ଦାରିଙ୍ଗବାଡି, ୧୦।୧୧ (ଅରୁଣ ସାହୁ): ଓଡ଼ିଶାର କଶ୍ମୀର କୁହାଯାଉଥିବା ଦାରିଙ୍ଗବାଡିରେ ଶୀତ ବଢିବା ସାଙ୍ଗକୁ ପର୍ଯ୍ୟଟକ ମଧ୍ୟ ଭିଡ଼ ମଧ୍ୟ ବଢିଛି। ସ୍ଥାନୀୟ ପ୍ରଶାସନ ଏବଂ ଜିଲା ପ୍ରଶାସନ ପକ୍ଷରୁ ପର୍ଯ୍ୟଟକଙ୍କ ପାଇଁ ବିଭିନ୍ନ ପର୍ଯ୍ୟଟନକ୍ଷେତ୍ରର ଉନ୍ନୟନ ପାଇଁ ବିଭିନ୍ନ ଯୋଜନା ପ୍ରସ୍ତୁତ ଚଳାଇଛନ୍ତି । ସେହିପରି ରାଜ୍ୟ ସରକାରଙ୍କ ପକ୍ଷରୁ ଦୀର୍ଘ ୫ ବର୍ଷ ହେଲା ଦାରିଙ୍ଗବାଡିରେ ଇକୋ ରିଟ୍ରିଟର ବ୍ୟବସ୍ଥା କରି ସେଠାରେ ତମ୍ବୁ ଘର କରୁଛନ୍ତି। ଯେଉଁଥିରେ ପର୍ଯ୍ୟଟକ ପଞ୍ଚ ତାରକା ହୋଟେଲର ସୁବିଧା ପାଉଛନ୍ତି । ତାହା ଚଳିତ ବର୍ଷ ମଧ୍ୟ କରାଯାଇଛି। ପ୍ରାୟ ୮୦ ପ୍ରତିଶତ ଇକୋ ରିଟ୍ରିଟର କାର୍ଯ୍ୟ ସାରିଥିବା କନ୍ଧମାଳ ଜିଲାପାଳ ବେଦ ଭୂଷଣ କହିଛନ୍ତି। ସେ ସୋମବାର ସନ୍ଧ୍ୟାରେ ଇକୋ ରିଟ୍ରିଟ ପରିସର ମଧ୍ୟରେ ସମୀକ୍ଷା କରିଛନ୍ତି । ଆସନ୍ତା ନଭେମ୍ବର ୧୫ ରେ ଏହାର ଶୁଭ ଉଦ୍ଘାଟନ କରାଯିବ ବୋଲି ଜିଲାପାଳ ବେଦଭୂଷଣ ସୂଚନା ଦେଇଛନ୍ତି । ସେ ଆହୁରି କହିଛନ୍ତି ଯେ ଚଳିତ ଥର ପର୍ଯ୍ୟଟକଙ୍କୁ ଆକୃଷ୍ଟ କରିବା ପାଇଁ ଦାରିଙ୍ଗବାଡି ପର୍ଯ୍ୟଟନକ୍ଷେତ୍ରର ରୂପାନ୍ତର କାର୍ଯ୍ୟ କରାଯାଉଛି । କଫି ବଗିଚା ଏବେ ସମ୍ପୂର୍ଣ୍ଣ ରୂପାନ୍ତର ଓ ସୌନ୍ଦର୍ଯ୍ୟକରଣ କାର୍ଯ୍ୟ କରାଯାଉଛି ବୋଲି ସେ କହିଛନ୍ତି । ଏଥିସହ ଚଳିତ ଥର ପର୍ଯ୍ୟଟକଙ୍କୁ
ଜି.ଉଦୟଗିରି ବ୍ଲକ ମୁକୁଳିଙ୍ଗିଆ ପର୍ଯ୍ୟଟନକ୍ଷେତ୍ର ସହ କୋଟଗଡ଼ ବ୍ଲକ ଲୁର୍ଦୁ ଜଳପ୍ରପାତ ବୁଲିବାକୁ ଅତିରିକ୍ତ ସୁଯୋଗ ମିଳିବ ବୋଲି ଜିଲାପାଳ କହିଛନ୍ତି । ଏହି ସମୀକ୍ଷା ବୈଠକରେ ଜିଲାପାଳ ବେଦ ଭୂଷଣଙ୍କ ସହ କନ୍ଧମାଳ ଜିଲାମୁଖ୍ୟ ଉନ୍ନୟନ ଅଧିକାରୀ ଶମ୍ବୁନାଥ ନନ୍ଦୀ, ବାଲିଗୁଡା ଉପଜିଲାପାଳ ପ୍ରଣୀତା ଦାସ, ଦାରିଙ୍ଗବାଡି ବିଡ଼ିଓ ପ୍ରୀତିରଞ୍ଜନ ରଥ, ତହସିଲଦାର ଧୀରୋଜ ପାତ୍ର, ସହକାରୀ ନିର୍ବାହୀ ଯନ୍ତ୍ରୀ ସଞ୍ଜୟ ରଥ, ଜିଲା ପର୍ଯ୍ୟଟନ ଅଧିକାରୀ କୁମୁଦୁନୀ ମଲିକ, ଇକୋ ରିଟ୍ରିଟର ପରିଚାଳକ ସୁମନ୍ତ ସରକାର ପ୍ରମୁଖ ଉପସ୍ଥିତ ରହିଥିଲେ।
