ଯାଜପୁର ଟାଉନ,୮।୫(ଡି.ଏନ.ଏ.): ଯାଜପୁର ସହରର ଦଶାଶ୍ୱମେଧ ଘାଟ ନିକଟ ବୈତରଣୀ ନଦୀରେ ନିର୍ମାଣାଧୀନ ବ୍ୟାରେଜ୍ ନିକଟରେ ଶୁକ୍ରବାର ବୁଡ଼ିଯାଇ ଜଣେ ଶ୍ରମିକଙ୍କ ମୃତ୍ୟୁ ଘଟିଥିଲା। ତେବେ ଏହି ଘଟଣାକୁ ୨୪ ଘଣ୍ଟା ନ ପୂରୁଣୁ ଶନିବାର ପୁଣି ଉକ୍ତ ନଦୀରେ ବୁଡ଼ି ଜଣେ ୧୦ମ ଶ୍ରେଣୀ ଛାତ୍ର ପ୍ରାଣ ହରାଇଛନ୍ତି। ସେ ହେଲେ ସହରର ରାଉତରାପୁରର ରାଜେନ୍ଦ୍ର କୁମାର ସାହୁଙ୍କ ବଡ଼ପୁଅ ପ୍ରିୟାଂଶୁ ସାହୁ(୧୬)। ପରୀକ୍ଷା ସରିବା ପରେ ଛାତ୍ର ଜଣକ ସାଙ୍ଗମାନଙ୍କ ସହ ବୈତରଣୀ ନଦୀର ପଣସା ପଞ୍ଚାୟତ ମୋଟରଙ୍ଗାପାଳ ନଦୀଘାଟରେ ଗାଧୋଉଥିଲେ। ଗାଧୋଇବା ପରେ ସେଠାରେ ପାର୍ଟି ମନାଇବାକୁ ସାଥିରେ ବିରିୟାନି କିଣି ଆଣିଥିଲେ। ସମସ୍ତେ ଗାଧୋଉଥିବାବେଳେ ପ୍ରିୟାଂଶୁଙ୍କ ହଠାତ୍ ଗଭୀର ଜଳରେ ବୁଡ଼ିଯାଇଥିଲେ। ସାଥୀ ପିଲାମାନେ ଚିତ୍କାର କରିବାରୁ ନିକଟସ୍ଥ କ୍ଷେତରେ କାମ କରୁଥିବା ଚାଷୀମାନେ ଆସି ୪ଜଣଙ୍କୁ ନଦୀରୁ ଉଦ୍ଧାର କରିଥିଲେ। ହେଲେ ପ୍ରିୟାଂଶୁଙ୍କୁ ବଞ୍ଚାଇ ପାରି ନ ଥିଲେ। ମୃତ ପ୍ରିୟାଂଶୁ ନିକଟସ୍ଥ ଜିଲାସ୍କୁଲର ଜଣେ ମେଧାବୀ ଓ ଶାନ୍ତ ସ୍ବଭାବର ଛାତ୍ର ଥିଲେ। ଅନ୍ୟପକ୍ଷରେ ଏହି ସ୍ଥାନ ସମେତ ନଦୀଶଯ୍ୟାର ବିଭିନ୍ନ ସ୍ଥାନରେ ବେଧଡ଼କ ବାଲି ଚୋରି ଯୋଗୁ ଏଭଳି ଦୁଃଖଦ ପରିସ୍ଥିତି ସୃଷ୍ଟି ହୋଇଛି। ମେଶିନରେ ଏବଂ ନଦୀସ୍ରୋତ ମଧ୍ୟରୁ ବାଲି ଉତ୍ତୋଳନ ପାଇଁ ସମ୍ପୂର୍ଣ୍ଣ କଟକଣା ରହିଥିଲେ ମଧ୍ୟ ବାଲିମାଫିଆ ତହସିଲ ଓ ପ୍ରଭାବଶାଳୀଙ୍କ ବାହୁ ଛାୟା ତଳେ ରହିଥିବାରୁ ସେମାନେ ମନଇଚ୍ଛା ଯେଉଁଠି ନାହିଁ ସେଠି ଖନନ କରୁଛନ୍ତି। ଏଥିଯୋଗୁ ବାରମ୍ବାର ଦୁର୍ଘଟଣା ଘଟୁଛି। ତେଣୁ ଏ ଦିଗରେ ଉଚ୍ଚ କର୍ତ୍ତୃପକ୍ଷ ଦୃଷ୍ଟିଦେବାକୁ ଦାବି ହୋଇଛି।
