ହାଇଦ୍ରାବାଦ,୧୨ା୧୧: ପାନାମା ପେପର ଲିକ୍ ସହ ତେଲଙ୍ଗାନା କରିମନଗରସ୍ଥିତ ଗ୍ରାନାଇଟ୍ ଶିଳ୍ପର ସମ୍ପୃକ୍ତି ଥିବା ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ତଦନ୍ତରୁ ଜାଣିବାକୁ ପାଇଛି। ପାନାମା ପେପରରେ ବହୁସଂଖ୍ୟାରେ ଶିଳ୍ପସଂସ୍ଥା ଓ ବ୍ୟକ୍ତିବିଶେଷଙ୍କ ନାଁ ପ୍ରଘଟ ହୋଇଥିଲା, ଯେଉଁମାନେ ଟିକସ ଫାଙ୍କି ଓ ଆର୍ଥତ୍କ ଅନିୟମିତତାରେ ସମ୍ପୃକ୍ତ ଥିଲେ। ସେମାନଙ୍କର ଗ୍ରାନାଇଟ୍ ଶିଳ୍ପସଂସ୍ଥା ସହ ଆର୍ଥତ୍କ କାରବାର ଥିବା ଇଡି କହିଛି। ତଲାସି ବେଳେ ୧.୦୮ କୋଟି ଟଙ୍କାର ହିସାବ ବହିର୍ଭୁତ ନଗଦ ଅର୍ଥ ଜବତ ହୋଇଥିଲା। ରପ୍ତାନି ପାଇଁ ହାଓ୍ବଲାରେ ଏହି ଅର୍ଥ ଗ୍ରହଣ କରାଯାଇଥିବା ଅଭିଯୋଗ ହୋଇଛି। ଉକ୍ତ ଗ୍ରାନାଇଟ୍ ଖାଦାନଗୁଡ଼ିକରୁ ୧୦ ବର୍ଷର ଗ୍ରାନାଇଟ୍ ପ୍ରେରଣ ତଥ୍ୟ ମଧ୍ୟ ଇଡିର ହସ୍ତଗତ ହୋଇଛି। ବହୁସଂଖ୍ୟାରେ ସନ୍ଦିଗ୍ଧ ବେନାମୀ ଆକାଉଣ୍ଟ ମଧ୍ୟ ମିଳିଛି।
ଇଡି ଅଧିକାରୀମାନେ ଦୁଇଦିନ ହେଲା ଶ୍ୱେତା ଗ୍ରାନାଇଟ୍ସ, ଶ୍ୱେତା ଏଜେନ୍ସିଜ୍, ଶ୍ରୀ ଭେଙ୍କଟେଶ୍ୱର ଗ୍ରାନାଇଟ୍ସ ପ୍ରାଇଭେଟ ଲିମିଟେଡ, ପିଏସ୍ଆର୍ ଗ୍ରାନାଇଟ୍ସ ପ୍ରାଇଭେଟ ଲିଃ, ଅରବିନ୍ଦ ଗ୍ରାନାଇଟ୍ସ, ଗିରିରାଜ ଶିପିଂ ଏଜେନ୍ସି ପ୍ରା.ଲିଃ ଏବଂ କରିମନଗର ଓ ହାଇଦ୍ରାବାଦରେ ଥିବା ସେମାନଙ୍କ ସହ ସମ୍ପୃକ୍ତ ସଂସ୍ଥା ଉପରେ ଚଢ଼ାଉ କରିଥିଲେ। ବିଦେଶ ବିନିମୟ ପରିଚାଳନା ଆଇନର ଉଲ୍ଲଂଘନ ନେଇ ଏହି ଚଢ଼ାଉ କରାଯାଇଥିଲା। ଉପରୋକ୍ତ କମ୍ପାନୀଗୁଡ଼ିକ ଚାଇନା, ହଂକଂ ଓ ଅନ୍ୟ ଦେଶଗୁଡ଼ିକୁ କଞ୍ଚା ଗ୍ରାନାଇଟ୍ ବ୍ଲକ୍ ରପ୍ତାନି କରୁଥିଲେ। ତେବେ ରୟାଲ୍ଟି ଦିଆଯାଉଥିବା ପରିମାଣଠାରୁ ଯଥେଷ୍ଟ ଅଧିକ ଗ୍ରାନାଇଟ ରପ୍ତାନି ହୋଇଥିବା ତଦନ୍ତରୁ ଜଣାପଡ଼ିଛି। ଅନେକ କାରବାର ବ୍ୟାଙ୍କ ଆକାଉଣ୍ଟ ଜରିଆରେ ହୋଇ ନ ଥିବାରୁ ଅନ୍ୟ ଚ୍ୟାନେଲ ଦେଇ କାରବାର ଚାଲିଥିବା ଇଡି ଅଭିଯୋଗ କରିଛି। ଗ୍ରାନାଇଟ ରପ୍ତାନିକାରୀ ସଂସ୍ଥାର କର୍ମଚାରୀମାନଙ୍କ ନାମରେ ବେନାମୀ ବ୍ୟାଙ୍କ ଆକାଉଣ୍ଟ ଖୋଲାଯାଇ ବେଆଇନ ରପ୍ତାନି ବାବଦ ଅର୍ଥ ସେଥିରେ ଜମା କରାଯାଉଥିଲା। ଚାଇନା ସଂସ୍ଥାଠାରୁ ବିନା କାଗଜପତ୍ରରେ ଭାରତୟ ସଂସ୍ଥାକୁ ଋଣ ନାମରେ ଅର୍ଥ ଆସୁଥିଲା ବୋଲି ତଦନ୍ତରୁ ଜଣାପଡ଼ିଛି। ଚାଇନାର ଏହି କମ୍ପାନୀ ଲି ଓ୍ବେନ୍ହୁଙ୍କ ନାମରେ ରହିଛି, ଯାହାଙ୍କ ନାଁ ପାନାମା ପେପରରେ ଲିକ୍ ହୋଇଥିଲା। ଶ୍ୱେତା ଗ୍ରାନାଇଟ୍ସର ମାଲିକାନା ଟିଆର୍ଏସ୍ ମନ୍ତ୍ରୀ ଗାଙ୍ଗୁଲା କମଲାକରଙ୍କ ପରିବାର ନାମରେ ଥିବାରୁ ତାଙ୍କ ଘର ଉପରେ ଚଢ଼ାଉ ହୋଇଥିଲା।
