ନୂଆଦିଲ୍ଲୀ,୨୨।୧୦: ପାର୍ବଣ ସମୟରେ ଡାଲି ଏବଂ ଖାଇବା ତେଲ ଦର ନିୟନ୍ତ୍ରଣକୁ ଆଣିବା ଲାଗି ବିଭିନ୍ନ ପଦକ୍ଷେପ ନେଉଛନ୍ତି କେନ୍ଦ୍ର ସରକାର। ଆମଦାନୀ ବଢ଼ାଇବା ସହ ଖାଦ୍ୟ ସାମଗ୍ରୀ କଳାବଜାରୀ ରୋକିବାକୁ ନିର୍ଦ୍ଦେଶ ଦେଇଛନ୍ତି। ଖାଦ୍ୟ ମନ୍ତ୍ରଣାଳୟର ସଚିବ ସୁଧାଂଶୁ ପାଣ୍ଡେ କହିଛନ୍ତି, ସୋରିଷ ତେଲ ଉତ୍ପାଦନ ପୂର୍ବ ଅପେକ୍ଷା ୧୦ ଲକ୍ଷ ମେଟ୍ରିକ ଟନ୍ ବଢ଼ିଛି। ଏହାର ପ୍ରଭାବ ବଜାର ଉପରେ ଶୀଘ୍ର ପଡ଼ିବ। ଫଳରେ ଖାଇବା ତେଲ ଦର ହ୍ରାସ ହୋଇପାରେ। ଏହା ଦ୍ୱାରା ପାର୍ବଣରେ ଲୋକଙ୍କୁ କିଛିଟା ଆଶ୍ୱସ୍ତି ମିଳିବ।
ପାଣ୍ଡେ କହିଛନ୍ତି, ମାଲେସିଆରେ ଶ୍ରମିକଙ୍କ ଅଭାବ ଏବଂ ବାୟୋଫୁଏଲ ପ୍ରସ୍ତୁତି ଲାଗି ଖାଇବା ତେଲର ଡାଇଭର୍ସନ କାରଣରୁ ଅନ୍ତର୍ଜାତୀୟ ବଜାରରେ ତେଲ ଦର ବଢ଼ିଛି। ଏଭଳି ସ୍ଥିତି ସତ୍ତ୍ୱେ ମଧ୍ୟ ଭାରତ ବଜାର ଉପରେ ଏହାର ବିଶେଷ ଭାବେ ପ୍ରଭାବ ପଡିନାହିଁ। ସରକାର ଡାଲି ଦର ନିୟନ୍ତ୍ରଣ କରିବା ଲାଗି ମଧ୍ୟ ପ୍ରୟାସ ଜାରି ରଖିଛନ୍ତି। ଗତ ବର୍ଷ ତୁଳନାରେ ଚଳିତ ବର୍ଷ ଚଣାଡାଲି ଆମଦାନୀ କମିଛି। ଆସନ୍ତା ମାସରେ ରାଜ୍ୟ ସ୍ତରରେ ଖାଇବା ତେଲ ଏବଂ ଡାଲି ଉପଲବ୍ଧତା ନେଇ କେନ୍ଦ୍ର ସରକାର ସମୀକ୍ଷା କରିବେ। ଆଗାମୀ ଫେବୃୟାରୀ ବେଳକୁ ଖାଇବା ତେଲ ଏବଂ ଡାଲି ଦର କମିବା ନେଇ ସରକାର ଆଶା ରଖିଛନ୍ତି। ଏହି ସମୟରେ ନୂଆ ଫସଲ ଅମଳ ମଧ୍ୟ ହୋଇଥିବ।
