙ୍କରେ ଯୋଗ ଦେଇଥିଲେ। ପ୍ରାଥମିକ ପର୍ଯ୍ୟାୟରେ ଡେପୁଟି ଗଭର୍ନର ୩ ବର୍ଷ ଲାଗି ନିଯୁକ୍ତି ପାଇଥାନ୍ତି। ଏହି କାର୍ଯ୍ୟକାଳକୁ ବଢାଯାଇ ପାରେ। ଏହି ପଦବୀ ଲାଗି ୨.୨୫ ଲକ୍ଷ ବେତନ ବାଦ୍ ଭତ୍ତା ମଧ୍ୟ ପ୍ରଦାନ କରାଯାଇଥାଏ।
