ବର୍ତ୍ତମାନ ଅଧିକାଂଶ ମହିଳା ଟୁ ହ୍ବିଲର ହେଉ ବା ଫୋର୍ ହ୍ବିଲର ଗାଡି ଚଲାଉଥିବାର ଦେଖିବାକୁ ମିଳୁଛି। ତେବେ ଗାଡି ଚଲାଇବା ସମୟରେ କେତୋଟି ସମାନ୍ୟ କଥାକୁ ଅଣଦେଖା କରିବା ଦ୍ୱାରା ଅନେକେ ଦୁର୍ଘଟଣାର ଶିକାର ହେଉଥିବାର ନଜିର ବି ରହିଛି। ତେଣୁ କେଉଁ ସବୁ ଦିଗ ପ୍ରତି ସଜାଗ ରହିଲେ ନିରାପଦ ଭାବେ ଗାଡି ଚଲାଇପାରିବେ ଜାଣି ରଖନ୍ତୁ ସେ ସମ୍ପର୍କରେ…
– ଗାଡି ଚଲାଉଥିବା ସମୟରେ ସବୁଠୁ ଗୁରୁତ୍ୱପୂର୍ଣ୍ଣ କଥା ହେଉଛି ସ୍ପିଡ୍ ନିୟନ୍ତ୍ରଣ। ଏଥିପ୍ରତି ସଜାଗ ରହିଲେ ଦୁର୍ଘଟଣା ଆଶଙ୍କା କମ୍। ରାସ୍ତାରେ ସବୁବେଳେ ଟ୍ରାଫିକ୍ ନିୟମ ମାନନ୍ତୁ।
– ନୂଆ ନୂଆ ଗାଡି ଚଲାଉଥିଲେ ଗହଳି ସ୍ଥାନକୁ ନ ଯିବା ଭଲ। ନଚେତ୍ ଦୁର୍ଘଟଣାର ଆଶଙ୍କା ରହିଛି।
– ଅଧିକାଂଶ ମହିଳା କେଶ ଖରାପ ହୋଇଯିବ ଭାବି ହେଲ୍ମେଟ ପିନ୍ଧିବାକୁ ପସନ୍ଦ କରନ୍ତି ନାହିଁ। ହେଲେ ଦୁଇଚକିଆ ଗାଡ଼ି ଚଲାଉଥିଲେ ସୁରକ୍ଷା ଦୃଷ୍ଟିରୁ ସର୍ବପ୍ରଥମେ ହେଲ୍ମେଟ୍ ପିନ୍ଧିବାକୁ ଭୁଲନ୍ତୁ ନାହିଁ। କାରଣ ଦୈବାତ୍ କୌଣସି ଦୁର୍ଘଟଣାର ସମ୍ମୁଖୀନ ହେଲେ ଏହା ମୁଣ୍ଡକୁ ସୁରକ୍ଷିତ ରଖିଥାଏ।
– ଗାଡି ଚଲାଇବା ସମୟରେ ମୁହଁ ଦେଖିବା କିମ୍ବା ସଜାଡି ହେବାର ବଦଭ୍ୟାସ ଅନେକଙ୍କର ରହିଛି। ଯାହାଦ୍ୱାରା ନା କେବଳ ରାସ୍ତା ଉପରୁ ଧ୍ୟାନ ଭଙ୍ଗ ହୋଇଥାଏ ବରଂ ମିରର୍ରେ ପଛ ଗାଡି ମଧ୍ୟ ଦେଖି ହୋଇ ନ ଥାଏ। ଫଳରେ ଦୁର୍ଘଟଣାର ଆଶଙ୍କା ବୃଦ୍ଧି ପାଇଥାଏ।
– ଗାଡି ଚଲାଇବା ବେଳେ ନିଜକୁ କମ୍ଫର୍ଟେବଲ୍ ଲାଗିବା ଭଳି ପୋଷାକ ପିନ୍ଧନ୍ତୁ। ଯଦି ଶାଢି କିମ୍ବା ଚୁଡିଦାର, ସାଲଓ୍ବାର୍- ପଞ୍ଜାବୀ ଭଳି ପୋଷାକ ପିନ୍ଧୁଛନ୍ତି ତେବେ ଏହାର ପଣତ ଏବଂ ଓଢ଼ଣି ଆଦିକୁ ଭଲ ଭାବେ ସମ୍ଭାଳି ରଖନ୍ତୁ। କାରଣ ଅନେକ ସମୟରେ ଏଥିପାଇଁ ଦୁର୍ଘଟଣା ହେଉଥିବାର ନଜିର ରହିଛି।
