ଭୁବନେଶ୍ୱର, ୧୪।୧୨(ତପନ ସ୍ବାଇଁ): କଟକ ବିଦ୍ୟାଧରପୁରସ୍ଥିତ ଜାତୀୟ ଧାନ ଗବେଷଣା ଅନୁଷ୍ଠାନ ଖେଳ ପଡ଼ିଆରେ ପୂର୍ବୀ କ୍ଷେତ୍ର ଆଇସିଏଆର କ୍ରୀଡ଼ା ପ୍ରତିଯୋଗିତା ବୁଧବାର ଉଦ୍ଘାଟିତ ହୋଇଛି। ଚଳିତ ମାସ ୧୬ ପର୍ଯ୍ୟନ୍ତ ହେବାକୁଥିବା ଏହି ପ୍ରତିଯୋଗିତାରେ ପୂର୍ବ ଭାରତର ୧୨ ରାଜ୍ୟ ଓଡ଼ିଶା, ପଶ୍ଚିମବଙ୍ଗ, ଝାଡ଼ଖଣ୍ଡ, ପୂର୍ବ ଉତ୍ତର ପ୍ରଦେଶ ଓ ଉତ୍ତର-ପୂର୍ବର ସମସ୍ତ ରାଜ୍ୟରେ ଭାରତୀୟ କୃଷି ଗବେଷଣା ପରିଷଦ ଅଧୀନରେ ଥିବା ୨୬ ଅନୁଷ୍ଠାନରୁ ପାଖାପାଖି ୫୦୦ରୁ ଊର୍ଦ୍ଧ୍ୱ ପ୍ରତିଯୋଗୀ ଅଂଶଗ୍ରହଣ କରିବେ। ନୂଆଦିଲ୍ଲୀସ୍ଥିତ ଭାରତ ସରକାରଙ୍କ ଉଦ୍ଭିଦ ବିବିଧତା ଏବଂ କୃଷକ ଅଧିକାର ପ୍ରାଧିକରଣର ଅଧ୍ୟକ୍ଷ ତ୍ରିଲୋଚନ ମହାପାତ୍ର ମୁଖ୍ୟ ଅତିଥିଭାବେ ଯୋଗଦେଇ ପ୍ରତିଯୋଗିତାକୁ ଉଦ୍ଘାଟନ କରିଥିଲେ। କ୍ରୀଡ଼ା ଦ୍ୱାରା ଶାରୀରିକ ଏବଂ ମାନସିକ ସ୍ତରରେ ତୀକ୍ଷ୍ଣ, ସନ୍ତୁଳିତ ଭାବପ୍ରବଣ ଏବଂ ସାମାଜିକ ଭାବରେ ସୁପରିଚାଳିତ ବ୍ୟକ୍ତିତ୍ୱର ସାମଗ୍ରିକ ବିକାଶରେ ପରିଣତ ହୁଏ ବୋଲି ଏହି ଅବସରରେ ସେ ପ୍ରକାଶ କରିଥିଲେ। ଏନ୍ଆର୍ଆର୍ଆଇ କଟକର ନିର୍ଦ୍ଦେଶକ ଅମରେଶ କୁମାର ନାୟକ ଉତ୍ସବରେ ସଭାପତିତ୍ୱ କରିଥିଲେ। ପ୍ରତିଯୋଗିତାରେ ହାଇଜମ୍ପ, ଲଙ୍ଗଜମ୍ପ, ଆଥ୍ଲେଟିକ୍ସ, ଶଟ୍ପୁଟ୍, ଜାଭେଲିନ୍ ଥ୍ରୋ, ବାସ୍କେଟବଲ, ଫୁଟ୍ବଲ, ଭଲିବଲ, ବ୍ୟାଡ୍ମିଣ୍ଟନ, ଟେବୁଲ ଟେନିସ, କ୍ରିକେଟ, କବାଡ଼ି ଆଦି ଇଭେଣ୍ଟ ଅନୁଷ୍ଠିତ ହେବ। ଆୟୋଜକ କମିଟି ଅଧ୍ୟକ୍ଷ ଏମ୍.ଜେ. ବେଗ୍ ଅଂଶଗ୍ରହଣକାରୀ ଅନୁଷ୍ଠାନ ଏବଂ ଖେଳାଳିମାନଙ୍କୁ ସ୍ବାଗତ କରିଥିଲେ ଏବଂ ସମ୍ପାଦକ ପ୍ରତାପ ଭଟ୍ଟାଚାର୍ଯ୍ୟ ଧନ୍ୟବାଦ ଅର୍ପଣ କରିଥିଲେ। ସାଂସ୍କୃତିକ କାର୍ଯ୍ୟକ୍ରମରେ ଓଡ଼ିଶାର ଚିତ୍ତାକର୍ଷକ ଗୋଟିପୁଅ ନୃତ୍ୟ ପରିବେଷଣ କରାଯାଇଥିଲା।
