ବରୀ,୩ା୧୦(ଡି.ଏନ.ଏ.)-ସୋମବାର ମା’ଦୁର୍ଗାଙ୍କ ଅଷ୍ଟମୀ ପୂଜା ବରୀର ବିଭିନ୍ନ ପୂଜାମଣ୍ଡପରେ ଶେଷ ହୋଇଛି। ଏହି ଅବସରରେ ଦେବୀଙ୍କ ମୁଣ୍ମୟୀ ପ୍ରତିମା ପୂଜା, କଳସ ପୂଜା କରାଯାଉଥିବା ବେଳେ ଉକ୍ତ ବ୍ଲକ୍ ଅଧୀନ ବରୀ ତଳସାହିଠାରେ ନିଆରା ଢଙ୍ଗରେ ଦୂର୍ଗାଷ୍ଟମୀ ପାଳନ କରାଯାଇଛି। ଉକ୍ତ ପଞ୍ଚାୟତରେ ହିନ୍ଦୁ ଧର୍ମାଲମ୍ବୀଙ୍କ ସହ ମୁସଲିମ ସମ୍ପ୍ରଦାୟର ଲୋକମାନେ ବସବାସ କରିଥାନ୍ତି। ସରପଞ୍ଚ ସୋନାଲି ସିଂ ମୁସଲିମ ସମ୍ପ୍ରଦାୟର ବହୁ ବରିଷ୍ଠ ନାଗରିକ, ବୁଦ୍ଧିଜିବୀ ଓ ଯୁବକମାନଙ୍କ ଗହଣରେ ଦୁର୍ଗା ମଣ୍ଡପରେ ଉପସ୍ଥିତ ରହି ମହାଷ୍ଟମୀ ପୂଜା କରିଛନ୍ତି। ଏହ ଅବସରରେ ସଫେଇ କାର୍ଯ୍ୟକ୍ରମ ବି ତାଙ୍କ ନେତୃତ୍ୱରେ ହେବା ସହିତ ଜଳଛତ୍ରର ବ୍ୟବସ୍ଥା କରାଯାଇଛି। ଉକ୍ତ କାର୍ଯ୍ୟକ୍ରମ ସଂକ୍ରାନ୍ତରେ ସରପଞ୍ଚ ସିଂ କୁହନ୍ତି, ମୁଁ ଜଣେ ମାଆ , ମାଆ ଦୁର୍ଗା କେଉଁ ଜାତିର ନୁହେଁ କିମ୍ବା କେଉଁ ଧର୍ମର ନୁହନ୍ତି। ସେ ହେଉଛନ୍ତି ଜଗତର ମାଆ। ତେଣୁ ସେ ଯେମିତି ସମସ୍ତଙ୍କୁ ଆଦରି ନେଇଥିଲେ, ମୁଁ ଜଣେ ଲୋକପ୍ରତିନିଧି ହିସାବରେ ମୋ ପଞ୍ଚାୟତର ସମସ୍ତଙ୍କୁ ଏଭଳି କାର୍ଯ୍ୟକ୍ରମରେ ସାମିଲ କରି ଅତ୍ୟନ୍ତ ଗର୍ବିତ। ଉକ୍ତ କାର୍ଯ୍ୟକ୍ରମରେ ଅନ୍ୟମାନଙ୍କ ସହିତ ସଂଗ୍ରାମ ସାହୁ, ମନୋଜ ସିଂ, ବାବୁ କବିଙ୍କ ସମେତ ବିଭିନ୍ନ ମହିଳା ସଙ୍ଗଠନ କର୍ମକର୍ତ୍ତା ଓ ସ୍ବେଛାସେବୀ ଯୋଗଦେଇଥିଲେ।
