ଲାଞ୍ଜିଗଡ଼,୨୨।୬(ରମେଶ ଚନ୍ଦ୍ର ନାୟକ): କଳାହାଣ୍ଡି ଜିଲା ଲାଞ୍ଜିଗଡ ବ୍ଲକ ବିଶ୍ୱନାଥପୁର ଥାନା ଅଞ୍ଚଳରେ ଏକ ମର୍ମନ୍ତୁଦ ଘଟଣା ଘଟିଛି। ନିଜେ ଚଳାଉଥିବା ଟ୍ରାକ୍ଟର ଚକରେ ଚାପିହୋଇ ଡ୍ରାଇଭରଙ୍କ ମୃତ୍ୟୁ ହୋଇଛି। ମୃତକ ଡ୍ରାଇଭର ଜଣକ ହେଉଛନ୍ତି କାନକୁଟୂରୁ ପଞ୍ଚାୟତ ଅନ୍ତର୍ଗତ କୁମ୍ଭାରପଡ଼ା ଗ୍ରାମର ଜିଲୁ ମାଝୀ (୩୮) । ସୂଚନାନୁସାରେ କାନକୁଟୂରୁ ପଞ୍ଚାୟତ କୁମ୍ଭାରପଡ଼ା ଗ୍ରାମର ଡ୍ରାଇଭର ଜିଲୁ ମାଝୀ ଟ୍ରାକ୍ଟର ନେଇ ପୁନିଗୁଡା ଗ୍ରାମରେ ଚାଷକାମ ସାରି ଅପରାହ୍ନରେ ଘରକୁ ଫେରୁଥିବା ବେଳେ ଟ୍ରାକ୍ଟର ମାଲିକଙ୍କ ପୁଅ ନିଜେ ଚଳାଉଥିଲେ ଓ ଜିଲୁ ଡ୍ରାଇଭର ପାଖରେ ବସିଥିଲେ। ପୁନିଗୁଡ଼ା ନିକଟରେ ସାମ୍ନାପଟୁ ଅନ୍ୟ ଅନ୍ୟ ଏକ ଟ୍ରାକ୍ଟର ହଠାତ ଆସିବା ଦେଖି ଟ୍ରାକ୍ଟର ଚଳାଉଥିବା ମାଲିକଙ୍କ ପୁଅ ଓ ନିଜର ଗାଡ଼ିକୁ ବଞ୍ଚାଇବା ପାଇଁ ଚେଷ୍ଟା କରୁଥିବା ବେଳେ ଭାରସାମ୍ୟ ହରାଇ ଟ୍ରାକ୍ଟରଟି ରାସ୍ତା ପାର୍ଶ୍ୱକୁ ଟାଣି ହୋଇ ଯାଇଥିଲା। ଯାହା ଫଳରେ ରାସ୍ତା କରେ ଥିବା ଗାତରେ ଟ୍ରାକ୍ଟର ପଡି ଡ୍ରାଇଭର ଟ୍ରାକ୍ଟରରୁ ଖସି ଗାତରେ ପଡ଼ିଯାଇଥିଲେ। ଯାହାଫଳରେ ଉକ୍ତ ଦୁର୍ଘଟଣାରେ ଡ୍ରାଇଭରର ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା । ଖବର ପାଇ ଟ୍ରାକ୍ଟର ମାଲିକ ନିଜ ଇଣ୍ଡିକା କାରରେ ଉକ୍ତ ମୃତ ଡ୍ରାଇଭରକୁ ହସ୍ପିଟାଲ ନେବା ପରିବର୍ତ୍ତେ ଗାଁକୁ ନେଇ ଛାଡ଼ି ଦେଇ ପଳାଇ ଯାଇଥିବା ଅଭିଯୋଗ ହୋଇଛି। ଖବରପାଇ ବିଶ୍ୱନାଥପୁର ଥାନାଧିକାରୀ ତୁଳସୀରାମ ଶବର ପୋଲିସ ବଳ ସହିତ ଘଟଣାସ୍ଥଳରେ ପହଞ୍ଚି ଦୁଇ ଟ୍ରାକ୍ଟରକୁ ଜବତ କରିବା ସହ ମୃତଦେହକୁ ଜବତ କରି ଶବ ବ୍ୟବଚ୍ଛେଦ ପାଇଁ ଲାଞ୍ଜିଗଡ ପଠାଇଥିବା ସୂଚନା ମିଳିଛି । ଦୁର୍ଘଟଣାର କାରଣ ନେଇ ତଦନ୍ତ ଆରମ୍ଭ କରୁଛି ବିଶ୍ୱନାଥପୁର ପୋଲିସ । ଏଭଳି ମର୍ମାନ୍ତୁକ ଦୁର୍ଘଟଣାରେ ଅଞ୍ଚଳରେ ଶୋକର ଛାୟା ଖେଳିଯାଇଛି। ମୃତ ଡ୍ରାଇଭରଙ୍କ ଘରେ ସ୍ତ୍ରୀ ଫୁଳମତି ମାଝୀ ସହିତ ପାଞ୍ଚ ଝିଅ ରିଙ୍କି ମାଝୀ (୧୬), ଚଞ୍ଚଳା ମାଝୀ (୧୪), ମଞ୍ଜୁଳା ମାଝୀ (୧୨), ସଂଜୁତା ମାଝୀ (୧୦), ଜୁନିତା ମାଝୀ (୬) ଓ ଏକମାତ୍ର ପୁତ୍ର ଦିଲ୍ଲୀପ ମାଝୀ (୮) ବର୍ଷର ରହିଛନ୍ତି। ପରିବାରର ଏକମାତ୍ର ରୋଜଗାର କ୍ଷମ ବ୍ୟକ୍ତିକୁ ହରାଇ ଚିନ୍ତାରେ ପରିବାରବର୍ଗ ଭାଙ୍ଗିପଡିଥିବା ବେଳେ ଏନେଇ ଦୁର୍ଘଟଣାର ଉଚିତ୍ ତଦନ୍ତ କରିବା ସହିତ ମୃତ ପରିବାରକୁ ସରକାରୀ ସହାୟତା ଯୋଗାଇ ଦେବାକୁ ପରିବାର ତଥା ଗ୍ରାମବାସୀଙ୍କ ଦାବି ହେଉଛି।
