ଦୁବାଇ,୨୫।୧: ଭାରତ ଭଳି ବିଭିନ୍ନ ଦେଶରେ ଏବେ ଟିକାକରଣ ପ୍ରକ୍ରିୟା ଚାଲିଛି। ଭାକ୍ସିନକୁ ଭୟ ନ କରି ଆଗେଇ ଆସିବାକୁ ଲୋକଙ୍କୁ ବହୁ ସଂସ୍ଥା, ସେଲିବ୍ରେଟି ଆଦି ପ୍ରୋତ୍ସାହିତ କରୁଛନ୍ତି। ଦୁବାଇର ଏକ ରେଷ୍ଟୁରାଣ୍ଟ ଭାକ୍ସିନ ନେଇଥିବା ବ୍ୟକ୍ତିଙ୍କୁ ରାତ୍ରି ଭୋଜନ ଉପରେ ଦେଉଛି ରିହାତି।
୧୦ ନିୟୁତ ଲୋକସଂଖ୍ୟା ବିଶିଷ୍ଟ ୟୁନାଇଟେଡ୍ ଆରବ ଏମିରେଟ୍ସ (ୟୁଏଇ)ରେ ଏବେ ସୁଦ୍ଧା ୨.୫ ନିୟୁତ ଲୋକଙ୍କୁ ଭାକ୍ସିନ ଦିଆଯାଇଛି। ଇସ୍ରାଏଲ ପରେ ଭାକ୍ସିନ ନେବାରେ ୟୁଏଇର ହାର ଦ୍ୱିତୀୟ ସର୍ବାଧିକ।
ଗେଟ୍ସ ହସପିଟାଲିଟି ଦ୍ୱାରା ପରିଚାଳିତ ୩ ରେଷ୍ଟୁରାଣ୍ଟରେ ଭାକ୍ସିନର ପ୍ରଥମ ଡୋଜ ନେଇଥିବା ବ୍ୟକ୍ତିଙ୍କୁ ରାତ୍ରି ଭୋଜନରେ ୧୦ ପ୍ରତିଶତ ଓ ଦ୍ୱିତୀୟ ଡୋଜ ଗ୍ରହଣ କରିଥିବା ଲୋକଙ୍କୁ ୨୦ % ରିହାତି ଦିଆଯାଉଛି। ଏହି ରିହାତି ପାଇବା ଲାଗି ଗ୍ରାହକଙ୍କୁ ମେଡିକାଲ ସାର୍ଟିଫିକେଟ ଦେଖାଇବାକୁ ପଡ଼ିବ। ଉଲ୍ଲେଖଥାଉ କି, ୟୁଏଇରେ ଗତବର୍ଷ ଡିସେମ୍ବରଠାରୁ ଟିକାକରଣ ପ୍ରକ୍ରିୟା ଆରମ୍ଭ ହୋଇଥିଲା। ଏହି ଦେଶରେ ଚାଇନାରେ ପ୍ରସ୍ତୁତ ସିନୋଫାର୍ମ ଓ ଆମେରିକାର ଫାଇଜର ଟିକାକୁ ଅନୁମତି ଦିଆଯାଇଛି।
