ବାରାଣସୀ, ୬ା୧: କୋଭିଡ୍-୧୯ ଟିକାକରଣକୁ ସଫଳତାର ସହ ସମ୍ପୂର୍ଣ୍ଣ କରାଯିବାକୁ ସାରା ଦେଶରେ ଡ୍ରାଏରନ୍ କରାଯାଉଛି। ତେବେ ଉତ୍ତରପ୍ରଦେଶରେ ଏଥିରେ ଅବ୍ୟବସ୍ଥା ଦେଖିବାକୁ ମିଳିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନିର୍ବାଚନମଣ୍ଡଳୀ ବାରାଣସୀରେ ଟିକାକୁ ସାଇକେଲରେ ବୁହାଯାଉଥିବା ଘଟଣା ସାମ୍ନାକୁ ଆସିବା ପରେ ଟିକାକରଣର ସଫଳତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ଚୌକାଘାଟସ୍ଥିତ ଓମେନ୍ସ ହସ୍ପିଟାଲଠାରେ ଜଣେ କର୍ମଚାରୀ ଭାକ୍ସିନକୁ ସାଇକେଲରେ ନେଇଯାଉଥିବା ଦେଖିବାକୁ ମିଳିଥିଲା। ଏପରିକି ସେଠାରେ ସୁରକ୍ଷାକର୍ମୀମାନେ ମଧ୍ୟ ଉପସ୍ଥିତ ଥିଲେ। ଭ୍ୟାନ ଯୋଗେ ଅନ୍ୟ ସେଣ୍ଟରକୁ ଟିକା ନିଆଯାଇଥିବାବେଳେ କେବଳ ଓମେନ୍ସ ହସ୍ପିଟାଲକୁ ସାଇକେଲରେ ଏହାକୁ ବୁହାଯାଇଥିଲା ବୋଲି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି। ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଡ୍ରାଏ ରନ୍କୁ ନିୟମାନୁଯାୟୀ ସଫଳତାର ସହ ଶେଷ କରିବାକୁ ସୋମବାର ସମ୍ପୃକ୍ତ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ।
