ଓ୍ବାଶିଂଟନ,୧୧।୨ : ବଢୁଥିବା ରାଜକୋଷର ଆର୍ଥିକ ନିଅଣ୍ଟକୁ ମୁକାବିଲା କରିବା ପାଇଁ ଆମେରିକାର ରାଷ୍ଟ୍ରପତି ଜୋ ବାଇଡେନ ଏକ ସ୍ବତନ୍ତ୍ର ଯୋଜନା ପ୍ରସ୍ତୁତ କରୁଛନ୍ତି। ସରକାରଙ୍କ ପାଇଁ ଋଣ ସୀମା ବୃଦ୍ଧି ନେଇ କଂଗ୍ରେସ (ସଂସଦ) ରେ ଚାଲିଥିବା ବିବାଦ ମଧ୍ୟରେ ବାଇଡେନ ପ୍ରଶାସନ ଏହି ଦିଗରେ ପଦକ୍ଷେପ ନେଇଛନ୍ତି।
ଆମେରିକା ସରକାରଙ୍କ ଉପରେ ଋଣ ୩୧ ଟ୍ରିଲିୟନ ଡଲାରରୁ ଅଧିକ ହୋଇଛି। ବ୍ୟବସାୟ ଜାରି ରଖିବାକୁ ସେ ଅଧିକ ଋଣ ନେବାକୁ ସରକାର ବାଧ୍ୟ ହେଉଛନ୍ତି। କିନ୍ତୁ ଋଣ ସୀମା ବଢ଼ାଇବାକୁ ପ୍ରସ୍ତାବ ଉପରେ ପ୍ରସ୍ତାବକୁ ରିପବ୍ଲିକାନ ପାର୍ଟି ରୋକି ରଖିଛି। ପାର୍ଟି କହିଛି ସରକାର ପ୍ରଥମେ ନିଅଣ୍ଟ ହ୍ରାସ ପାଇଁ ପଦକ୍ଷେପ ନେବା ଉଚିତ।
ୱେବସାଇଟ ଆକ୍ସିଓସ ଡଟ୍ କମର ଏକ ବିଶେଷ ରିପୋର୍ଟ ଅନୁଯାୟୀ, ନିଅଣ୍ଟ ହ୍ରାସ କରିବା ବର୍ତ୍ତମାନ ଏକ ରାଜନନୈତିକ ପ୍ରସଙ୍ଗ ହୋଇଛି। ରିପବ୍ଲିକାନ ପାର୍ଟି ଏଥିପାଇଁ କଲ୍ୟାଣମୂଳକ ଯୋଜନାରେ ଖର୍ଚ୍ଚ ହ୍ରାସ କରିବାକୁ ଦାବି କରୁଥିବାବେଳେ ବାଇଡେନ ପ୍ରଶାସନ ଅଧିକ ଟିକସ ଲଗାଇ ନିଅଣ୍ଟ ହ୍ରାସ କରିବାକୁ ଯୋଜନା ଉପସ୍ଥାପନ କରିବାକୁ ପ୍ରସ୍ତୁତ ହେଉଛନ୍ତି। ଆକ୍ସିଓସ ଡଟ କମ ଅନୁଯାୟୀ, ଆଗାମୀ ୨୦୨୪ ରାଷ୍ଟ୍ରପତି ନିର୍ବାଚନରେ ଡେମୋକ୍ରାଟିକ ପାର୍ଟି ଏହି ଯୋଜନାକୁ ଏକ ସ୍ବତନ୍ତ୍ର ପ୍ରସଙ୍ଗ କରିବାକୁ ଚିନ୍ତା କରୁଛି।
କୁହାଯାଉଛି ଯେ ଏହି ଯୋଜନା ଅନୁଯାୟୀ ବିଲିୟନେୟାର ଏବଂ ବଡ କମ୍ପାନୀ ଉପରେ ବିଭିନ୍ନ ପ୍ରକାରର ଟିକସ ଲାଗୁ କରିବାକୁ ପ୍ରସ୍ତାବ ଦିଆଯିବ। ଏହି ପ୍ରସ୍ତାବଗୁଡ଼ିକ ଚଳିତ ବର୍ଷ ଉପସ୍ଥାପିତ ହେବାକୁ ଥିବା ବଜେଟରେ ଅନ୍ତର୍ଭୂକ୍ତ କରାଯିବ। ଏଥିସହ ବଜେଟରେ ଦାବି କରାଯିବ ଯେ ମୁଦ୍ରାସ୍ଫୀତି ହ୍ରାସ କରିବା ପାଇଁ ବାଇଡେନ ପ୍ରଶାସନ ଦ୍ୱାରା ପାରିତ ହୋଇଥିବା ମୁଦ୍ରାସ୍ଫୀତି ହ୍ରାସ ଆଇନ ଆର୍ଥିକ ନିଅଣ୍ଟକୁ ୨୩୮ ବିଲିୟନ ଡ଼ଲାରରେ ହ୍ରାସ କରିବ।
ଆମେରିକାର ପରବର୍ତ୍ତୀ ବଜେଟ ମାର୍ଚ୍ଚ ୯ ରେ ଉପସ୍ଥାପିତ ହେବ। ଏପ୍ରିଲ ୧୫ ସୁଦ୍ଧା କଂଗ୍ରେସ ଏହାକୁ ଅନୁମୋଦନ କରିବ ବୋଲି ଆଶା କରାଯାଉଛି। କିନ୍ତୁ ବର୍ତ୍ତମାନ ପ୍ରତିନିଧି ସଭାରେ ରିପବ୍ଲିକାନ ପାର୍ଟିର ସଂଖ୍ୟାଗରିଷ୍ଠତା ରହିଛି, ତେଣୁ ସେଠାରେ ବଜେଟ ପ୍ରସ୍ତାବ ଲଟକି ରହିବା ସମ୍ଭବ। ସେହି ପରିସ୍ଥିତିରେ ସରକାରୀ କାର୍ଯ୍ୟରେ ଏକ ବଡ଼ ପ୍ରତିବନ୍ଧକ ହୋଇପାରେ।
ବର୍ତ୍ତମାନ ଖର୍ଚ୍ଚ ହ୍ରାସକୁ ପ୍ରାଥମିକତା ଦିଆଯାଇଛି। କିନ୍ତୁ ଖର୍ଚ୍ଚ କିପରି ହ୍ରାସ କରାଯିବ ସେନେଇ ଦୁଇ ଦଳ ମଧ୍ୟରେ ପାର୍ଥକ୍ୟ ଦେଖାଦେଇଛି।
