ଖୋର୍ଦ୍ଧା,୧୮।୯(ପ୍ରଭାତ ପାଣିଗ୍ରାହୀ): ଉତ୍କଳ ସମ୍ମିଳନୀର ରାଜ୍ୟ ଉପସଭାପତି ବରିଷ୍ଠ ନାଗରିକ, ବୁଦ୍ଧିଜୀବୀ ତଥା ଶିକ୍ଷାବିତ, ଖବରକାଗଜର ବିଶିଷ୍ଟ ସଂଗ୍ରାହକ ଭାବେ ପରିଚିତ ଖୋର୍ଦ୍ଧା ନିବାସୀ ବିମଳ ଷଡଙ୍ଗୀ(୭୫) ଆଉ ନାହାନ୍ତି। ଶୁକ୍ରବାର ଚିକିତ୍ସାଧୀନ ଅବସ୍ଥାରେ ଭୁବନେଶ୍ୱରସ୍ଥିତ ଏକ ଘରୋଇ ହସ୍ପିଟାଲରେ ତାଙ୍କର ପରଲୋକ ଘଟିଛି। ତାଙ୍କ ବିୟୋଗରେ ଖୋର୍ଦ୍ଧାର ସାମାଜିକ, ସାହିତି୍ୟକ ଓ ସାଂସ୍କୃତିକ ମହଲରେ ଶୋକର ଛାୟା ଖେଳିଯାଇଛି।
ଖୋର୍ଦ୍ଧାର କଳା, ସାହିତ୍ୟ ଓ ସଂସ୍କୃତି ସମ୍ପର୍କିତ ବିଭିନ୍ନ ଦିଗ ଉପରେ ଗବେଷଣା ତଥ୍ୟ ସଂଗ୍ରହ କରିବାରେ ଷଡଙ୍ଗୀଙ୍କ ନିଆରା ଆଗ୍ରହ ରହିଥିଲା। ବିଶେଷ କରି ପୁରୁଣା ଖବରକାଗଜ, ଐତିହାସିକ ଦଲିଲ ଓ ସ୍ଥାନୀୟ ଇତିହାସ ସମ୍ପର୍କିତ ତଥ୍ୟ ସଂଗ୍ରହ କରି ସେ ସ୍ବତନ୍ତ୍ର ପରିଚୟ ସୃଷ୍ଟି କରିଥିଲେ। ଖୋର୍ଦ୍ଧା ମାଟିର ଗୌରବ, ପାଇକ ସଂସ୍କୃତି, ଭାଷା, ସାହିତ୍ୟ ଓ ପରମ୍ପରା ପ୍ରତି ତାଙ୍କର ଗଭୀର ଅନୁରାଗ ରହିଥିଲା। ଏହି ଐତିହ୍ୟକୁ ନୂଆ ପିଢ଼ି ନିକଟରେ ପହଞ୍ଚାଇବା ସହ ଯୁବପିଢ଼ି ମଧ୍ୟରେ ନିଜ ମାଟି, ଭାଷା ଓ ସଂସ୍କୃତି ପ୍ରତି ନବଜାଗରଣ ସୃଷ୍ଟି କରିବା ତାଙ୍କର ଏକ ପ୍ରମୁଖ ଲକ୍ଷ୍ୟ ଥିଲା।
ଯୁବକମାନେ ହିଁ ଆଗାମୀ ଦିନରେ ଏ ମାଟିର କର୍ଣ୍ଣଧାର ହେବେ ଏହି ଚିନ୍ତାଧାରାକୁ ସେ ସର୍ବଦା ଗୁରୁତ୍ୱ ଦେଉଥିଲେ। ଖୋର୍ଦ୍ଧାର ବିକାଶ ସହ ପାଇକ ଐତିହ୍ୟ ଓ ସ୍ଥାନୀୟ ସଂସ୍କୃତିର ସୁରକ୍ଷା ପାଇଁ ସେ ଉଦ୍ୟମ କରିଆସିଥିଲେ। ତାଙ୍କ ବିୟୋଗ ଖୋର୍ଦ୍ଧାର କଳା, ସାହିତ୍ୟ, ସଂସ୍କୃତି, ଐତିହ୍ୟ ଓ ସାମାଜିକ କ୍ଷେତ୍ର ପାଇଁ ଏକ ଅପୂରଣୀୟ କ୍ଷତି। ଖୋର୍ଦ୍ଧା ମାଟିର ଇତିହାସ, ପାଇକ ପରମ୍ପରା ଓ ସଂସ୍କୃତି ପ୍ରତି ତାଙ୍କର ଅବଦାନ ଓ ନିଷ୍ଠା ପାଇଁ ସେ ଚିରଦିନ ସ୍ମରଣୀୟ ହୋଇ ରହିବେ।
