ତ୍ରିନିଦାଦ୍, ୨୭।୮: ଓ୍ବେଷ୍ଟଇଣ୍ଡିଜ ଅଲ୍ରାଉଣ୍ଡର ତଥା ଟି୨୦ କ୍ରିକେଟ୍ରେ ଜଣେ ସ୍ପେଶାଲିଷ୍ଟ ଖେଳାଳି ଭାବେ ସ୍ବତନ୍ତ୍ର ପରିଚୟ ଲାଭ କରିଥିବା ଡ୍ବେନ ବ୍ରାଭୋ ଏକ ବିରଳ ରେକର୍ଡ ସ୍ଥାପନ କରିଛନ୍ତି। ବିଶ୍ୱରରେ ପ୍ରଥମ ବୋଲର ଭାବେ ବ୍ରାଭୋ ଟି୨୦ କ୍ରିକେଟ୍ରେ ୫୦୦ ଉଇକେଟ୍ ନେବାର କୀର୍ତ୍ତିମାନ କରିଛନ୍ତି। ଚଳିତ କାରବୀୟାନ ପ୍ରିମିୟର ଲିଗ୍ (ସିପିଏଲ୍)ର ତ୍ରୟୋଦଶ ମ୍ୟାଚ୍ ଅବସରରେ ସେ ଏହି ସଫଳତା ପାଇଛନ୍ତି। ତ୍ରିନିବାଗୋ ନାଇଟ୍ ରାଇଡର୍ସ ପକ୍ଷରୁ ପ୍ରତିନିଧିତ୍ୱ କରୁଥିବା ବ୍ରାଭୋ ପ୍ରତିପକ୍ଷ ସେଣ୍ଟ ଲୁସିଆ ଜୌକ୍ସର ଓପନର୍ ରାଖିମ କର୍ନଓ୍ବାଲ (୧୮ ରନ)ଙ୍କୁ ଆଉଟ୍ କରି ଟି୨୦ କ୍ରିକେଟ୍ରେ ୫୦୦ ଉଇକେଟ୍ ପୂରଣ କରିଥିଲେ। ଏହି ସଫଳତା ଲାଭ କରିବାକୁ ବ୍ରାଭୋ ୪୫୯ ମ୍ୟାଚ୍ ଖେଳିଥିଲେ। ଏହା ମଧ୍ୟରେ ବିଶ୍ୱର ସମସ୍ତ ଦେଶରେ ଅନୁଷ୍ଠିତ ହେଉଥିବା ଟି୨୦ ଲିଗ୍ ଏବଂ ଓ୍ବେଷ୍ଟଇଣ୍ଡିଜ ପକ୍ଷରୁ ଖେଳିଥିବା ଅନ୍ତର୍ଜାତୀୟ ମ୍ୟାଚ୍ ଅନ୍ତର୍ଭୁକ୍ତ ରହିଛି। ବ୍ରାଭୋ ତାଙ୍କ କ୍ୟାରିୟରରେ ୨୧ଟି ଭିନ୍ନ ଭିନ୍ନ ଟିମ୍ ପକ୍ଷରୁ ଖେଳି ସାରିଛନ୍ତି। ଯେଉଁଥିରେ ସେ ୪୦୦ ଭିନ୍ନ ଭିନ୍ନ ଖେଳାଳିଙ୍କ ସହ ଖେଳିଛନ୍ତି। ଏହି ଅବସରରେ ସେ ୩୧୨ ଜଣ ଅଲଗା ଅଲଗା ବ୍ୟାଟ୍ସମ୍ୟାନଙ୍କୁ ଆଉଟ୍ କରିଛନ୍ତି। ସେ ତାଙ୍କ କ୍ୟାରିୟରରେ କିରନ ପୋଲାର୍ଡ (୯ଥର)ଙ୍କୁ ସର୍ବାଧିକ ଥର ଆଉଟ୍ କରିଛନ୍ତି। ଓ୍ବେ୍ଷ୍ଟଇଣ୍ଡିଜ ପକ୍ଷରୁ ବ୍ରାଭୋ ଟେଷ୍ଟରେ ୮୬ ଓ ଦିନିକିଆରେ ୧୯୯ ଉଇକେଟ୍ ଅକ୍ତିଆର କରିଛନ୍ତି।