ତାଙ୍କ ବିୟୋଗରେ ଖୋର୍ଦ୍ଧାର ବିଭିନ୍ନ ମହଲରୁ ଗଭୀର ଶୋକବ୍ୟକ୍ତ କରାଯାଇଛି। ତାଙ୍କ ପରଲୋକ ଖୋର୍ଦ୍ଧା ମାଟି ପାଇଁ ଏକ ଅପୂରଣୀୟ କ୍ଷତି ବୋଲି ବିଭିନ୍ନ ମହଲରୁ ମତ ପ୍ରକାଶ ପାଇଛି। ତାଙ୍କର ଅବଦାନ ଓ ସ୍ମୃତି ଆଗାମୀ ପିଢ଼ିକୁ ଖୋର୍ଦ୍ଧାର ଇତିହାସ ଓ ସଂସ୍କୃତି ସୁରକ୍ଷା ପାଇଁ ପ୍ରେରଣା ଯୋଗାଇବ ବୋଲି ଶୋକସନ୍ତପ୍ତ ବ୍ୟକ୍ତିମାନେ ମତ ପ୍ରକାଶ କରିଛନ୍ତି।
ଉତ୍କଳ ସମ୍ମିଳନୀ ପକ୍ଷରୁ ଶୋକ
ଉତ୍କଳ ସମ୍ମିଳନୀର ସଭାପତି ପ୍ରଫେସର ଡକ୍ଟର ଅଦ୍ୱୈତ କୁମାର ପାତ୍ର ବିମଳଙ୍କ ବିୟୋଗରେ ଗଭୀର ଶୋକ ପ୍ରକାଶ କରିଛନ୍ତି। ସେ କହିଛନ୍ତି ଯେ, ସେ ଉତ୍କଳ ସମ୍ମିଳନୀର ଜଣେ ପ୍ରମୁଖ କର୍ମକର୍ତ୍ତା ଭାବେ ଦୀର୍ଘଦିନ ଧରି ସଂଗଠନ ସହ ଜଡ଼ିତ ଥିଲେ। ସେ କେନ୍ଦ୍ରୀୟ କମିଟିର ସମ୍ପାଦକ, କୋଷାଧ୍ୟକ୍ଷ ଓ ଉପସଭାପତି ଭଳି ଗୁରୁତ୍ୱପୂର୍ଣ୍ଣ ପଦବୀରେ ଦାୟିତ୍ୱ ତୁଲାଇଥିଲେ।
ଗତ ଫେବୃଆରୀ ୭ରୁ ସେ ଉତ୍କଳ ସମ୍ମିଳନୀର କେନ୍ଦ୍ରୀୟ କୋଷାଧ୍ୟକ୍ଷ ଭାବେ କାର୍ଯ୍ୟରତ ଥିଲେ। ଓଡ଼ିଆ ଭାଷା, ସାହିତ୍ୟ, ସଂସ୍କୃତି ଓ ଐତିହ୍ୟର ସୁରକ୍ଷା ତଥା ପ୍ରସାର କ୍ଷେତ୍ରରେ ତାଙ୍କର ନିଷ୍ଠା ଓ ଅବଦାନ ଉଲ୍ଲେଖନୀୟ ବୋଲି ଡ. ପାତ୍ର କହିଛନ୍ତି।
ତାଙ୍କ ବିୟୋଗ ଉତ୍କଳ ସମ୍ମିଳନୀ ସହ ଖୋର୍ଦ୍ଧା ମାଟି ଓ ଓଡ଼ିଆ ସାହିତ୍ୟ-ସଂସ୍କୃତି କ୍ଷେତ୍ର ପାଇଁ ଏକ ବଡ଼ କ୍ଷତି ବୋଲି ସେ ମତପ୍ରକାଶ କରିବା ସହ ତାଙ୍କ ଅମର ଆତ୍ମାର ସଦ୍ଗତି କାମନା କରିଛନ୍ତି।
